Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Juan 4:1-21

IMAKUNA KANQAN

  • Willakïkuna Diospita shamunqanta o mana shamunqanta alleq rikë (1-6)

  • Diosta reqi y kuyë (7-21)

    • “Diosqa kuyakïmi” (8, 16)

    • Kuyakïchöqa manam mantsakï kantsu (18)

4  Kuyashqa wawqikuna y panikuna, ama llapan willakïkunataqa* creiyëtsu, sinöqa alleqraq rikäyë tsë willakïkuna* Diospita shamunqanta o mana shamunqanta, porqui Diospa willakoqnin* tukoqkunam nunakunaman mëtsikaq yarqayämushqa.  Kënömi qamkunaqa musyëta puëdiyanki juk willakï Diospita shamunqanta: Jesucristu nunanö shamunqanta rikätsikoq kaq willakïkunam Diospita shamun.  Peru Jesuspita tsëta mana rikätsikoq kaq willakïkunaqa manam Diospitatsu shamun. Jinamampis, tsëqa shamunampaq kaqta wiyayanqëki anticristupa willakïninmi, y kananqa nunakunachönam këkan.  Qamkunaqa Diospitam shayämunki kuyashqa wamrakuna, y pëkunatam venciyarqunki, porqui qamkunawan juknölla këkaqqa, mana cäsukoq nunakunawan juknölla këkaqpita mas puëdeqmi.  Pëkunaqa mana cäsukoq nunakunapitam shayämun; tsëmi mana cäsukoq nunakunapita yureq kaqta parlayan, y mana cäsukoq nunakunam pëkunata wiyayan.  Noqantsikqa Diospitam shamuntsik. Pipis Diosta reqeq kaqqa wiyamantsikmi; pipis Diospita mana shamoq kaqqa manam wiyamantsiktsu. Tsëchömi noqantsikqa cuentata qokuntsik mëqan rasumpa kaq willakïkuna kanqanta y mëqan mana rasumpa kaq willakïkuna kanqanta.  Kuyashqa wawqikuna y panikuna, juknintsik juknintsik kuyanakurnin sïguishun, porqui kuyakïqa Diospitam, y kuyakoq kaqkunaqa Diospitam yuriyashqa y Diostam reqiyan.  Pipis mana kuyakoq kaqqa manam Diosta reqintsu, porqui Diosqa kuyakïmi.*  Këchömi noqantsikpaqqa Diospa kuyakïnin rikakashqa karqan, japallanlla Tsurinta nunakunaman Dios kachamushqa kanqanchö, tsënöpa përëkur noqantsik imëyaqpis kawëta tarinapaq. 10  Kuyakïqa këmi: manam noqantsik Diosta kuyanqantsiktsu, sinöqa noqantsikta pë kuyamanqantsik y jutsantsikkunarëkur Dioswan amishtatsikoq* ofrendatanö Tsurinta kachamunqanmi. 11  Kuyashqa wawqikuna y panikuna, Dios tsënö kuyamashqantsik këkaptinqa, tsëqa jina noqantsikpis juknintsik juknintsikmi kuyanakunantsik. 12  Manam pipis Diosta ni imëpis rikashqatsu. Sitsun juknintsik juknintsik kuyanakur sïguishun, tsëqa Diosmi noqantsikwan imëpis këkan y kuyakïninmi noqantsikchö chipyëpa rikakun. 13  Këchömi musyantsik pëwan juknölla imëpis këkanqantsikta, y pë noqantsikwan juknölla imëpis këkanqanta, porqui pëqa santu espïrituntam qomarquntsik. 14  Jinamampis, kikïkunam rikäyarqö —y tsëtam willakïkäyä— Tsurinta nunakunapa salvaqnin kanampaq Teyta kachamunqanta. 15  Jesus Diospa Tsurin kanqanman markäkunqanta* pipis rikätsikuptinqa, Diosmi pëwan juknölla imëpis këkan, y pëpis Dioswanmi juknölla imëpis këkan. 16  Y noqantsikqa Dios kuyamanqantsiktam musyarquntsik y creirquntsik. Diosqa kuyakïmi,* y pipis kuyakoq kanqanta imëpis rikätsikoq kaqqa Dioswanmi juknölla imëpis këkan, y Diosmi pëwan juknölla imëpis këkan. 17  Tsënömi kuyakïqa noqantsikchö chipyëpa rikakun, tsënöpa juiciu junaqchö mana mantsakushpa parlakunapaq,* porqui Jesucristu imanöpis kanqannömi, noqantsikpis mana cäsukoq nunakunachö kantsik. 18  Kuyakïchöqa manam mantsakï* kantsu, antis chipyëpa alli kuyakïqa mantsakïta ushakäratsinmi,* porqui mantsakïqa michäkunmi. Rasumpa kaqchöqa, pipis mantsakoq kaqchöqa, manam pëchö kantsu chipyëpa alli kuyakï. 19  Noqantsikqa kuyantsik, puntata pë kuyamashqantsik kaptinmi. 20  Sitsun pipis, “noqaqa Diosta kuyämi” ninqa, y tsënö nikarnin creikoq mayinta* chikinqa, tsëqa ulikoqmi.* Porqui pipis creikoq mayinta* rikashqa këkar mana kuyaq kaqqa, manam mana rikanqan Diosta kuyëta puëdintsu. 21  Y kë mandakïtam pëpita chaskirquntsik, pipis Diosta kuyaq kaqqa, jina creikoq mayintam* kuyanan.

Päginapa ura kuchunchö willakïkuna

Griëgu idiömachöqa “llapan espïritutaqa” ninmi. Rikäri “Käyitsikïkuna” nishqanchö “Espïritu” neqta.
Griëgu idiömachöqa “espïritukuna” ninmi. Rikäri “Käyitsikïkuna” nishqanta.
Griëgu idiömachöqa “profëta” ninmi. Rikäri “Käyitsikïkuna” nishqanta.
O: “kuyakïqa Diospitam shamun”.
O: “yamëyätsikoq”.
Kënöpis niyanmi: yärakunqanta.
O: “kuyakïqa Diospitam shamun”.
O: “markäkïyoq kanapaq”.
Kënöpis niyanmi: mantsapakuy.
O: “qarqurinmi”.
Griëgu idiömachöqa “wawqinta” ninmi.
Kënöpis niyanmi: llullam.
Griëgu idiömachöqa “wawqinta” ninmi.
Griëgu idiömachöqa “wawqintam” ninmi.