Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Timoteu 6:1-21

IMAKUNA KANQAN

  • Sirwipakoqkuna patronninkunata respetayätsun (1, 2)

  • Llutanta yachatsikoqkuna y qellëta kuyë (3-10)

  • Diospa nunampaq atikakï (11-16)

  • Alläpa alli kaq rurëkunata rurëchö kapoqyoq kayë (17-19)

  • Carguïkichö kanampaq chaskinqëkita cuidë (20, 21)

6  Sirwipakoq kë yüguchö këkaqkunaqa, patronninkunata alläpa respëtuwan rikarnin sïguiyätsun, tsënöpa Diospa jutimpita ni yachatsikïnimpita ni imëpis mana allita mana parlayänampaq.  Jinamampis creikoq patronyoq kaqkunaqa, ama pëkunata mana respetakoqqa kayätsuntsu, porqui creikoq mayim* kayan. Tsëpa rantinqa, gänas gänasllam sirwiyänan, porqui shumaq sirwiyanqampita provëchuta jorqaq patronninkunaqa creikoq mayinkuna y kuyashqa wawqinkunam kayan. Këkunata yachatsikurnin y tsënö atikakurnin* sïgui.  Sitsun pï nunapis jukläya yachatsikïta yachatsikunqa, y Señornintsik Jesucristupita chaskinqantsik alli* yachatsikïmannötsu, ni Diosta llapan shonquwan imanö sirwinapaq kaqta rikätsikoq yachatsikïmannötsu kanqa,  tsëqa pasëpa orgullösum pëqa këkan, y manam imatapis käyintsu.* Palabrakuna asuntu tsaränakïta y discutitam alläpa gustan.* Tsëkunam chätsikun envidiakïman, pleytukïman, chikiparnin tumpakïman,* wakinkunapaq alläpa mana allikunata pensëman,  y lluta pensëyoq y rasumpa kaqpita rakikashqa nunakunapa causan mana precisaq asuntukunapita imëpis discutiman, pëkunaqa pensayan llapan shonquwan Diosta sirwiqa, imatapis taripakuyänampaq kanqantam.  Rasumpa kaqchöqa, imëka allitam tarintsik precisaq kaqllawan kushishqa kawakurnin llapan shonquwan Diosta sirwichöqa.  Porqui kë munduchö* yurikurqa manam ni imatapis apamurqantsiktsu, y wanukurpis manam ni imatapis apakïta puëdishuntsu.  Tsëmi mikï y röpa* kapamashqaqa, tsëkunallawan imëpis kushishqa kashun.  Peru kapoqyoq* kayänampaq churapakashqa* kaqkunaqa, tentacionman, juk toqllaman* y alläpa mana allita rurakoq y imapaqpis mana sirweq munëkunamanmi ishkiyan, tsëkunaqa ushakëman y mana allimanmi nunakunata raslla chäratsin. 10  Porqui qellëta kuyëqa imëka mana allikunamanmi chätsikun, y tsëta alläpa munarmi, wakinkunaqa creikïninkunapita waqtsakätsishqa kayashqa y imëka nanatsikïkunata kikinkunapaq ashiyashqa. 11  Peru qamqa, Diospa nunan, tsëkunapita escapakï.* Peru alli kaqta rurëta, llapan shonquwan Diosta sirwita, markäkïta,* kuyakïta, tsarakoq këta y yachanëpaq këta imëpis ashi. 12  Cristiänu creikïkunarëkur alli kaq pelyachö pelyë; chaskinëkipaq qayashqa kanqëki y mëtsikaq testïgukunapa rikëninchö musyatsikunqëki imëyaqpis kawakïpita alli tsaripukï.* 13  Llapan imëkakunata kawëkaqta katseq Diospa rikëninchö, y Ponciu Pilätupa puntanchö testïgunö alleq cläru musyatsikoq Cristu Jesuspa rikëninchömi, qamta mandaq 14  Señornintsik Jesucristu rikakushqa kanqan* tiempuyaq, culpannaq y imapitapis mana parlashqa tsë mandakïta wiyakunëkipaq, 15  tsëtaqa kushishqa y japallan kaq Alläpa Puëdeqmi tsëpaq dispunishqa tiempukunachö rikätsikunqa. Pëqa mandakoqkunapa Reynin y señornö gobernaqkunapa Señorninmi, 16  pëlla mana ushakaq kawëyoq, pipis mana chänan aktsichö täraq, y ni pï nunapis mana rikanqan ni rikëta mana puëdinqan kaq. Pëpaq respetashqa kë y imëyaqpis puëdeq kë katsun. Tsënö katsun.* 17  Kanan imëkapis imanö këkanqanchö* kapoqyoq* kaqkunata atikë* precisaq tukoq* mana kayänampaq, y mana markäkïpaq* kapoqyoq këmantsu markäkuyänampaq, sinöqa provëchuntsikpaq imëkakunata ramë ramë* qomaqnintsik Diosman markäkuyänampaq. 18  Alli kaq rurëkunachö trabajayänampaq nï, alläpa alli kaq rurëkunata rurëchö kapoqyoq kayänampaq, shonqupita patsë* qarakoq kayänampaq, kayäpunqankunata wakinkunata rakipäyänampaq* listu këkäyänampaq, 19  tsëkunata rurar, shamoq tiempupaq markäkïpaq fortünakunata kikinkunapaq ëlluyänampaq,* tsënöpa rasumpa kaq kawëpita alli tsaripukuyänampaq.* 20  Timoteu, carguïkichö kanampaq chaskinqëkita cuidë, Diospa contran kaq parlëkunapita y rasumpa kaqpa contran parlëkunaman chätsikoq mana rasumpa kaq musyëpita rakikarnin. 21  Tsënö musyëyoq kayanqampita alli tukurmi wakinkunaqa creikïninkunapita rakikäkuriyashqa. Diospa alläpa alli kënin qamkunachö këkätsun.

Päginapa ura kuchunchö willakïkuna

Griëgu idiömachöqa “wawqim” ninmi.
Kënöpis niyanmi: willapäkurnin.
O: “sänu; yanapakoq”.
Kënöpis niyanmi: entiendintsu.
O: “discutipaqmi wanukäkun”.
O: “ashakoq discursukunaman”.
Rikäri “Käyitsikïkuna” nishqanta.
Griëgu idiömachöqa “tsapäkuna” ninmi.
Kënöpis niyanmi: rïcu.
Kënöpis niyanmi: churakashqa.
Kënöpis niyanmi: trampaman.
Kënöpis niyanmi: qeshpikuy; safakï.
Kënöpis niyanmi: yärakuyta.
Kënöpis niyanmi: tsaripakuy.
O: “poderninta rikätsikunqan”.
O: “amen”.
O: “kanan witsanchö”. Rikäri “Käyitsikïkuna” nishqanta.
Kënöpis niyanmi: rïcu.
O: “mandë”.
O: “allish tukoq”.
Kënöpis niyanmi: yärakuypaq.
Kënöpis niyanmi: atska atskata.
O: “ramë ramë”.
Kënöpis niyanmi: aypupuyänampaq.
Kënöpis niyanmi: qoriyänampaq.
Kënöpis niyanmi: tsaripakuyänampaq.