Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Corintius 6:1-20

IMAKUNA KANQAN

  • Creikoq pura pleytukuna (1-8)

  • Diospa Gobiernunta mana chaskiyänampaq kaqkuna (9-11)

  • Diosta cuerpïkikunachö alabayë (12-20)

    • “¡Rakcha rurëkunapita escapakuyë!” (18)

6  Mëqëkipis kikikikunapura pleytuchö karqa, ¿imanirtaq cortikunaman apanakur mana alli kaqta ruraq nunakunapa nöpanman chätsinakuyanki, y santu nunakunamanqa mana?  ¿O manaku musyayanki santu nunakunaqa llapan nunakunata juzgayänampaq kaqta? Y llapan nunakunata qamkuna juzgayänëki këkaptinqa, ¿manaku puëdiyanki mana alläpa precisaq kaq asuntukunata juzguëta?  ¿Manaku qamkunaqa musyayanki angelkunata juzganapaq kaqta? Tsëqa, ¿imanir-raq kë vïdachö asuntukunataqa mana?  Tsëqa, kë vïdachö kayäpushunqëki* ima asuntupis juzgashqa kanan kaptinqa, ¿creikoqkuna* mana allipa rikäyanqan kaq nunakunataku juezkunatanö churëkäyanki?  Qamkuna penqakuyänëkipaqmi parlëkä. ¿Manaku qamkunachöqa ni jukllaqllapis yachaq nuna kan, kikikikunapura imapis kaptin juzganampaq?  Tsëpa rantinmi, juk creikoq, creikoq mayimpa contran cortikunaman ëwan, ¡y tsëpis mana creikoqkunapa nöpanman!  Rasumpa kaqchöqa, jukniki juknikikuna pleytukunachö kayanqëkiwanqa penqapashqa këmanmi chäyarqunki. ¿Imanirtaq tsëpa rantinqa mana allita rurayäshunëkita jaqiriyankitsu? ¿Imanirtaq engañayäshunëkita jaqiriyankitsu?  Tsëpa rantinqa, qamkunam mana allikunata rurayanki y engañayanki, ¡tsëpis creikoq mayikikuna këkäyaptin!  ¿Manaku musyayanki mana allita ruraqkunaqa Diospa Gobiernunta mana chaskiyänampaq* kaqta? Ama pantayëtsu.* Rakcha ruraqkuna,* imägin adoraqkuna, mana majanwan oqllanakoqkuna, ollqu mayinkuna oqllayänanta jaqeqkuna, ollqu mayinkunata oqllaqkuna,* 10  suwakoqkuna, imatapis ërayëpa munaqkuna, machakoqkuna, ashakoqkuna,* y amenazäkur imatapis jorqapäkoqkunaqa* manam Diospa Gobiernunta herenciatanö chaskiyanqatsu. 11  Peru tsënö kaptimpis, qamkunapita wakinnikikunaqa tsënömi kayarqëki. Peru qamkunaqa limpiuyätsishqam kayarqunki; qamkunaqa santuyätsishqam* kayarqunki; qamkunaqa Señor Jesucristupa jutinchömi y Diosnintsikpa santu espïritunwanmi alli kaqta ruraqnö rikashqa kayarqunki. 12  Llapan imëkapis noqapaqqa allillam kayan, peru manam llapan imëkatsu allipaq kayan. Llapan imëkapis noqapaqqa allillam kayan, peru manam jaqishaqtsu imapis makinchö katsimänanta.* 13  Mikïqa pachapaqmi, y pachaqa mikïpaqmi, peru ishkantapis Diosqa chipyëpam ushakäratsinqa. Cuerpuqa manam rakcha* rurëkunapaqtsu,* sinöqa Señorpaqmi, y Señorqa cuerpupaqmi. 14  Peru Diosqa Señorta sharkatsimurqanmi y tsënöllam noqantsiktapis wanushqa këkanqantsikpita poderninwan sharkatsimäshun. 15  ¿Manaku musyayanki cuerpïkikunaqa Cristupa cuerpunchö këkaqkuna kanqanta? Tsëqa, ¿Cristupa cuerpunchö këkaqkunatatsuraq jorqarishaq, y jukwan jukwan kakoq warmipa cuerpuntawantsuraq juntarishaq? ¡Tsëqa manam ni imanöpapis kanmantsu! 16  ¿Manaku musyayanki jukwan jukwan kakoq warmiwan oqllanakoqqa, pëwan juk cuerpulla tikrarinqanta? Porqui “ishkanmi juk ëtsallana kayanqa” ninmi pëqa. 17  Peru Señorwan juknölla tikraq kaqqa, imanö pensanqanchömi pëwan juknölla kayan. 18  ¡Rakcha rurëkunapita escapakuyë!* Juk nuna imatapis juk jutsata ruranqanqa manam cuerpunchötsu këkan, peru rakcha rurëkunata rurar kakoq kaqqa, kikimpa cuerpumpa contranmi jutsata ruran. 19  ¿Manaku musyayanki cuerpïkikunaqa Dios qoyäshunqëki qamkunachö këkaq santu espïritupa templun kanqanta? Jinamampis manam kikikikunapatsu kayanki, 20  porqui chaniyoqchömi rantishqa kayarqunki. Tsëqa, Diosta cuerpïkikunachö alabayë.

Päginapa ura kuchunchö willakïkuna

Kënöpis niyanmi: kapuyäshunqëki.
Griëgu idiömachöqa “congregacion” ninmi. Rikäri “Käyitsikïkuna” nishqanta.
Griëgu idiömachöqa “heredayänampaq” ninmi.
O: “ama engañakuyëtsu”.
Griëgu idiömachö: por·nëi·a. Rikäri “Käyitsikïkuna” nishqanta.
O: “ollquwan oqllanakoq ollqukuna”. Griëgu idiömachöqa “ollquwan pununakoq ollqukuna” ninmi.
Kënöpis niyanmi: insultakoqkuna.
Kënöpis niyanmi: qechukoqkunaqa.
O: “Diospaq rakishqam”.
O: “dominamänanta”.
Kënöpis niyanmi: qanra.
Griëgu idiömachö: por·nëi·a. Rikäri “Käyitsikïkuna” nishqanta.
Kënöpis niyanmi: qeshpiyay; safakuyë.