Jehoväpa testïgunkunata dirigeqkunaqa wallkaqllam kayan y mëtsëchö këkaq Jehoväpa testïgunkunatam yanapayan. Pëkunaqa këkunata rurarmi yanapakuyan:

•   Publicacionkunachö, reunionkunachö y tukuyläya escuëlakunachö yarqamunampaq kaq yachatsikuykunata rikarninmi (Lücas 12:42).

•   Llapan nacionkunachö Testïgukuna Diospita yachatsikuyanqanta y voluntäninkunapita qellëta churakuyanqanta rikarninmi.

 Unë witsan “Jerusalenchö apostolkuna y anciänukuna” congregacionkunachö ima asuntutapis decidiyanqannöllam Jehoväpa testïgunkunata dirigeqkunaqa kanan tiempupis rurayan (Hëchus 15:2). Punta cristiänukunapaqa manam mandaqninkuna karqantsu, tsënöllam kanan witsampis Testïgukunata dirigeqkunaqa Jehoväpa sirweqninkunapa mandaqninkunatsu kayan. Pëkunaqa imatapis decidiyänampaqqa Biblia ninqantam cuentachö katsiyan y musyayanmi Diosnintsikqa Jesucristuta congregacionkunachö dirigeqnin kanampaq akranqanta (1 Corintius 11:3; Efesius 5:23).

¿Pikunatan kanan witsanchö kayan Jehoväpa testïgunkunata dirigeqkunaqa?

 Jehoväpa testïgunkunata dirigeqkunaqa kayan: Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane y Jeffrey Winder. Estädus Unïduschö këkaq Warwick markachömi pëkunaqa Testïgukunapa principal oficïnankunachö yanapakuyan.

¿Ima cargukunayoqtan Jehoväpa testïgunkunapa dirigeqninkuna kayan?

 Jehoväpa testïgunkunata dirigeqkunaqa joqta grüpukunatam patsätsiyashqa, y cada grüpuchö kaqkunam imëka trabäjukunata rikäyan. Testïgukunata dirigeqkunaqa cada ünum juk o mas grüpuchö yanapakuyan.

•   Imapis Pasanqanta Rikaqkuna. Kë grüpuchö yanapakoqkunam rikäyan Ley asuntukunata y altantum këkäyan ima desgraciapis kaptin jinan höra cristiänu mayinkunata yanapayänampaq. Y rikäyanmi creenciankunarëkur cristiänukunata autoridäkuna sufritsir michäyaptin imanö yanapayänampaq kaqta.

•   Yanapakoqkunata Rikaqkuna. Kë grüpuchö yanapakoqkunam rikäyan Betel wayikunachö yanapakoqkunata.

•   Publicacionkuna Kanampaq Rikaqkuna. Kë grüpuchö yanapakoqkunam rikäyan llapan publicacionkunata imprimiyänanta y më tsëman apatsiyänanta. Y rikäyanmi Diospita Yachatsikuyänan Wayikunata, traduciyänan wayikunata y Betel wayikunata rurayänanta.

•   Entëru Patsachö Diospita Yachatsikïta Rikaqkuna. Kë grüpuchö yanapakoqkunam rikäyan “Diospa Gobiernumpita alli noticiakunata entëru patsachö” willakuyanqanta (Mateu 24:14).

•   Yachakunapaq kaqta Rikaqkuna. Kë grüpuchö yanapakoqkunam rikäyan reunionkunachö yachakuyänampaq kaqta y tukuyläya escuëlakunachö yachakuyänampaq kaqta rurayämunqanta, tsënöllam rikäyan grabacionkunata y videukunata rurayämunqanta.

•   Yachakunapaq ruramoqkunata rikaqkuna. Kë grüpuchö yanapakoqkunam rikäyan publicacionkunachö y Internetchö imakuna yarqamunampaq kaqta. Y juk idiömaman traduciyanqanta rikäyänampaqpis encargädum kayan.

 Tsë grüpuchö yanapakoqkunaqa cada semänam juntakäyan Testïgukunata imanö mas yanapayänampaq kaqta rikäyänampaq. Tsë reunionkunachömi Bibliata alli estudiayan y santu espiritunwan Jehovä yanapanampaqmi mañakuyan. Y llapanmi kallpachakuyan juk acuerdullaman chäyänampaq (Hëchus 15:25).

Jehoväpa testïgunkunata dirigeqkunapa yanapaqninkuna

 Testïgukunata dirigeqkunapaqa yanapaqninkunam kan. Pëkunaqa kayan Jehoväta unëpana sirweq wawqikunam y allim musyayan trabäjunkunata imanö rurayänampaq kaqta (1 Corintius 4:2). Tsë yanapakoq wawqikunaqa Jehoväpa testïgunkunapa dirigeqninkuna cada semäna rurayanqan reunionkunamanmi ëwayan. Pëkunaqa imata mana decidirpis tsë reunionchöqa parlakuyta puëdiyanmi. Y Testïgukunata dirigeqkuna decidiyanqanmannömi imatapis rurayan. Testïgukunapa dirigeqninkunaqa, yanapaqninkunatam niyan juk nacionkunachö këkaq cristiänukunata watukaq ëwayänampaq. Y cada wata rurayanqan reunionchö o Galaad Escuëlachö yanapakuyänampaqmi invitayan.