Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

2 Pëdru 2:1-22

IMAKUNA KANQAN

  • Mana rasumpa kaqta yachatsikoqkunam yuriyämunqa (1-3)

  • Mana rasumpa kaqta yachatsikoqkuna juzgashqa kayänampaq kaq (4-10a)

    • Tartaruman angelkuna jitashqa kayanqan (4)

    • Apäkï Tamya; Sodöma markawan Gomörra marka (5-7)

  • Mana rasumpa kaqta yachatsikoqkuna imanö kayanqan (10b-22)

2  Tsënö kaptimpis, jina Diospa willakoqnin* tukoqkunam Israel nunakunachö yuriyarqan, y tsënöllam qamkunachöpis mana rasumpa kaqta yachatsikoqkuna kanqa. Pëkunam yachëllapa yuritsiyämunqa markäkïta* ushakätseq sectakunata,* y pëkunaqa hasta ranteqninkuna duëñutam negayanqa, y tsënömi janankunaman ushakë raslla chänampaq kikinkuna causayan.  Jinamampis, mana penqakur mana allikunata rurayanqantam* mëtsikaq qatiyanqa, y pëkunarëkurmi rasumpa kaq yachatsikïkunapita* mana allita parlayanqa.  Jina imëkapaq ërayarmi engañakïpa parlapäyäshurniki qamkunapita provechakuyanqa. Peru pëkunapaq unëpitana patsätsishqa castïguqa manam qepëkämuntsu, y ushakëninkunaqa segürum chämunqa.  Rasumpa kaqchöqa, Diosqa manam jutsallakoq angelkunata castïgunnaqta jaqirqantsu, sinöqa Tartaruman* jitarkurmi wamayëpaq ampeqman* cadenarkurqan* juiciu tiempu chämunqanyaq tsëchö katsinampaq.  Y manam mana cäsukoq unë nunakunatapis castïgunnaqta jaqirqantsu, sinöqa alläpa mana alli nunakunaman apäkï tamyata apamurmi, alli kaq rurëkunapita willakoq Noëta qanchis nunakunatawan següruchö katsirqan.  Y Sodöma markatawan Gomörra markata castigarmi uchpaman tikraratsirqan, y tsënömi alläpa mana alli nunakunata shamoq tiempuchö ima pasanampaq kaqta rikätsikurqan.  Jina alli kaqta ruraq Lot-tam librarqan, pëqa leyta mana cäsukoq nunakuna mana penqakur mana allikunata ruraqta* rikarmi alläpa llakikoq  —porqui pëkunachö täranqan witsanmi, leyta mana cäsukur rurayanqankunata rikar y wiyar tsë alli kaqta ruraq nunaqa waran waran alläpa llakikoq—.  Awmi, Jehoväqa* llapan shonqunwan sirweq nunakunata pruëbakunapita salvëta yachanmi, peru mana allita ruraq nunakunataqa juiciu junaqchö ushakätsishqa* kayänampaqmi këkätsin, 10  masqa wakimpa cuerpunkunata rakchatëta asheqkunata, y autoridäyoq* kaqkunata despreciaqkunata. Pëkunaqa mana mantsakoq y munëninchö tsarakoqmi kayan, manam mantsayantsu Dios precisaqpaq churanqan kaqkunapaq lluta parlëta, 11  peru angelkunaqa pëkunapita mas kallpayoq y mas poderyoq këkarpis, Jehoväta* respetarninmi mana rasumpa kaqta yachatsikoqkunapa contranqa lluta parlayantsu. 12  Peru kë nunakunaqa, tsarishqa y ushakätsishqa kayänampaq yureq y peqanman chanqanta ruraq juiciunnaq animalkunanömi mana musyayanqan asuntukunapaq lluta parlayan. Pëkunaqa, ushakëman chätsikoq rurëninkunarëkurmi ushakätsishqa kayanqa, 13  mana alliman chätsikoq rurënimpita mana allita pägutanö chaskirnin. Pëkunaqa imëka jananchö kawakïtaqa alläpa kushikïpaqtanömi rikäyan, hasta junaq patsapapis. Pëkunaqa röpachö mapanö y qaqllachö siranömi* kayan, qamkunawan juntu mikupakur këkarmi engañakoq yachatsikïninkunata kushishqa* yachatsikuyan. 14  Pëkunaqa mana majanwan oqllanakïtam alläpa munayan,* y manam jutsa rurëta jaqita puëdiyantsu, y manaraq alli patsakashqa creikoqkunapa* shonquntam suwayan. Shonqunkunachöqa imatapis ërayëpa munëmi junta këkan.* Maldecishqa tsurikunam kayan. 15  Alli kaq nänita jaqirmi, oqrakätsishqa kayashqa. Beorpa tsurin Balaampa rurënintam qatiyashqa, pëqa päguta alläpa munarmi mana alli kaqta rurarqan, 16  peru alli kaq rurëpa contran kaqta ruranqampitam piñapashqa karqan. Cargata apaq parlëta mana yachaq animalmi, nunanö parlarnin, Diospa willakoqnin Balaamta upa rurëta rurananta michëta tïrarqan. 17  Pëkunaqa tsakishqa pukyukuna* y alläpa sinchi vientu apanqan pukutëmi kayan, y mas yana kaq ampeqmi* pëkunapaq këkan. 18  Espantëpaq shumaq parlarmi imachöpis mana yanapakoq kaqkunata parlëkuyan. Jutsasapa ëtsapa munëninta munapätsir y mana penqakur mana alli rurëkunata* rurarmi, mana allita rurar kawakoq kaqkunapita tsëraq escapashqa nunakunapa shonqunkunata suwayan. 19  Tsë mana rasumpa kaqta yachatsikoqkunaqa libri këtam pëkunata äniyan,* peru kikinkunapis mana alli rurëkunapa esclävunmi kayan; porqui sitsun pitapis juk vencirinqa,* tsëqa, venceqnimpa esclävunmi tikrarin. 20  Rasumpa kaqchöqa, sitsun Señor y Salvakoq Jesucristuta alleq reqirir mana cäsukoq nunakunapa rakcha rurëninkunapita escapashqa këkar, tsë cösaskunaman yapë kutiyanqa y vencishqa kayanqa, tsëqa, puntata imanö kayanqampitapis mas mana allichömi ushayanqa. 21  Mas alliqa kanman karqan, alli kaq rurëkunamannö kawakïta alleq mana reqiyanqanmi, reqishqana këkar, chaskiyanqan sagrädu mandakïkunapita rakikäkuriyanqampitaqa. 22  Rasumpa kaqta kënö niyanqanmi pëkunachöqa cumplikan: “Allquqa shonqun jitanqanta mikoqmi kutishqa, y armatsishqa kuchim leqitachö* armakoq kutishqa”.

Päginapa ura kuchunchö willakïkuna

Griëgu idiömachöqa “profëta” ninmi. Rikäri “Käyitsikïkuna” nishqanta.
Kënöpis niyanmi: yärakuyta.
Rikäri “Käyitsikïkuna” nishqanta.
Griëgu idiömachö: a·sel·guei·a. Rikäri “Käyitsikïkuna” nishqanta.
Griëgu idiömachöqa “rasumpa kaq nänipita” ninmi.
Rikäri “Käyitsikïkuna” nishqanta.
Kënöpis niyanmi: tsakaqman; tutapëman.
O, itsapis: “wamayëpaq ampiraq uchkukunaman churarkurqan”.
Griëgu idiömachö: a·sel·guei·a. Rikäri “Käyitsikïkuna” nishqanta.
Diospa jutin Jehoväqa ishkë pachak kima chunka qanchis (237) kutim kë Bibliapa versïculunkunachö yurin, y këmi juk kaq. Rikäri “Käyitsikïkuna” nishqanta.
Griëgu idiömachöqa “wallushqa” ninmi.
O: “mandakoq”.
Rikäri “Käyitsikïkuna” nishqanta.
Kënöpis niyanmi: marcanömi.
O: “ërayëpa kushishqa”.
O: “nawinkunachöqa mana majanwan oqllanakïmi junta këkan”.
O: “almakunapa”. Rikäri “Käyitsikïkuna” nishqanta.
O: “shonqunkunatam imëkatapis ërayëpa munëta yachatsiyashqa”.
Kënöpis niyanmi: pashtaqkuna.
Kënöpis niyanmi: tsakaymi.
Griëgu idiömachö: a·sel·guei·a. Rikäri “Käyitsikïkuna” nishqanta.
Kënöpis niyanmi: awniyan.
O: “imapis vencirinqa”.
Kënöpis niyanmi: qetachö.