Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Corintius 8:1-13

IMAKUNA KANQAN

  • Imäginkunapaq ofrendayanqan mikïkuna (1-13)

    • Noqantsikpaqqa juk Diosllam kan (5, 6)

8  Kananqa, imäginkunapaq ofrendayanqan mikïkuna asuntupaqmi qellqamü: llapantsikmi musyantsik tsë asuntupitaqa. Musyaq këqa precisaq tukïmanmi chätsikun, peru kuyakïqa kallpatam qokun.  Sitsun pipis imatapis musyanqanta pensan, tsëqa manaran alleqllaqa musyanraqtsu.  Peru sitsun pipis Diosta kuyan, tsëqa Diosqa pëta reqinmi.  Kananqa, imäginkunata ofrendashqa mikï asuntuchöqa, musyantsikmi juk imäginqa mana imapis kanqanta, y jukllëlla Diospita masqa mana kanqanta.  Porqui dioskuna nir reqishqa kaqkuna ciëluchö o patsachö kaptimpis, imanöllam mëtsikaq “dioskuna” y mëtsikaq “señorkuna” kan,  rasumpa kaqchöqa, noqantsikpaqqa juk Diosllam kan, Teyta kaq, pëpam llapan imëkakuna y noqantsikpis pëpaqmi kantsik; y juk Señorllam kan, Jesucristu, përëkurmi llapan imëkakuna kayan y noqantsikpis përëkurmi kantsik.  Tsënö kaptimpis, manam llapankunatsu tsëta musyayan. Peru wakinkunaqa puntata imäginkunata adorashqa karmi, imäginpaq ofrendashqatanö mikïta mikuyan y concienciankunaqa dëbil karmi rakchatakärin.*  Peru mikïqa manam Diosman wititsimäshuntsu; mana mikurqa manam chipyëpa mana allitsu kashun, y mikurpis manam mas allitsu kashun.  Peru mäkoq mäkoqlla* kayë imatapis akrayänëkipaq derëchuyoq kayanqëki, dëbil kaqkunapaq trompisatsikoq rumi mana kanampaq. 10  Porqui tsëta musyëkar imäginkunapa templunchö mikïkaqta pipis rikäshuptikiqa, tsëqa, ¿manatsuraq dëbil këkaqpa conciencian chukruyätsishqa kanqa y imäginkunapa templunchö ofrendashqa mikïta mikur qallëkunqa? 11  Tsëmi musyënikirëkur dëbil këkaq nunapa markäkïnin* ushakärin, Cristu përëkur wanunqan creikoq mayikipa markäkïnin. 12  Qamkuna creikoq mayikikunapa contran tsënö jutsallakurqa y pëkunapa dëbil këkaq conciencianta nanatsirninqa,* Cristupa contranmi jutsallakïkäyanki. 13  Tsëmi, sitsun mikunqä creikoq mayïta ishkitsinqa, tsëqa mananam ni imëpis ëtsata mikushaqnatsu, tsënöpa creikoq mayïta mana ishkitsinäpaq.

Päginapa ura kuchunchö willakïkuna

Kënöpis niyanmi: qanratärin.
Kënöpis niyanmi: mayaq mayaqlla.
Kënöpis niyanmi: yärakuynin.
Kënöpis niyanmi: llakitsirninqa.