Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

1 Timoteu 4:1-16

IMAKUNA KANQAN

  • Supëkunapa yachatsikïninkunapita cuidakïpaq atikakï (1-5)

  • Cristupa alläpa alli sirweqnin imanö kanapaq (6-10)

    • Ejerciciukunata rurëwan y llapan shonquwan Diosta sirwi imachö jukläya kayanqan (8)

  • Imanö yachatsikïkanqëkita alleq rikë (11-16)

4  Tsënö kaptimpis, Diospita shamoq palabraqa* alleq clärum nin shamoq tiempukunachö creikïpita wakinkuna rakikäkuriyänampaq kaqta, Diospitanö shamoq pantatsikoq mana rasun kaq willakïkunata* y supëkunapa yachatsikïninkunata wiyakurnin,  tsëqa kanqa ulikïkunata* parlaq ishkë qaqlla nunakunarëkurmi,* pëkunapa concienciankunaqa imëka caldiyashqa* fiërruwan chäpashqanömi.  Pëkunaqa casakuyänantam michäkuyan, y markäkïyoq* kaqkuna y rasumpa kaqta alli reqeq kaqkuna agradecikur mikuyänampaq Dios kamanqan mikïkunata mana mikuyänampaqmi mandakuyan.  Porqui Dios llapan kamanqankunaqa alläpa allim, y Diosta agradecikurnin chaskikushqa kayanqantaqa manam imatapis perditsiyanmantsu,  porqui Diospa palabranwan y mañakïwanmi limpiuyätsishqa kayan.  Wawqikunata y panikunata këta consejarqa, Cristu Jesuspa alläpa alli sirweqninmi kanki, Diospa palabranwan y alläpa alli yachatsikïta shumaq y alli wiyakunqëkiwan alleq sinchiyätsishqa.  Peru chakwaskuna cuentakuyanqannö Diospa contran mana rasumpa kaq cuentukunataqa ama cäsïtsu. Tsëpa rantinqa, llapan shonqïkiwan Diosta sirwinëkipaq alistakï.  Porqui ejerciciukunata rurëqa ichikllachömi yanapakun, peru llapan shonquwan Diosta sirwiqa llapanchömi yanapakun, porqui tsëchöqa kanan kaq kawëpaq y shamoq kaq kawëpaq änikïmi* këkan.  Tsë willakïqa markäkïpaqmi* y paqwë creipaqmi. 10  Tsërëkurmi sinchi trabajëkantsik y kallpachakïkantsik, porqui kawëkaq Diosmanmi markäkurquntsik, pëqa llapan tukïläya nunakunapa Salvaqninmi, masqa pëman rasumpa markäkoqkunapa. 11  Këkunata mandakur y yachatsikur sïguï. 12  Ama imëpis jaqitsu pipis jövin kënikita despreciananta. Tsëpa rantinqa, parlëchö, portakïchö, kuyakïchö, markäkïchö y limpiu shonquyoq këchö, creikoqkuna qampita yachakuyänampaqnö kë. 13  Chämunqäyaqqa, creikoqkunapaq leyichö, wakinkunata atikar* këchö* y yachatsikïchö alliyänëkipaq kallpachakur sïgui. 14  Ama ichikllapaq churëtsu qamchö këkaq Diospa qarëninta, tsëtaqa chaskirqëki Diospa willakïninmannö y creikoqkunata rikaqkuna* qamman makinkunata churayämuptinmi.* 15  Tsëkunaman yarpachakï;* tsë rurëkunata chipyëpa rurar imëpis kë, tsënöpa poqu cristiänu tikrëkanqëkita llapankuna rikäyänampaq. 16  Imanö kawëkanqëkita y imanö yachatsikïkanqëkita imëpis alleq rikë. Tsëkunata rurëchö imëpis kallpachakï, porqui tsëta rurarmi kikikita salvakunki y wiyashoqnikikunatapis salvanki.

Päginapa ura kuchunchö willakïkuna

Griëgu idiömachöqa “espïrituqa” ninmi.
Griëgu idiömachöqa “pantatsikoq espïritukunata” ninmi.
Kënöpis niyanmi: llullakuykunata.
Kënöpis niyanmi: nunakuna jananmi.
Kënöpis niyanmi: rupëkaq.
Kënöpis niyanmi: yärakuyyoq.
Kënöpis niyanmi: awnikuymi.
Kënöpis niyanmi: yärakuypaqmi.
Kënöpis niyanmi: willapar.
O: “kallpata qoychö”.
Jina “anciänukuna” nirpis reqiyanmi.
Rikäri “Käyitsikïkuna” nishqanta.
O: “pensë”.