Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Corintius 5:1-13

IMAKUNA KANQAN

  • Rakcha rurë kanqan (1-5)

  • Wallka levadüralla llapan masata poquratsin (6-8)

  • Alläpa mana allita ruraq nunaqa jorqashqam kanan (9-13)

5  Rasumpa kaqchöqa, qamkunachö rakcha* rurë kanqantam willakuyan, y tsënö rakcha rurëqa manam ni juk nacion nunakunachöpis kantsu: juk nunash teytampa warminwan yachëkan.*  ¿Y qamkunaqa tsë rurëpita kushishqaku këkäyanki? ¿Manaku tsëpa rantinqa alläpa llakikuyankiman, tsënöpa tsëta ruraq nuna qamkunapita jorqashqa kanampaq?  Noqa qamkunawan mana këkarpis, pensënïchöqa* qamkunawanmi këkä, y noqaqa imëka qamkunawan këkaqnömi tsëta rurashqa nunata juzgarqöna.  Qamkuna juntu ëllurëkäyaptikiqa,* pensënïmi Señornintsik Jesuspa poderninwan juntu qamkunawan këkan. Tsëmi Señornintsik Jesuspa jutinchö  qamkunaqa tsë nunata Satanasta entregayänëki, tsë nunapa muyakoq mana alli rurënin ushakätsishqa kanampaq, tsënöpa Señorpa junaqninchö creikoqkunapa juknölla pensënin salvashqa kanampaq.  Manam allitsu alabakuyanqëkiqa. ¿Manaku musyayanki wallka levadüralla llapan masata poquratsinqanta?  Jorqayë levadürayoq këkaq unë kaq masata, tsënöpa mushoq masa kayänëkipaq, mana poqushqa masa. Porqui rasumpa kaqchöqa, Pascua fiestachö wanutsina achkasnintsik* Cristuqa ofrendanömi wanutsishqa kashqa.  Tsëqa, fiestata cumplishun, peru ama levadürayoq unë kaq masawanqa, ni levadüra cuenta mana alli rurëwan y alläpa mana alli këwanqa, sinöqa, levadürannaq tanta cuenta derëchu nuna këwan y rasumpa kaqwan.  Pasaq kaq cartäta qellqamurmi niyarqaq rakcha* ruraq nunakunawan juntakïta jaqiyänëkipaq, 10  y tsënö nirqa, manam kë munduchö* rakcha ruraq nunakunawan, o imëkatapis ërayëpa munaqkunawan, o suwakoqkunawan, o imäginkunata adoraqkunawan chipyëpa mana juntakuyänëkipaqtsu nikäyarqaq. Tsënö kanan kaptinqa, qamkunaqa kë munduchö* nunakunapitachi chipyëpa rakikäkuriyankiman. 11  Peru kananqa qamkunaman qellqëkämü, pipis creikoq mayikikuna kanqanta nikar, rakcha ruraq, o imëkatapis ërayëpa munaq, o imäginkunata adoraq, o ashakoq,* o machakoq, o suwakoq kaptinqa, pëwan manana juntakuyänëkipaqmi, y tsë nunawanqa ama ni mikuyëllapistsu. 12  Porqui, ¿imanöpataq noqaqa mana creikoq kaqkunata juzgar käman? ¿Manaku qamkuna creikoq kaqkunata juzgayanki, 13  y mana creikoq kaqkunatana Dios juzgan? “Alläpa mana allita ruraq nunata qamkunapita jorqayë.”

Päginapa ura kuchunchö willakïkuna

Kënöpis niyanmi: qanra.
Kënöpis niyanmi: kawëkan.
Griëgu idiömachöqa “espïrituchöqa” ninmi.
Kënöpis niyanmi: qoriraykäyaptikiqa.
Kënöpis niyanmi: ashkashnintsik.
Kënöpis niyanmi: qanra.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: insultakoq.