Ir al contenido

Ir al índice

Testigos rech Jehová

Uchaʼik jun chʼabʼal quiché

 KʼUTUNEM 51

Ri ajchʼoj xuqujeʼ ri alaj ali

Ri ajchʼoj xuqujeʼ ri alaj ali

Pa ri tinamit re Siria, kʼo jun alaj ali israelita che sibʼalaj naj kʼo wi che ri rachoch xuqujeʼ chke ri ufamilia. Ri xekʼamow bʼik are ri ajchʼojabʼ re Siria, xuqujeʼ kimik are jun ajchak rech ri rixoqil jun kinimal ri ajchʼojabʼ ubʼiʼ Naamán. Ri alaj ali kuqʼijilaj ri Jehová pa neʼ ri e nikʼaj chi winaq che e kʼo rukʼ kkiqʼijilaj taj.

Kʼo jun itzelalaj yabʼil chrij ri utzʼumal xuqujeʼ kuya nim kʼaxkʼolil. Ri alaj ali kraj kutoʼ, rumal laʼ xubʼij che ri rixoqil ri Naamán: «Wetaʼm uwach jun winaq che kkun che utoʼik rech kutzirik. Pa Israel kʼo jun ajqʼaxal utzij ri Jehová ubʼiʼ Eliseo. Areʼ kkunik kukunaj ri awachajil».

Ri rixoqil ri Naamán xubʼij che ri xubʼij ri alaj ali. Areʼ kraj kubʼan apachike jastaq rech kkunatajik, rumal laʼ xbʼe pa Israel pa rachoch ri Eliseo. Naamán xuchomaj che kkʼulax rumal ri Eliseo junam rukʼ jun winaq che nim ubʼanik. Are kʼu ri xel lo che ukʼulaxik are ta ri Eliseo, xaneʼ ri Eliseo xutaq bʼi ri rajpatanel rech kukʼulaj xuqujeʼ kuya jupaj  tzij che: «Jat pa ri nimaʼ jordán xuqujeʼ chanimaʼ awibʼ wuqubʼ mul chupam, tekʼuriʼ katkunatajik».

Ri xbʼix che ri Naamán utz ta xuto xuqujeʼ xubʼij: «Xinchomaj che wajun ajqʼaxal tzij riʼ kinukunaj rukʼ ri uchʼabʼexik ri uDios xuqujeʼ kusilabʼaj ri uqʼabʼ rukʼ mayibʼal rech kinkunatajik. Are kʼu xaq xiw xubʼij chwe che kinbʼe pa ri nimaʼ rech Israel. E kʼo nimaʼ más e utz pa Siria. ¿La kinkun taj kinbʼe pa ri e nimaʼ riʼ?». Naamán sibʼalaj xpe royowal xuqujeʼ xel bʼi cho rachoch ri Eliseo.

Ri e rajpatanel ri Naamán xkitoʼ rech kukʼex ri uchomanik. Xkibʼij che: «¿La pa qastzij che kabʼan apachike jastaq rech katkunatajik? Ri kutaʼ wajun ajqʼaxal tzij riʼ chawe kʼax ta ubʼanik. ¿Jasche kawaj taj kabʼano?» Naamán xunimaj ri xbʼix che, rumal laʼ xbʼe pa ri nimaʼ Jordán xuqujeʼ wuqubʼ mul xunim ribʼ chupam. Pa ri wuqubʼ mul, chiʼ Naamán xel lo pa ri nimaʼ qas xkunatajik. Sibʼalaj xkikotik xuqujeʼ xtzalij rukʼ ri Eliseo rech xuya maltyoxinik. Areʼ xubʼij: «Kimik qas wetaʼm che ri Jehová are ri qastzij Dios». Kʼo ta chi yabʼil che ri Naamán chiʼ xtzalij pa rachoch. ¿Jas kachomaj chrij ri xunaʼ ri alaj ali israelita chiʼ xril ri Naamán kunatajinaq chik?

«Pa kichiʼ ri akʼalabʼ xuqujeʼ ri ketuʼnik sukʼumam la wi ri bʼixonik» (Mateo 21:16).