Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

1 Tesalonicensis 1:1-10

IMAKUNA KANQAN

  • Salüdukuna (1)

  • Tesalönicachö këkaqkunapa markäkïninkunapita agradecikun (2-10)

1  Pablupita, Silvänupita* y Timoteupita, Teyta Dioswan y Señor Jesucristuwan juknölla këkaq Tesalönicachö creikoqkunapaq:* Diospa alläpa alli kënin y yamë kënin qamkunachö këkätsun.  Mañakïnïkunachö qamkunapaq mañakurqa, Diostam imëpis agradecikuyä,  porqui manam ni imëpis qonqayätsu Teyta Diospa rikëninchö markäkurnin* rurayanqëkita, kuyakurnin rurayanqëkita y Señornintsik Jesucristuchö shuyäkïnikikunarëkur sasakunapa pasayanqëkichö alli tsarakuyanqëkita.  Porqui Dios kuyanqan wawqikuna y panikuna, qamkunata pë akrayäshunqëkitaqa alleqmi musyayä,  porqui willakuyanqä alli willakïkunaqa, manam shimillapatsu qamkunaman chämurqan, sinöqa poderwan, santu espïrituwan y firmi creikïwanmi, qamkunarëkur imanö nunakuna këman chäyanqäta alleq musyayanqëkinö.  Y qamkunaqa, noqakuna kayanqänö y Señor kanqannö këmanmi chäyarqëki, porqui Diospa palabrantam alläpa sasakunapa pasëkar santu espïritupita shamoq kushikïwan chaskikuyarqëki,  tsënöpam Macedoniachö y Acäyachö creikoqkunapaq qamkuna juk ejemplu këman chäyarqëki.  Rasumpa kaqchöqa, manam qamkunapa willakïnikikunallapitatsu Jehoväpa* palabranqa Macedoniachö y Acäyachö wiyakashqa, sinöqa më tsëchömi Diosman markäkïnikikuna wiyakashqa, tsëmi ni imata niyänäpis precisantsu.  Porqui pëkunaqa kikinkunam willakurnin sïguiyan qamkunawan punta kaq kutichö imanö reqinakunqantsikta, y imäginnikikunata jaqirïkur Diosman kutiyanqëkita, kawëkaq y rasumpa kaq Diosta sirwipakoqnö sirwiyänëkipaq, 10  y ciëlupita shamoq Tsurinta shuyäyänëkipaq, wanushqakunapita sharkatsimushqan kaqta, juk parlakïchöqa, Jesusta, pëmi Diospa shamoq piñakïnimpita salvamäshun.

Päginapa ura kuchunchö willakïkuna

Sïlas jutiwampis reqiyaqmi.
Griëgu idiömachöqa “congregacionpaq” ninmi. Rikäri “Käyitsikïkuna” nishqanta.
Kënöpis niyanmi: yärakurnin.
Diospa jutin Jehoväqa ishkë pachak kima chunka qanchis (237) kutim kë Bibliapa versïculunkunachö yurin, y këmi juk kaq. Rikäri “Käyitsikïkuna” nishqanta.