Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Juan 3:1-24

IMAKUNA KANQAN

  • Diospa tsurinkunam kantsik (1-3)

  • Diospa tsurinkuna, Diablupa tsurinkunapita imachö jukläya kayanqan (4-12)

    • Diablupa rurëninkunata Jesus chipyëpa ushakätsin (8)

  • Jukniki juknikikuna kuyanakuyë (13-18)

  • Diosqa shonquntsikpitapis mas jatunmi (19-24)

3  ¡Rikäyë! ¡Imanö kuyakïtam Teytaqa rikätsimashqantsik Diospa tsurinkuna nir qayashqa kanantsikta permitir! Y tsaq tsëmi kantsik. Tsëmi mana cäsukoq nunakunaqa reqimantsiktsu, porqui manam pëta reqiyashqatsu.  Kuyashqa wawqikuna y panikuna, kananqa Diospa tsurinkunam kantsik, peru manaran rikätsimarquntsikraqtsu imanö kanapaq kaqta. Peru musyantsikmi pë rikakushqa kaptin pënö kanapaq kaqta, porqui pë rasumpa imanö kanqantam rikäshun.  Y pëman markäkur* tsëta llapan shuyäkoq kaqkunaqa, kikinkunatam limpiuta tikratsikuyan, pë limpiu kanqannölla.  Jutsata llapan ruraq kaqkunaqa, jina leytam mana cäsukïkäyantsu, tsëmi jutsaqa leyta mana cäsukï.  Jina qamkunaqa musyayankim pëqa jutsantsikkunata ushakätsinampaq shamushqa kanqanta, y pëchöqa manam ni ima jutsapis kantsu.  Pëwan llapan juknölla këkaqkunaqa manam jutsata rurar kayantsu; pipis jutsata rurar kaqqa manam pëta rikashqatsu ni pëta reqintsu.  Kuyashqa wamrakuna, paqtataq pipis pantatsiyäshunkiman; alli kaqkunata ruraq kaqqa, alli kaqta ruraq nunam, pëpis alli kaqta ruraq kanqannö.  Jutsata rurar kakoq kaqqa, Diablupitam shamun, porqui Diabluqa qallanampitam* jutsata rurar këkashqa. Tsërëkurmi Diospa Tsurinqa shamurqan, Diablupa rurëninkunata chipyëpa ushakätsinampaq.  Diospita llapan yurishqa kaqkunaqa manam jutsata rurartsu kayan, porqui Pëpa murunmi* pëchö imëpis këkan, y manam jutsata rurar këta puëdintsu, porqui Diospitam yurishqa. 10  Diospa tsurinkuna kayanqan o Diablupa tsurinkuna kayanqanqa këchömi cläru rikakärin: pipis alli kaq rurëkunata mana ruraq kaqqa, manam Diospitatsu shamun, jina creikoq mayinta* mana kuyaq kaqpis. 11  Porqui kë willakïtam qamkunaqa qallanampita patsë wiyayarqunki, juknintsik juknintsik kuyanakunapaq kaqta; 12  manam Cainnöqa kashwantsu, pëqa Satanaspitam* shamurqan y mana ankupashpam* wawqinta wanuratsirqan. ¿Y imanirtaq mana ankupashpa wanuratsirqan? Porqui rurëninkunaqa alläpa mana allim karqan, peru wawqimpa kaqkunaqa alli kaq rurëkunam karqan. 13  Wawqikuna y panikuna, ama espantakuyëtsu mana cäsukoq nunakuna chikiyäshunqëkipita. 14  Noqantsikqa musyantsikmi wanïpita kawëman pasashqa kanqantsikta, porqui llapan creikoq mayintsikkunatam* kuyantsik. Creikoq mayinkunata mana kuyaq kaqqa wanushqam këkan. 15  Pipis creikoq mayinta* chikeq kaqqa wanutsikoqmi. Y qamkunaqa musyayankim pipis wanutsikoq kaqqa imëyaqpis kawakïta mana chaskinampaq kaqta. 16  Kërëkurmi kuyakoq këta reqirquntsik, porqui pëmi noqantsikrëkur kawëninta* qorqan, y noqantsikqa creikoq mayintsikkunarëkur* kawënintsikta* qonapaqmi obligädu këkantsik. 17  Peru sitsun pipapis kawanampaq imëkan kapunqa, y creikoq mayin* pishipakoqta rikanqa, peru tsënö kaptimpis ankupëta* munanqatsu, tsëqa, ¿imanöparaq Diosta kuyë pëchö këkanman? 18  Kuyashqa wamrakuna, ama parlënintsikllawanqa ni shimillapaqa kuyakoq kashuntsu, sinöqa rurënintsikwan y shonqupita patsë. 19  Tsënömi musyashun rasumpa kaqpita shamunqantsikta, y shonquntsikchömi següru kashun* Dios kuyamanqantsikta 20  imapitapis shonquntsik acusamashqa, porqui Diosqa shonquntsikpitapis mas jatunmi y llapantam musyan. 21  Kuyashqa wawqikuna y panikuna, shonquntsik mana acusamashqaqa, mana mantsakushpam Dioswan parlëta puëdintsik; 22  y imatapis mañakunqantsiktam pëpita chaskishun, porqui mandakïninkunatam wiyakïkantsik y pëta kushitsinqan kaqkunatam rurëkantsik. 23  Rasumpa kaqchöqa këmi pëpa mandakïnin: Tsurin Jesucristupa jutinmanmi markäkunantsik* y juknintsik juknintsikmi kuyanakunantsik, kikin juk mandakïta qomanqantsiknö. 24  Jinamampis, Diospa mandakïninkunata wiyakoq kaqqa, Dioswanmi juknölla imëpis këkan, y Diosmi pëwan juknölla këkan. Y pë qomanqantsik santu espïrituwanmi musyantsik pë noqantsikwan juknölla imëpis këkanqanta.

Päginapa ura kuchunchö willakïkuna

Kënöpis niyanmi: yärakur.
O: “qallanqampita patsëmi”.
Juk parlakïchöqa, jeqëta o wayïta puëdeq muru.
Griëgu idiömachöqa “wawqinta” ninmi.
Griëgu idiömachöqa “alläpa mana allipitam” ninmi.
Kënöpis niyanmi: mana llakipaypam.
Griëgu idiömachöqa “wawqintsikkunatam” ninmi.
Griëgu idiömachöqa “wawqinta” ninmi.
O: “almanta”. Rikäri “Käyitsikïkuna” nishqanta.
Griëgu idiömachöqa “wawqintsikkunarëkur” ninmi.
O: “almantsikta”. Rikäri “Käyitsikïkuna” nishqanta.
Griëgu idiömachöqa “wawqin” ninmi.
Kënöpis niyanmi: llakipayta.
O: “shonquntsikta käyitsishun; shonquntsikta creitsishun”.
Kënöpis niyanmi: yärakunantsik.