Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Corintius 3:1-23

IMAKUNA KANQAN

  • Corintuchö cristiänukuna mana cäsukoq nunakunanö pensar sïguiyan (1-4)

  • Diosmi winatsir sïguin (5-9)

    • Diospa minkankuna (9)

  • Mana kayakaqkunawan sharkatsi (10-15)

  • Qamkunaqa Diospa templunmi kayanki (16, 17)

  • Nunakunapa yachëninqa, Diospaqqa manam ni imapaqpis sirwintsu (18-23)

3  Tsëmi wawqikuna y panikuna, qamkunataqa santu espïritu pushanqan nunakunatanö parlapäyënikita puëdirqätsu, sinöqa mana cäsukoq nunakunanö pensaqkunatanömi, Cristupa kaqchö llullukunatanö.  Lichitam qoyarqaq, y manam chukru mikïtatsu, porqui manam alli sinchiraqtsu kayarqëki. Rasumpa kaqchöqa, kanampis manam alli sinchiraqtsu kayanki,  porqui qamkunaqa mana cäsukoq nunakunanöllaran pensëkäyanki. Kikikikunapura chikinakur y pleytukur karninqa, ¿manaku mana cäsukoq nunakunanö pensëkäyanki, y manaku nunakuna puriyanqannö purikäyanki?  Porqui jukniki, “noqaqa Pablupam kä”, y juknikina, “noqanam Apöluspa kä” nirqa, ¿manaku wakin nunakunanölla portakïkäyanki?  Porqui ¿imataq Apölusqa? Awmi, ¿imataq Pabluqa? Creikoq këman chäyänëkipaq yanapayäshoqniki sirwipakoqkunallam, cada ünuta Señor permitinqanmannö.  Noqam plantarqä, Apölusmi parqurqan,* peru Diosmi winatsir sïguirqan.  Tsëmi ni plantaqpis ni parqoqpis precisaqtsu kayan, sinöqa winatseq kaq Diosmi.  Tsënö kaptimpis, plantaqqa y parqoqqa juknöllam kayan,* peru cada nunam rurëninmannö premiun chaskinqa.  Porqui noqakunaqa Diospa minkankunam kayä. Qamkunaqa Diospa chakranmi kayanki, kikin trabajëkanqan chakra, Diospa wayin. 10  Dios alläpa alli këninta qomanqanmannömi, imëka alli yachaq obra ruraq maestrunö cimientuta patsätsirqä, peru pï karpis jukmi tsë cimientu jananchö shärikätsin. Peru cada ünu tsë cimientuchö imanö shärikätsinqanta alleq rikätsun. 11  Porqui manam ni pipis cimientu patsätsishqana këkaptinqa ni ima cimientutapis juktaqa patsätsita puëdintsu, tsë cimientuqa Jesucristum. 12  Peru pipis tsë cimientu jananchö, öruwan kar, pläta metalwan kar, alläpa shumaq rumikunawan kar, qeruwan kar, oqshawan kar, o päjawan karpis sharkatsiptinqa, 13  imanö rurashqa kanqantam cada ünupa rurënin rikätsikunqa, porqui pruëba junaqmi tsëqa rikakunqa, porqui ninawanmi imanö kanqan rikakushqa kanqa, y ninam rikätsikunqa cada ünu sharkatsinqan imanö rurashqa kanqanta. 14  Sitsun pipa rurënimpis, tsë cimientu jananchö sharkatsinqan rurënin alli tsarakunqa, tsëqa premiutam chaskinqa; 15  peru sitsun pipa rurënimpis chipyëpa kayakashqa kanqa, tsëqa llapantam oqrarinqa, peru kikinqa salvashqam kanqa; tsënö kaptimpis, salvashqa karqa, imëka ninapita salvashqanömi kanqa. 16  ¿Manaku musyayanki qamkunaqa Diospa templun kayanqëkita, y Diospa santu espïritun qamkunachö këkanqanta? 17  Pipis Diospa templunta ushakätsiptinqa, Diosmi pëta ushakätsinqa, porqui Diospa templunqa santum, y qamkunam tsë templu kayanki. 18  Ama pipis kikinta engañakur këkätsuntsu: sitsun qamkunapita pipis kanan imëkapis imanö këkanqanchö* yachaq kanqanta pensanqa, tsëqa mana yachaq tikratsun, tsënöpa rasumpa yachaq tikranampaq. 19  Porqui nunakunapa yachëninqa, Diospaqqa manam ni imapaqpis sirwintsu, porqui kënö nirmi qellqarëkan: “Yachaqkunatam tikrapun kikinkunapa yachëllapa pantatsikïninkunawan”. 20  Y yapëmi kënö nin: “Jehoväqa* musyanmi yachaqkunapa pensëninqa mana kaqlla kanqanta”. 21  Tsënö këkaptinqa, ama ni pipis nunakunapita alabakutsuntsu; porqui llapan imëkakunam qamkunapa kayan, 22  Pablu kar, o Apölus kar, o Cëfas* kar, o nunakuna, o kawë, o wanï, o kanan witsan cösaskuna, o shamoq witsan kaq cösaskunapis, llapanmi qamkunapa kayan; 23  jina tsënöllam qamkunapis Cristupa kayanki; y Cristunam, Diospa.

Päginapa ura kuchunchö willakïkuna

Kënöpis niyanmi: qarparqan.
O: “jukllatam ashiyan”.
O: “kanan witsanchö”. Rikäri “Käyitsikïkuna” nishqanta.
Rikäri “Käyitsikïkuna” nishqanta.
Pëdru jutiwampis reqiyaqmi.