Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Corintius 7:1-40

IMAKUNA KANQAN

  • Casädu kaqkunapaq y mana casädu kaqkunapaq consëju (1-16)

  • Imanöpis këkar qayashqa kanqanchö, tsëchö imëpis katsun (17-24)

  • Mana casädu kaqkuna y viudakuna (25-40)

    • Soltëru kë imachö yanapakunqan (32-35)

    • “Señorllachö” casakï (39)

7  Kananqa, qamkuna qellqayämanqëki asuntukunachöqa, mas alliqa warmita ollqu mana yatananmi;*  peru rakcha* rurëkuna* mirashqa kaptinmi niyaq, cada nunapa warmin kaputsun y cada warmipa qowan* kaputsun.  Qowa kaqqa warminta wananqanta* qotsun,* y warmi kaqpis jina tsënölla qowanwan ruratsun.  Warmi kaqqa manam kikimpa autoridäninchötsu cuerpunta katsin, sinöqa qowanmi; jina tsënöllam qowa kaqpis kikimpa autoridäninchötsu cuerpunta katsin, sinöqa warminmi.  Ama mëqëkipis tsëtaqa michänakuyëtsu, michänakuyëqa ishkëki shumaq parlarir juk tiempupa kanan kaptinlla, Diosman mañakur kayänëkipaq y tsëpitaqa yapë juntakäyänëkipaq parlashqa karlla, tsënöpa peqëkikunata* alleq tsarëta mana puëdiyaptiki Satanas tentayäshurniki mana sïguinampaq.  Tsënö kaptimpis, tsënö rurayänëkita jaqiyarnikim tsëtaqa niyaq, manam mandayarnikitsu.  Peru noqaqa llapan nunakuna noqa kanqänö kayänantam munäman. Tsënö kaptimpis, cada ünupam Diospita qarënin kapun, jukpam kënöpa, jukpanam waknöpa.  Y mana casakushqa kaqkunata y viudakunatanam, noqanö kakuyänan mas alli kanqanta nï.  Peru peqankunata tsarëta mana puëdirqa, casakïkuyätsun, porqui achachapäkur kakïpitaqa, casakïmi mas alli. 10  Casädukunatam mandä —peru manam noqatsu, sinöqa Señormi— warmiqa qowampita mana rakikäkurinampaq. 11  Peru rakikäkurirninqa mana casakushpa kakutsun, o mana tsëqa qowanwan amishtatsun; y qowaqa manam warminta jaqirinmantsu. 12  Peru wakinkuna kaqtam nï —awmi, noqa, manam Señortsu—: sitsun mëqan wawqipapis mana creikoq warmin kapunqa, y warmin pëwan tärarnin sïguita munanqa, tsëqa ama jaqiritsuntsu; 13  y warmi kaq mana creikoq qowayoq karqa, y qowan pëwan tärarnin sïguita munaptinqa, ama qowanta jaqiritsuntsu. 14  Porqui mana creikoq qowaqa warminrëkurmi Diospa rikëninchö limpiu këman chan, y mana creikoq warmiqa wawqirëkurmi Diospa rikëninchö limpiu këman chan; mana tsënö kaptinqa, wamrankunaqa Diospa rikëninchö rakchachi* kayanman, peru kananqa Diospa rikëninchö limpium kayan. 15  Peru mana creikoq kaq ëwakïta* munarqa, ëwakutsun; tsë cäsuchöqa wawqiqa o paniqa manam obligädutsu pëwan sïguinampaq; tsëpa rantinqa, Diosqa yamë këmanmi qamkunata qayayäshurqunki. 16  Porqui, warmi, ¿imanötaq musyanki qowëkita mana salvanëkipaq kaqta? O, ollqu, ¿imanötaq musyanki warmikita mana salvanëkipaq kaqta? 17  Tsënö kaptimpis, Jehovä* cada ünuta qonqanmannö, tsënölla Dios qayanqanmannö cada ünu puritsun. Y tsënömi kë mandakïta llapan creikoqkunata* qö. 18  ¿Penqëninchö señalashqana* këkarku mëqan nunapis qayashqa kashqa? Tsëqa ama penqëninchö señalashqa këninta mana kaqpaq churatsuntsu. ¿Penqëninchö manaraq señalashqa këkarku mëqan nunapis qayashqa kashqa? Tsëqa ama penqëninchö señalakutsuntsu. 19  Penqëninchö señalashqa* këqa manam precisantsu, jina penqëninchö mana señalashqa këqa manam precisantsu; precisanqa Diospa mandakïninkunata wiyakïmi. 20  Imanöpis këkar qayashqa kanqanchö, tsëchö imëpis katsun. 21  ¿Sirwipakoq këkarku qayashqa karqunki? Tsëqa, ama jaqitsu tsë yarpakachätsishunëkita;* peru libri këta puëdirqa, tsëqa libri këta ashi. 22  Porqui pipis sirwipakoq këkar Señorchö qayashqa karqa, Señorpaqmi libri tikrarin; jina tsënöllam pipis libri nuna këkar qayashqa karqa, Cristupa sirweqnin tikrarin. 23  Qamkunaqa chaniyoqchömi rantishqa kayarqunki; jaqiyëna nunakunapa sirweqninkuna tikrëta. 24  Imanöpis këkar qayashqa kayanqëkichö, wawqikuna y panikuna, Diospa rikëninchö tsëchö imëpis kayë. 25  Kananqa, soltëru kaqkunapaqqa* manam ima mandakïtapis Señorpita chaskirqötsu, peru markäkïpaq* kanäpaq ankupäkoq* këninta Señor rikätsimashqa kaptinmi kikï pensanqäta nï. 26  Tsëmi, kanan witsankuna sasa tiempukuna kaptin, nunakuna këkäyanqannölla kayänan mas alli kanqanta pensä. 27  ¿Warmiyoqku kanki? Tsëqa ama libri këta procurar sïguitsu. ¿Warminnaqku kanki? Tsëqa warmiyoq këta ashir sïguitsu. 28  Peru casakurpis, manam ni ima jutsatapis rurankitsu. Y soltëru* nuna casakurqa, tsë nunaqa manam ni ima jutsatapis rurantsu. Tsënö kaptimpis, casakoq kaqkunaqa kawëninkunachömi* mëtsika sufrimientukunayoq kayanqa. Peru noqaqa tsëkunapa mana pasayänëkipaqmi previnikäyaq. 29  Jinamampis këtam niyaq wawqikuna y panikuna: quedaq tiempuqa alläpa wallkallanam. Kanampita patsëqa, warmiyoq kaqkunaqa warminnaqnö kayë, 30  y waqaq kaqkunaqa, mana waqaq kaqkunanö kayë, y alläpa kushishqa kaqkunaqa, mana kushishqa kaqkunanö kayë, y ranteq kaqkunaqa, imannaq kaqkunanö kayë, 31  y munduta* insheq* kaqkunaqa, munduta* mana chipyëpa insheq kaqkunanö kayë; porqui kë munduchö* pasakïkanqankunaqa cambiarëkanmi. 32  Rasumpa kaqchöqa, yarpachakïyoq këpita libri kayänëkitam munä. Mana casakushqa nunaqa Señorpa kaqkunapaqmi yarpachakun, Señorta imanö kushitsinampaq kaqman. 33  Peru casakushqa nunaqa, munduchö* cösaskunapaqmi yarpachakun, warminta imanö kushitsinampaq kaqman, 34  y shonqunchömi rakikashqa këkan. Jinamampis, mana casakushqa warmiqa —jina doncëllapis— Señorpa kaqkunapaqmi yarpachakun, tantu cuerpunchö y pensëninchö santu kanampaq. Peru casakushqa warmiqa munduchö* cösaskunapaqmi yarpachakun, qowanta* imanö kushitsinampaq kaqman. 35  Peru tsëtaqa niyaq kikikikunapa biennikikunapaqmi, manam michäyarnikitsu,* sinöqa alli kaqta rurayänëkipaq y imamampis mana yarpachakurnin Señorta llapan shonqïkikunawan imëpis sirwiyänëkipaq yanapayarnikim. 36  Peru sitsun pipis mana casakushqa karnin* mana alli portakïkanqanta pensan, y wëta cuenta jövin këninta pasarishqana kanqa, tsëqa këtam ruranan: imatapis munanqanta ruratsun; manam jutsallakuntsu. Casakuyätsun. 37  Peru sitsun pipis shonqunchö churapakashqa y ni imatapis wanantsu, sinöqa munëninta tsarëta puëdin,* y mana casakurlla* kanampaq shonqunchö churapakashqa, tsëqa allitam ruranqa. 38  Jina tsënöllam casakoq kaqpis allita ruran, peru mana casakoq kaqqa mas allitaran ruranqa. 39  Warmiqa qowan* kawanqanyaqqa manam libritsu jukwan casakunampaq. Peru sitsun qowan wanïchö punukärinqa, tsëqa librim këkan piwampis munanqan kaqwan casakunampaq, peru Señorllachö. 40  Peru noqapaqqa, këkanqannö sïguirmi pëqa mas kushishqa kanqa; y rasumpa kaqchöqa, noqapis Diospa santu espïritunyoq kanqätam pensä.

Päginapa ura kuchunchö willakïkuna

Juk parlakïchöqa, warmiwan mana oqllanakunanmi.
Kënöpis niyanmi: qanra.
Griëgu idiömachö: por·nëi·a. Rikäri “Käyitsikïkuna” nishqanta.
Kënöpis niyanmi: runan.
Kënöpis niyanmi: necesitanqanta.
Tsënö nirqa, casädu kawakïchö oqllanakïpaqmi parlëkan.
Kënöpis niyanmi: umaykikunata.
Kënöpis niyanmi: qanrachi.
O: “rakikëta”.
Rikäri “Käyitsikïkuna” nishqanta.
Griëgu idiömachöqa “congregacionkunata” ninmi. Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: yarpachakatsishunaykita.
Griëgu idiömachöqa “doncëllakunapaqqa” ninmi. Griëgu idiömachöqa tsënö nirqa soltëru warmikunapaqpis y ollqukunapaqpis kanmanllam.
Kënöpis niyanmi: yärakuypaq.
Kënöpis niyanmi: llakipäkoq.
Griëgu idiömachöqa “doncëlla” ninmi. Griëgu idiömachöqa tsënö nirqa soltëru warmikunapaqpis y ollqukunapaqpis kanmanllam.
Griëgu idiömachöqa “ëtsankunachömi” ninmi.
Rikäri “Käyitsikïkuna” nishqanta.
Kënöpis niyanmi: utilizaq.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: runanta.
Griëgu idiömachöqa “shawayarnikitsu” ninmi.
O: “soltëru këninchö”.
Griëgu idiömachöqa “munëninta autoridäninchö katsin” ninmi.
O: “soltërulla”.
Kënöpis niyanmi: runan.