Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

1 Corintius 10:1-33

IMAKUNA KANQAN

  • Israelta pasanqankuna noqantsik yachakunapaq kanqan (1-13)

  • Imäginkuna adorëpita cuidakunapaq (14-22)

    • Jehoväpa mësan y supëkunapa mësan (21)

  • Libri kë y wakinkunapaq yarpachakï (23-33)

    • “Dios alabashqa kanampaq llapan imëkatapis rurayë” (31)

10  Kananqa musyayänëkitam munä wawqikuna y panikuna, unë kastantsikkuna llapankuna pukutë jawanchö kayanqanta y llapankuna lamarpa pasayanqanta,  y llapankunam pukutë jawanchö karnin y lamarpa pasarnin Moiseschö bautizashqa kayarqan,  y llapankunam Dios qonqan kaq mikïllata mikuyarqan,  y llapankunam Dios qonqan kaq yakullata upuyarqan. Porqui pëkunata qatir ëwaqnö qaqapitam upuyarqan, tsë qaqatam pëkunata Dios qorqan, y tsë qaqaqa Cristu cuentam karqan.*  Tsënö kaptimpis, pëkunapita cäsi llapantam Diosqa mana allipa rikarqan, tsëmi tsunyaqchö* ushakätsishqa kayarqan.  Peru tsë cösaskunaqa noqantsik yachakunapaqmi pasakurqan, tsënöpa mana alli kaq cösaskunata mana munanapaq, pëkuna munayanqannö.  Ni imäginkunata adoraqkuna tikrashuntsu, pëkunapita wakinkuna rurayanqannö; kënö nir qellqarëkanqannö: “Mikoqmi y upyaqmi nunakuna täkuriyarqan. Tsëpitanam gozayänampaq sharkuriyarqan”.  Ni rakcha rurëkunata* rurar kashuntsu, pëkunapita wakin kaqkuna rakcha rurëkunata* rurayanqannö, tsënöpam juk junaqllachö, ishkë chunka kima waranqa (23.000) wanuyarqan.  Ni Jehoväta* pruëbaman churashuntsu, pëkunapita wakin kaqkuna pruëbaman churayanqannö, tsënöpam culebrakuna kaniyaptin wanuyarqan. 10  Ni wasa rimaq kashuntsu, pëkunapita wakin kaqkuna wasa rimaq kayanqannö, tsënöpam ushakätsikoqpa* makimpa wanuyarqan. 11  Y tsë cösaskunaqa pëkunata pasarqan noqantsik yachakunapaqmi, y noqantsik, imëkapis imanö këkanqankunapa ushëninchö këkaqkuna, atikashqa* kanapaqmi qellqashqa kayarqan. 12  Tsëmi shëkanqanta pensaq kaqqa mana ishkinampaq cuidakutsun. 13  Manam ni ima tentacionpis wakin nunakunaman mana chanqanqa qamkunaman chämushqatsu. Peru Diosqa markäkïpaqmi,* y manam jaqinqatsu tsarakïta puëdiyanqëkipita masqa tentashqa kayänëkita, tsëpa rantinqa tentacion kanqanmannömi yanapayäshunki tsëpita yarquyänëkipaq y tsarakïta puëdiyänëkipaq. 14  Tsëmi kuyashqa wawqikuna y panikuna, imäginkuna adorëpita escapakuyë.* 15  Alli tantiyaq nunakunatanömi noqaqa parlapëkäyaq; kikikikuna rikäyë noqa ninqä rasun o mana rasun kanqanta. 16  Bendicinqantsik bendicion cöpaqa, ¿manaku Cristupa yawarnimpita provëchuta jorqë? Pakinqantsik tantaqa, ¿manaku Cristupa cuerpumpita provëchuta jorqë? 17  Porqui juk tantallam kan, y noqantsikqa, mëtsikaq karpis juk cuerpullam kantsik, porqui llapantsikmi tsë jukllëlla tantapita mikuntsik. 18  Rikäyë Israel nunakunata:* altarman churayanqan pishtashqa ofrendakunata mikoq kaqkunaqa, ¿manaku Dioswan juntu mikïkaq cuenta kayarqan? 19  Tsëqa, ¿imatataq nikä? ¿Juk imäginpaq ofrendayanqan imapis kanqantaku, o juk imägin imapis kanqantaku? 20  Manam, peru juk nacion nunakuna ofrendayanqan cösaskunaqa, supëkunapaq ofrendashqa kanqantam niyaq, y manam Diospaqtsu; y supëkunawan juntakäyänëkitaqa manam munätsu. 21  Qamkunaqa manam Jehoväpa* cöpampita y supëkunapa cöpampita upur këta puëdiyankitsu; manam “Jehoväpa* mësampita” y supëkunapa mësampita mikur këta puëdiyankitsu. 22  ¿O ‘Jehoväpa* shonqunta puwatsitaku tïrëkantsik’? Noqantsikqa manam pëpita mas puëdeqtsu kantsik, ¿aw? 23  Llapan imëkapis allillam kayan,* peru manam llapan imëkatsu allipaq kayan. Llapan imëkapis allillam kayan, peru manam llapan imëkatsu kallpata qokuyan. 24  Cada ünu ashirnin sïguitsun ama kikimpa biennimpaq kaqllataqa, sinöqa juknin nunapapis biennimpaq kaqta. 25  Ëtsa qatoqkuna* rantikuyanqan ëtsataqa, concienciëkikunarëkur imatapis mana tapukurlla mikuyë, 26  porqui “Jehoväpam* patsa y tsëchö llapan kaqkuna”. 27  Sitsun pï mana creikoqpis convidayäshunki, y qamkuna ëwëta munayanki, tsëqa nöpëkikunaman imëkatapis churamunqanta mikuyë, concienciëkikunarëkur imapaqpis mana tapukushpa. 28  Peru sitsun mëqampis, “kë ëtsaqa imäginkunapaqmi ofrendashqa kashqa” niyäshunki, tsëqa ama mikuyëtsu, niyäshoqnikikunarëkur y concienciarëkur. 29  Tsënöqa nikä, manam concienciëkikunapaq parlartsu, sinöqa juk kaq nunapa concienciampaq parlarmi. Porqui, ¿imanirtaq libri kënï juk nunapa conciencianrëkur juzgashqa kanman? 30  Mikuptïpis, y mikunqäpita Diosta agradecikuptïpis, ¿allitsuraq tsëta ruräman wakinkuna tsërëkur noqapaq mana allita parlayänan kaptinqa? 31  Tsëmi, sitsun mikïkäyanki, o upïkäyanki o imatapis juk cösaskunata rurëkäyanki, Dios alabashqa kanampaq llapan imëkatapis rurayë. 32  Cuidädu kayë, tantu judïukunapaq y Grecia nunakunapaq* y Diospa creikoqninkunapaq* trompisatsikoq rumi mana tikrayänëkipaq, 33  noqa imëkachöpis llapan nunakunata kushitsita tïrëkanqänö, kikïpa biennïpaq kaqllata mana ashirnin, sinöqa mëtsikaqpa biennimpaq kaqta, tsënöpa salvakïta puëdiyänampaq.

Päginapa ura kuchunchö willakïkuna

O: “Cristum karqan”.
Kënöpis niyanmi: tsutsinchö.
Griëgu idiömachö: por·nëi·a. Rikäri “Käyitsikïkuna” nishqanta.
Griëgu idiömachö: por·nëi·a. Rikäri “Käyitsikïkuna” nishqanta.
Rikäri “Käyitsikïkuna” nishqanta.
Tsënö nirqa, itsa Diospa angelnimpaq parlëkan.
Kënöpis niyanmi: willapashqa.
Kënöpis niyanmi: yärakuypaqmi.
Kënöpis niyanmi: qeshpiyay; safakuyë.
Griëgu idiömachöqa “ëtsapita kaq Israelta” ninmi.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
O: “permitishqam kayan”.
Kënöpis niyanmi: rantikoqkuna.
Rikäri “Käyitsikïkuna” nishqanta.
O: “griëgukunapaq”. Tsënö nirqa, griëgu idiömata parlaq mana judïu nunakunapaqmi parlëkan. Rikäri “Käyitsikïkuna” nishqanchö “Griëgu” neqta.
Griëgu idiömachöqa “congregacionnimpaq” ninmi. Rikäri “Käyitsikïkuna” nishqanta.