Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Tesalonicensis 3:1-13

IMAKUNA KANQAN

  • Atënaschö yarpachakur Pablu shuyaran (1-5)

  • Timoteu kushitsikoq noticiata willakunqan (6-10)

  • Tesalönicachö këkaqkunapaq mañakï (11-13)

3  Tsëmi, aguantëta manana puëdir Atënaschö japalläkuna quedakuyänä mas alli kanqanta pensayarqä;  y Cristupita alli willakïkunata willakïchö Diospa sirweqnin* wawqintsik Timoteutam kachayämurqä, markäkïnikikunachö* alli tsarakoqta tikratsiyäshunëkipaq* y shoqayäshunëkipaq,  tsënöpa qamkunachö ni pipis tsë sufrimientukunarëkur mana qelanäkurinampaq.* Porqui kikikikunam musyayanki tsë sufrimientukunapita libri këta mana puëdinqantsikta.*  Porqui qamkunawan këkarqa, puntallapitanam niyarqaq imëka sufrimientukunapa pasanantsikpaq kaqta, y musyayanqëkinöpis tsënömi pasakushqa.  Tsëmi, aguantëta manana puëdirnin, markäkïnikikunachö imanö këkäyanqëkita musyanäpaq Timoteuta kachamurqä, Diablu* imanöllapapis tentayäshushqa kayäshunëkita mantsar y llapan rurayanqäkuna mana kaqllapaq mana kashqa kanampaq.  Peru Timoteuqa, tsëllaran qamkunapita noqakunaman chäramushqa, y markäkïnikikunachö sinchi këkäyanqëkipita y kuyakïnikikunapitam alli noticiakunata musyatsiyämashqa, kuyakïwan imëpis yarpäyämanqëkipita y noqakuna munayanqänölla qamkunapis rikäyämëta alläpa munayanqëkita.  Tsëmi wawqikuna y panikuna, qamkunarëkur y alli markäkïyoq kayanqëkita rikätsikuyanqëkirëkur, llapan llakikïnïkunachö* y sufrimientükunachö shoqashqa kayarqö.  Porqui Señorpa kaqchö sinchi kayaptikiqa, noqakunaqa ankashmi sientikuyä.*  Porqui, ¿imanöraq qamkunapita Diospa rikëninchö alläpa kushikuyanqäpita Diosta agradecikuyanqäta rikätsikuyäman? 10  Paqasta junaqtam puëdiyanqämannö shonqupita patsë Diosta rogakuyä shamurnin kikïkuna qamkunata* rikäyänaqpaq, y markäkïnikikunachö pishipëkäyanqëkichö* yanapayänaqpaq. 11  Kananqa, kikin Diosnintsik y Teytantsik, y Señornintsik Jesus pushëkayämätsun qamkunaman chäyämunäpaq. 12  Jinamampis, jukniki juknikikunapaq y llapankunapaq kuyakïnikikunata Señor atskayätsitsun, awmi, miratsitsun, noqakunapis qamkunapaq kuyakïnïkunata miratsiyanqänö, 13  tsënöpa llapan santu sirweqninkunawan Señornintsik Jesus këkämunqan tiempuchö, Diosnintsikpa y Teytantsikpa rikëninchö pë shonqïkikunata alli tsarakoqta tikratsinampaq, limpiu shonqu këchö ni imapitapis mana tumpashqata.

Päginapa ura kuchunchö willakïkuna

O, itsapis: “Diospa kaqta rurëchö yanaqi”.
Kënöpis niyanmi: yärakuynikikunachö.
O: “sinchiyätsiyäshunëkipaq”.
Griëgu idiömachöqa “kuyutsishqa kanampaq” ninmi.
O: “tsëkunapa pasanapaq këkanqantsikta”.
Griëgu idiömachöqa “Tentakoq” ninmi.
Griëgu idiömachöqa “wanayanqäkunachö” ninmi.
Griëgu idiömachöqa “kawayä” ninmi.
Griëgu idiömachöqa “qaqllëkikunata” ninmi.
Kënöpis niyanmi: yärakuynikikuna pishinqanchö.