Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Corintius 9:1-27

IMAKUNA KANQAN

  • Pablupa apostolnö rurëninta qatinapaq (1-27)

    • “Törumanqa jäkiman churankimantsu” (9)

    • “¡Allaw noqallä tsë alli willakïkunata mana willakuptïqa!” (16)

    • Tukïläya nunakunarëkur imëkaman tikrë (19-23)

    • Kawëpaq cörrichö llapanchö controlakïta yachë (24-27)

9  ¿Manaku noqaqa libri kä? ¿Manaku apostol kä? ¿Manaku Señornintsik Jesusta rikashqa kä? ¿Manaku qamkunaqa Señorchö rurënïkuna kayanki?  Wakinkunapaq apostol mana karpis, ¡qamkunapaqqa rasumpam apostol kä! Porqui qamkunam Señorchö apostol kanqäta rikätsikoq sëllu kayanki.  Juzgamaqnïkunapita defendikurmi kënö nï:  mikuyänäpaq y upuyänäpaq derëchuyoqmi* kayä, ¿aw?  Wakin kaq apostolkunanö, Señorpa wawqinkunanö y Cëfasnöpis,* ¿derëchuyoqmi kayä creikoq warmiyoq kayänäpaq* y yanaqäyämänampaq, aw?  ¿O Bernabëwan noqallaku derëchuyoqtsu kayä trabajapakïta jaqiyänäpaq?  ¿Pitaq soldädunö imëllapis sirwin gastunkunata kikin pagakur? ¿Pitaq üvasta plantan y wayunqanta mikuntsu? ¿O pitaq animalkunata mitsin y mitsinqan animalkunapa lichinta ichikllatapis upuntsu?  ¿Rasumpaku këkunata nikä nunakunapa pensëninmannölla? ¿O manaku tsëkunata Leypis nin?  Porqui Moises qellqanqan leychömi kënö qellqarëkan: “Manam ërachö gränuta jalïkaq* törumanqa jäkiman churankimantsu”. ¿Törukunamanku Diosqa yarpachakun? 10  ¿O rasumpa kaqchöqa noqantsikrëkurku tsënö nin? Rasumpa kaqchöqa, tsënöqa qellqashqa këkan noqantsikrëkurmi, porqui yapyaq nunaqa y jalutseq nunaqa ichikllatapis chaskinampaq kaqta shuyararmi trabajayänan. 11  Noqakuna Diospa kaqkunata qamkunachö murushqa këkarqa, ¿alläpataku qamkunapita mañakuyä kayäpushunqëkikunawan* yanapayämänëkita shuyar? 12  Wakin nunakuna qamkunapita chaskiyänampaq derëchuyoq këkäyaptinqa, ¿manaku noqakunaqa mas derëchuyoqraq kayä? Tsënö kaptimpis, manam tsë derëchükunata* välitsiyarqötsu, sinöqa imëkatam aguantayä, tsënöpa Cristupita alli willakïkunata noqakuna ni imanöpapis mana atajayänäpaq. 13  ¿Manaku qamkunaqa musyayanki sagrädu rurëkunayoq nunakunaqa templuchö sagrädu mikïkunata mikuyanqanta, y altarchö imëpis sirweqkunaqa altarchö ofrendayanqampita wakin kaqta chaskiyanqanta? 14  Jina tsënöllam Señorqa mandakurqan, alli willakïkunata willakoqkuna, alli willakïkunapita kawayänampaq. 15  Peru noqaqa manam ni mëqantapis tsë derëchükunataqa kikïpaq välitsirqötsu. Rasumpa kaqchöqa, kë cösaskunataqa manam noqapaq tsëkunata rurayämunëkipaqtsu qellqamurqö, porqui mas alliqa kanman wanukunämi... ¡manam ni pï nunapis imapita alabakunäpaq kaqkunataqa qochimanqatsu!* 16  Kananqa, sitsun alli willakïkunata willakü, tsëqa manam alabakunäpaqtsu, porqui tsëtaqa imanö karpis ruranämi. Rasumpa kaqchöqa, ¡allaw noqallä tsë alli willakïkunata mana willakuptïqa! 17  Sitsun tsëkunata gänas gänaslla rurashaq, tsëqa premiuyoqmi kashaq; peru mana munëkar rurarpis, tsënö karpis mayural kë cargutam chaskirqö. 18  Tsëqa, ¿imataq premiü? Alli willakïkunata willakurqa, alli willakïkunata debaldi willakïmi, tsënöpa alli willakïkunata willakunqäpita autoridäyoq* kënïta chipyëpaqa mana inshinäpaq.* 19  Porqui ni mëqan nunapa esclävun mana karpis, llapankunapa esclävunmi tikrarqö, tsënöpa puëdinqämannö mëtsikaq nunakunata yanapanäpaq. 20  Judïu kaqkunapaqqa, juk judïunömi tikrarqä, tsënöpa judïukunata yanapanäpaq; leypa mandädunchö këkaqkunapaqqa, leypa mandädunchö këkaqnömi tikrarqä, kikï leypa mandädunchö mana këkarpis, tsënöpa leypa mandädunchö këkaqkunata yanapanäpaq. 21  Leypa mandädunchö mana këkaqkunapaqqa, leypa mandädunchö mana këkaqnömi tikrarqä, Diospa rikëninchö leyninnaq mana këkarpis, sinöqa Cristupa leynimpa mandädunchö këkar, tsënöpa leypa mandädunchö mana këkaqkunata yanapanäpaq. 22  Dëbil kaqkunapaqqa dëbilmi tikrarqä, tsënöpa dëbil kaqkunata yanapanäpaq. Tukïläya nunakunarëkurmi imëkaman tikrarqö, tsënöpa puëdinqämannö imëkanöpapis wakinkunata salvanäpaq. 23  Peru alli willakïkunarëkurmi llapan imëkatapis rurä, tsënöpa wakinkunatapis willanäpaq. 24  ¿Manaku qamkunaqa musyayanki juk carrërachöqa llapan ëqeqkuna* ëqiyanqanta, peru jukllaqlla premiuta chaskinqanta? Ëqiyë tsëta ganayänëkipaqnö. 25  Juk gananakïchö llapan gananakoqkunaqa llapanchömi controlakïta yachayan. Rasumpa kaqchöqa, pëkunaqa ushakäreqlla corönata chaskiyänampaqmi tsëta rurayan, peru noqantsikqa mana ushakaq kaqpaqmi. 26  Tsëmi imanöpis ëqikanqäqa manam mëmampis mana chänäpaqnötsu; imanöpis kutëkanqäqa manam vientuta kutëkaqnötsu; 27  tsëpa rantinqa, allim cuerpüta tsarä* y imëka esclävutanömi pushä, tsënöpa wakinkunata willarir, kikï imanöpapis mana alli rikashqa* mana kanäpaq.

Päginapa ura kuchunchö willakïkuna

Griëgu idiömachöqa “autoridäyoqmi” ninmi.
Pëdru jutiwampis reqiyaqmi.
O: “creikoq pani warmïkuna kanampaq”.
Kënöpis niyanmi: jaruykaptin.
Kënöpis niyanmi: kapuyäshunqaykikunawan.
O: “autoridänïkunata”.
Kënöpis niyanmi: qechumanqatsu.
O: “derëchuyoq”.
Kënöpis niyanmi: utilizänäpaq.
Kënöpis niyanmi: cörreqkuna.
O: “castigä; sinchipa yachatsï”.
O: “qarqushqa”.