Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Juan 5:1-21

IMAKUNA KANQAN

  • Jesusman markäkï mana cäsukoq nunakunata vencin (1-12)

    • Diosta kuyë ima kanqan (3)

  • Diosta mañakï yanapakunqanman markäkï (13-17)

  • Alläpa mana alli nunakunachö mäkoq mäkoqlla kayë (18-21)

    • Mana cäsukoq nunakunaqa Satanaspa makinchömi këkäyan (19)

5  Pipis Jesus Cristu kanqanta creeq kaqqa Diospitam yurishqa, y pëta yuritseq kaqta kuyaqqa, pëpita yurishqa kaqtam kuyan.  Kërëkurmi musyantsik Diospa tsurinkunata kuyanqantsikta, Diosta kuyarnin y mandakunqankunata wiyakurnin.  Porqui këmi Diosta kuyëqa: mandakïninkunata wiyakï; y tsënö kaptimpis, mandakïninkunata wiyakïqa manam alläpa sasatsu.  Porqui pipis* Diospita yurishqa kaqqa vencinmi mana cäsukoq nunakunata. Y markäkïnintsik* ganatsimashqam mana cäsukoq nunakunata vencirquntsik.  ¿Pitaq mana cäsukoq nunakunata vencita puëdin? ¿Manaku Jesus Diospa Tsurin kanqanman markäkoq kaq?  Pëmi yakuwan y yawarwan shamoq kaq, juk parlakïchöqa Jesucristu, y manam yakullawantsu, sinöqa yakuwan y yawarwanmi. Y santu espïritum musyatsikïkan, porqui santu espïrituqa rasumpa kaqmi.  Porqui kimam* musyatsikuyan:  santu espïritu, yaku y yawar; y kimampis kaqllatam musyatsikuyan.  Sitsun nunakuna musyatsikuyanqanta chaskikuntsik, tsëqa, Dios musyatsikunqannäqa mas väleqmi. Porqui këmi Dios musyatsikunqan: Tsurimpita kikin musyatsikunqan kaq. 10  Diospa Tsurinman markäkoq kaq nunaqa, shonqunchömi tsë musyatsikïta katsin. Diosman mana markäkoq kaq nunaqa, pëtam ulikoqpaq* churashqa, porqui manam markäkushqatsu Tsurimpaq Dios musyatsikunqanman. 11  Y këmi tsë musyatsikï: Dios imëyaqpis kawëta qomanqantsik, y tsë kawëqa Tsurinchömi këkan. 12  Pipis Tsuriwan juknölla kaqqa tsë kawëyoqmi; pipis Diospa Tsurinwan juknölla mana kaqqa, manam tsë kawëta katsintsu. 13  Këkunataqa qamkunaman qellqamü, imëyaqpis kawëyoq kayanqëkita musyayänëkipaqmi, qamkuna, Diospa Tsurimpa jutinman markäkoq* kaqkuna. 14  Y këpitam pëman markäkuntsik,* munëninmannö kaqta imatapis mañakushqaqa, pëqa wiyamantsikmi. 15  Y imatapis mañëkanqantsikta wiyamanqantsikta musyarqa, jina musyantsikmi mañakunqantsikkunata chaskinapaq kaqta, porqui pëtam mañakurquntsik. 16  Sitsun pipis creikoq mayinta* rikanqa wanïman mana chätsikoq jutsata rurëkaqta, tsëqa pëpaq mañakutsun, y Diosmi kawëta qonqa, awmi, wanïman chätsikoq jutsata mana ruraq kaqkunata. Juk jutsam sïqa wanïman chätsikoq. Tsë jutsarëkurqa manam rogakunampaq nïtsu. 17  Llapan mana alli kaq rurëkunaqa jutsam, y tsënö kaptimpis, kanmi juk jutsa wanïman mana chätsikoq. 18  Musyantsikmi pipis Diospita yurishqa kaqqa, jutsata rurar mana kanqanta, sinöqa Diospita yurishqa kaqmi* pëta täpëkan, y Satanasqa* manam pëta tsarita puëdintsu. 19  Musyantsikmi noqantsikqa Diospita shamunqantsikta, peru mana cäsukoq nunakunaqa Satanaspa* makinchömi këkäyan. 20  Peru noqantsikqa musyantsikmi Diospa Tsurin shamunqanta, y rasumpa kaq Diosta reqinapaqmi tantiyakoq këta* qomarquntsik. Y Tsurin Jesucristurëkurmi rasumpa kaq Dioswan juknölla këkantsik. Pëmi rasumpa kaq Dios y imëyaqpis kawëta qokoq. 21  Kuyashqa wamrakuna, imäginkunapita witikuyë.

Päginapa ura kuchunchö willakïkuna

Griëgu idiömachöqa “llapan” ninmi.
Kënöpis niyanmi: yärakuynintsik.
Kënöpis niyanmi: kimsam.
Kënöpis niyanmi: llullakoqpaq.
Kënöpis niyanmi: yärakoq.
O: “pëwan mana mantsakushpa parlantsik”.
Griëgu idiömachöqa “wawqinta” ninmi.
Juk parlakïchöqa, Diospa Tsurin Jesucristu.
Griëgu idiömachöqa “alläpa mana alliqa” ninmi.
Griëgu idiömachöqa “alläpa mana allipa” ninmi.
Griëgu idiömachöqa “cuentata qokoq këta; pensë yachëta” ninmi.