Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Timoteu 5:1-25

IMAKUNA KANQAN

  • Mayor nunakunata y jövinkunata imanö tratanapaq (1, 2)

  • Viudakunata yanapayänampaq consëju (3-16)

    • Wayinchö täraq kaqkunapaq wanayanqan kaqkunata procurayänampaq (8)

  • Sinchi trabajar creikoqkunata rikaqkunata alläpa respetayë (17-25)

    • Pachëkirëkur vïnuta ichikllata upï (23)

5  Mayor nunataqa ama sinchipa qayapëtsu. Tsëpa rantinqa, juk teytatanö atikë,* jövin kaqkunatana wawqikikunatanö,  mayor warmikunatana mamatanö, shipashkunatana panikikunatanö, llapanchöpis limpiu shonqïkiwan.  Yanapayänanta rasumpa wanaq kaq viudakunata* cuentaman churë.*  Peru sitsun mëqan viudapapis wamrankuna o willkankuna kanqa, tsëqa wayinkunachöraq yachakuyätsun llapan shonqunkunawan Diosta sirwita, teytankunata y awilunkunata imëka jaqankuna cuenta cuidarnin y atiendirnin, porqui tsëqa alläpa allim Diospa rikëninchö.  Yanapayänanta rasumpa wanaq y pïninnaq viuda warmiqa Diosmanmi markäkun,* y paqasta junaqtam rogakurnin y mañakurnin sïguin.  Peru jutsasapa ëtsampa mana alli munëninchö kawakoqqa, kawëkarpis wanushqam këkan.  Tsëqa kë mandakïkunata willarnin sïguï, tsënöpa ni imapitapis mana parlashqa kayänampaq.  Rasumpa kaqchöqa, sitsun pipis kikimpa kaqkunapaq y masqa wayinchö täraq kaqkunapaq wanayanqan kaqkunata procuranqatsu, tsëqa creikïnintam juk kuchuman churarishqa y markäkïninnaq nunapitapis mas peormi.  Joqta chunkapita (60) mas watayoq viudam listamanqa churashqa kanan, juk nunallapa warmin kashqa kaq, 10  allikunata ruranqampita reqishqa kaq, wamrankunata alli wätashqa kaq, posadatsikoq kashqa kaq, santu nunakunapa chakinta paqashqa* kaq, sufrikaqkunata yanapashqa kaq, y imëka allikunata imëpis rurashqa kaq. 11  Peru mënus watayoq kaq viudakunataqa ama listaman churëtsu, porqui oqllanakï munëninkuna Cristuta sirwi munëninkunapa contran tikrakïkuptinqa, casakïtam munayan. 12  Y condenashqa këmanmi chäyanqa, porqui punta änikuyanqantam jaqiriyashqa. 13  Jina ni ima rurëyoq këtam yachakuyan, wayin wayin purikurnin; awmi, manam ni ima rurëyoq këllatatsu yachakuyan, sinöqa wasa rima këta y jukpa asuntunkunaman mëtikïtam, mana parlayänampaq kaqkunata parlarnin. 14  Tsëmi, jövinllaraq kaq viudakuna casakuyänanta munä, wamrankuna kananta y wayinkunata shumaq rikäyänanta, tsënöpa contrakoq kaqta mana allita parlanampaq lugarnin mana qoyänampaq. 15  Rasumpa kaqchöqa, wakinkunaqa rakikäyashqanam Satanasta qatiyänampaq. 16  Sitsun mëqan creikoq warmipapis viuda* kastankuna kapunqa, tsëqa pë yanapatsun, tsënöpa creikoqkuna* mana cargutsakuyänampaq. Tsënam creikoqkunaqa yanapayänanta rasumpa wanaq kaq viudakunata yanapayanqa. 17  Creikoqkunata rikaq* alläpa alli pushakoqkunaqa alläpa respetashqa kayätsun, masqa parlarnin y yachatsikurnin sinchi trabajaqkuna. 18  Porqui qellqashqachömi kënö nin: “Manam ërachö gränuta jalïkaq* törumanqa jäkiman* churankimantsu”, jina ninmi: “Trabajaq nunaqa pägunta chaskinanmi”. 19  Ama creikoqkunata rikaqta* imapitapis tumpayanqanta creitsu, sinöqa ishkaq o kimaq testïgukuna rikätsikuyaptinraq. 20  Jutsa ruraqkunata imachö mana alli këkäyanqanta llapan këkaqkunapa nöpanchö rikätsi, tsënöpa wakin kaqkunapis mantsakuyänampaq. 21  Diospa, Cristu Jesuspa y akrashqa angelkunapa rikëninchömi alleq cläru këta umpakoq,* kë mandëkanqaqkunata pimampis mana qaqashpa* o llapankunata igualpa rikar wiyakunëkipaq. 22  Ama imëpis pï nunamampis cargun qornin makikita rasqa churëtsu;* ni jukpa jutsampita culpayoq këtsu, imëpis limpiu shonqu kë. 23  Amana yakuta upïnatsu;* sinöqa pachëkirëkur y qeshyapäkurlla kanqëkirëkur vïnuta ichikllata upï. 24  Wakin nunakunapa jutsankunataqa pï mëmi musyariyan, y rasllam condenashqa këman chäratsin, peru wakin nunakunapaqa tiempu pasariptinran jutsankuna musyakan. 25  Jina tsënöllam alli rurëkunataqa pï më musyariyan, y raslla mana musyakäreq kaqkunaqa manam pakashqalla sïguita puëdiyantsu.

Päginapa ura kuchunchö willakïkuna

Kënöpis niyanmi: willapë.
Juk parlakïchöqa, ni pï yanapaqnin mana kapoq kaqkunata.
Griëgu idiömachöqa “respetë” ninmi.
Kënöpis niyanmi: yärakun.
Kënöpis niyanmi: awishqa.
Juk parlakïchöqa, ni pï yanapaqnin mana kapoq kaqkunata.
Griëgu idiömachöqa “congregacion” ninmi. Rikäri “Käyitsikïkuna” nishqanta.
Jina “anciänu” nirpis reqiyanmi.
Kënöpis niyanmi: jaruykaq.
Kënöpis niyanmi: bozalnin.
Jina “anciänu” nirpis reqiyanmi.
Kënöpis niyanmi: encargakö.
Kënöpis niyanmi: laqakaypa.
Rikäri “Käyitsikïkuna” nishqanta.
O: “ama yakullataqa upïnatsu”.