Ri a Nicolas y Céline kʼax xkiriqo rumal che ri sucursal re Francia xubʼij chke che kebʼe pa jun chi congregación. Wajun kʼulaj riʼ kkibʼij ri xkinaʼo are chiʼ xebʼe pa ri jun chi congregación. «Nabʼe sibʼalaj xojkikotik, are kʼu chiʼ xqʼax ri tiempo xqamaj kibʼisoxik ri qamigos y ri qachalal che e kʼo pa ri kʼakʼ congregación majaʼ kqachʼobʼ más kiwach». a Rumal laʼ, ¿jas katutoʼo rech kukʼam awach pa ri kʼakʼ congregación? ¿Jas kkibʼan ri qachalal che kitoʼik ri kʼateʼ nabʼe mul kopan pa ri congregación? ¿Jas utzilal kariq at y ri qachalal are chiʼ kaya tobʼanik pa jun kʼakʼ congregación?

KAJIBʼ PIXABʼ CHE KATUTOʼO RECH KUKʼAM AWACH PA RI KʼAKʼ CONGREGACIÓN

1. Chakubʼsaj akʼuʼx chrij ri Jehová (Sal. 37:5). Kazumi, 20 junabʼ chik kpatanin pa ri congregación, are kʼu xukʼex ri ucongregación rumal che ri rachajil xbʼe pa jun chi tinamit rumal ri uchak. ¿Jas xubʼano rech xujach ri ukʼaslemal «pa uqʼabʼ ri» Jehová? Ri areʼ kubʼij: «Xinjaq ri wanimaʼ che ri Jehová y xinbʼij che kinxiʼj wibʼ rumal che kinnaʼo che xaq nutukel in kʼolik, ri Jehová amaqʼel xuya nuchuqʼabʼ».

¿Jas kattoʼwik rech más kakubʼsaj akʼuʼx chrij ri Jehová? Ri qakojonik kajunamataj rukʼ ri tikoʼn che kajwataj jaʼ y abono che rech kkʼiyik. Ri qachalal Nicolas che xojchʼaw kan chrij nabʼe, xchoman chrij ri kikʼutbʼal ri Jesús, Abrahán xuqujeʼ ri Pablo che xkiriq kʼax rumal che xkibʼan ri urayibʼal ri Dios, wariʼ xtobʼan che ri qachalal Nicolas rech qas kukojo che qas ktoʼ na rumal ri Jehová. We ri at qas kanikʼoj ri kubʼij ri Biblia xaq xiw ta katkun riʼ kachʼij ri kʼax  che kariq pa ri akʼaslemal xaneʼ xuqujeʼ kawetaʼmaj kʼi taq jastaq che katutoʼ pa ri kʼakʼ congregación che katbʼe wi.

2. Kajunamaj ta ri nabʼe congregación rukʼ ri kʼakʼ congregación (Ecl. 7:10). Jules kubʼij ri xubʼano are chiʼ xel bʼi pa Benín y xbʼe pa Estados Unidos y xrilo che junam ta ri cultura: «Xinchomaj che rajawaxik kinbʼij chke ronojel ri tajin kinkʼulmaj pa nukʼaslemal». Ri areʼ kubʼij che naqʼatal ta che kutzijoj ri tajin kuriq pa ri ukʼaslemal y wariʼ xubʼano che qas ta utz xunaʼo kkʼojiʼ pa ri congregación. Are kʼu ri areʼ kubʼij che xkʼextaj ri uchomanik are chiʼ xuchʼobʼ más kiwach ri qachalal: «Xinwilo che qonojel ri oj winaq oj junam, ri oj junam ta wi are ri kqabʼan che ubʼixik ri jastaq, rajawaxik che junam keqil ri qachalal». Rumal laʼ utz taj che kajunamaj ri congregación che katopan wi rukʼ ri nabʼe kanoq. Jun precursora ubʼiʼ Anne-Lise, kubʼij: «Xinkʼex ri nucongregación rech kwetaʼmaj chi nikʼaj jastaq».

Ri kʼamal taq bʼe utz taj che kkijunamaj ri nabʼe kicongregación rukʼ ri kʼakʼ congregación, ri qachalal re ri kʼakʼ congregación weneʼ jalan ri kkibʼan che ubʼanik ri jastaq are kʼu kraj ta kubʼij che utz ta tajin kkibʼan che. Are más utz che nabʼe kkichʼobʼ ri ubʼanik ri kikʼaslemal ri qachalal tekʼuriʼ kkibʼij ri kkichomaj (Ecl. 3:1, 7b). Are más utz che kkiya jun utz kʼutbʼal chuwach xa kkibʼij ri rajawaxik kbʼanik (2 Cor. 1:24).

3. Chayaʼ ri atobʼanik pa ri kʼakʼ congregación (Filip. 1:27). Qastzij che kosibʼal y kukʼam bʼi tiempo chiʼ kakʼex ri acongregación, are kʼu chakojoʼ achuqʼabʼ rech aninaq katbʼe pa e riqbʼal ibʼ, rumal che we katbʼe taj ri qachalal kekun ta riʼ katkitoʼo. Lucinda, kubʼij ri xkikʼulmaj are chiʼ xebʼe pa jun nimalaj tinamit re sudáfrica kukʼ ri kebʼ ral alitomabʼ, ri areʼ kubʼij: «Xinbʼan ri xbʼix chwe, xinkoj nuchuqʼabʼ rech kʼi kinbʼan pa ri congregación junam rukʼ ri utzijoxik ri utzij ri Dios kukʼ ri qachalal y uyaʼik comentarios pa ri e riqbʼal ibʼ xuqujeʼ xqabʼij chke ri qachalal che utz kbʼan ri riqbʼal ibʼ re ri utzijoxik ri utzij ri Dios pa ri qachoch».

We kakoj achuqʼabʼ y kattobʼan kukʼ ri qachalal pa ri congregación, qas kawil riʼ che junam tajin kixchakun che utzijoxik ri utzij ri Dios. Ri qachalal Anne-Lise che xojchʼaw kan chrij nabʼe, ri kʼamal taq bʼe xkibʼij che rajawaxik kel che utzijoxik ri utzij ri Dios amaqʼel. Ri areʼ kubʼij: «Xinwilo che we kinya ri nutobʼanik pa ri congregación aninaq riʼ kukʼam nuwach chilaʼ». Xuqujeʼ we kaya ri atobʼanik che uchʼajchʼobʼexik ri Ja rech Ajawbʼal xuqujeʼ che usukʼumaxik, ri nikʼaj chik kkilo che qas katkikot pa ri congregación. We kakoj achuqʼabʼ che ubʼanik wariʼ qas katkikot riʼ.

4. Cheʼatzukuj más awamigos (2 Cor. 6:11-13). Rech keʼariq awamigos utz che kakʼut chkiwach che katok il chke. Rumal laʼ rech kachʼobʼ kiwach ri qachalal utz che kattzijon kukʼ are chiʼ majaʼ kumajij ri riqbʼal ibʼ y are chiʼ kkʼisik. Chakojoʼ achuqʼabʼ rech kawetaʼmaj ri kibʼiʼ,  we at utz kukʼ ri qachalal y keʼachʼabʼej rukʼ utz taq tzij y we kasach ta ri kibʼiʼ pa ajolom kkil riʼ che kawaj keʼux awamigos.

Xaq ta kajaluj ri kabʼano rech utz katkil ri nikʼaj chik, chabʼanaʼ awe ri xubʼan ri qachalal Lucinda che kubʼij: «Oj ri nabʼe xeqabʼan invitar ri qachalal pa ri qachoch, rumal laʼ e kʼo kʼi qamigos».

«RUMAL KʼU RIʼ, CHIKʼAMOWAJ IWIBʼ»

Jujun qachalal kkixiʼj kibʼ keʼok pa jun Ja rech Ajawbʼal rumal che kkichʼobʼ ta kiwach ri qachalal, rumal laʼ we jun qachalal kopan pa ri acongregación, ¿jas kabʼano rech katoʼo? Ri apóstol Pablo xubʼij: «Rumal kʼu riʼ, chikʼamowaj iwibʼ, jas xuqujeʼ ri Cristo xujukʼamo» (Rom. 15:7). Ri kʼamal taq bʼe che kkesaj uwach ri Jesús xuqujeʼ kekitoʼ ri qachalal che keʼopan pa ri congregación (Chawilaʼ ri recuadro « ¿Jas kabʼano are chiʼ kakʼex ri acongregación?»). Konojel ri qachalal xuqujeʼ ri akʼalabʼ kekunik kkiya ri kitobʼanik rech ri e qachalal ri kopanik kkinaʼo che kʼo kamigos chilaʼ.

Kojkunik keqabʼan invitar ri qachalal pa ri qachoch xuqujeʼ kqaya ri tobʼanik che kajwataj chke, je wariʼ kkilo che kojok il chke. Jun kʼutbʼal, jun qachalal xutas utiempo rech xukʼut chuwach jun qachalal che kʼateʼ xopan pa ri congregación, jas camioneta kukojo rech kopan cho rachoch o pa ri Ja rech Ajawbʼal. Ri qachalal che kʼateʼ xopan pa ri congregación xubʼij che sibʼalaj utz xril ri xubʼan ri qachalal che utoʼik y che rukʼ wariʼ aninaq xukʼam uwach pa ri kʼakʼ congregación.

KATUTOʼO RECH KNIMAR RI AKOJONIK

We kʼateʼ xatopan pa jun kʼakʼ congregación, qas kaxiʼj awibʼ riʼ. Are kʼu chatchoman chrij wariʼ: Junam rukʼ jun alaj palomax che kʼateʼ nabʼe mul krapanik, weneʼ kuxiʼj ribʼ, are kʼu we amaqʼel krapanik wariʼ kubʼano che kuxiʼj ta chi ribʼ y más naj chi riʼ krapan wiʼ. Sibʼalaj nim ubʼanik che kakoj achuqʼabʼ rech kaxiʼj ta  awibʼ jeriʼ kkʼiy ri akojonik, junam rukʼ ri alaj palomax che krapanik, at katkunik kʼi kabʼan pa ri utinamit ri Jehová. Nicolas y Céline xkibʼij: «Kʼi kawetaʼmaj are chiʼ kakʼex ri acongregación. Are chiʼ xqachʼobʼ kiwach nikʼaj chi qachalal xojutoʼo rech xkʼojiʼ nikʼaj chi bʼantajik qukʼ». Jean-Charles, che xojtzijon kan chrij, kubʼij che ri ufamilia xuriq utzilal: «Are chiʼ xqakʼex ri qacongregación xuya nim tobʼanik chke ri qalkʼwal, rumal che kʼateʼ qʼaxinaq jujun taq ikʼ ri qalkʼwal ali xumajij uyaʼik asignaciones pa ri riqbʼal ibʼ re uxoʼl taq qʼij y ri qalkʼwal ala xux publicador no bautizado».

¿We katkun taj kakʼex ri acongregación y katbʼe pa jun lugar jawiʼ kajwataj tobʼanik, are kʼu katkunik kabʼan jujun chke ri kubʼij wajun kʼutunem riʼ. Wariʼ kubʼano che jetaneʼ katopan pa jun kʼakʼ congregación, chakubʼsaj akʼuʼx chrij ri Jehová y kʼi chabʼanaʼ pa ri congregación, xuqujeʼ amaqʼel chatel che utzijoxik ri utzij ri Dios kukʼ ri qachalal. Chatzukuj nikʼaj chi awamigos o chabʼanaʼ más ko che ri awachilanik kukʼ ri awamigos chik. ¿La kʼo jun chik che katkunik kabʼano rech keʼatoʼ ri kʼateʼ keʼopan pa ri acongregación? Qatzij che wariʼ katutoʼo rech knimar ri akojonik, rumal che ri loqʼoqʼebʼal are ri kkʼutuwik che oj qastzij cristianos (Juan 13:35). Qas chnaʼtaj chawe che ri kabʼano kqaj «chuwach ri Dios» (Heb. 13:16).

E kʼi qachalal sibʼalaj kekikotik y ukʼamom kiwach pa jun kʼakʼ congregación, paneʼ nabʼe kanoq xkiriq jujun taq kʼax. ¡Ri at xuqujeʼ katkunik kukʼam awach pa jun chi congregación! Anne-Lise kubʼij: «Ukʼexik ri nucongregación inutoʼm rech kinkunik kinjaq ri wanimaʼ chke ri nikʼaj chik». Ri qachalal Kazumi kubʼij che kawil na ri utobʼanik ri Jehová are chiʼ kakʼex ri acongregacíon. Ri qachalal Jules kubʼij: «E nuriqom kʼi wamigos y sibʼalaj kinkikotik, kʼi tajin kibʼan pa ri kʼakʼ congregación, kinkun ta chik kiya kanoq».