Ir al contenido

Ir al índice

Testigos rech Jehová

Uchaʼik jun chʼabʼal quiché

 KʼUTUNEM 55

Ri ángel re ri Jehová kuchajij Ezequías

Ri ángel re ri Jehová kuchajij Ezequías

Ri Imperio asirio uchʼakom chi ri 10 tribus re Israel. Kimik ri ajawinel re Asiria, Senaquerib, xuqujeʼ kraj keʼuchʼak ri e kebʼ tribus re Judá. Rumal laʼ xumaj kichʼakik pa kijujunal ri e tinamit. Are kʼu ri tinamit che más kraj are Jerusalén. Ri retaʼm taj are che Jehová uchajim Jerusalén.

Ezequías, ri ajawinel re Judá, xutoj nim pwaq che Senaquerib rech kubʼan ta kʼax che Jerusalén. Senaquerib xukʼam ri pwaq, are kʼu xeʼutaq bʼi ri kʼiʼalaj ejército chrij ri tinamit. Ri winaq re ri tinamit sibʼalaj kixibʼim kibʼ rumal che tajin kenaqajin che ri tinamit. Tekʼuriʼ Ezequías xubʼij chke: «Kixibʼij ta iwibʼ. Ri e asirios kʼo kichuqʼabʼ, are kʼu Jehová kuya más qachuqʼabʼ oj chkiwach e areʼ».

Senaquerib xutaq bʼi ri utaqoʼn, kbʼix rabsaqué che, rech ktzeʼn chkij ri winaq re Jerusalén. Ri rabsaqué xtakʼiʼ chrij ri tinamit xuraq uchiʼ, xubʼij: «Jehová kkun ta che itoʼik. Kiya taj che Ezequías kixusubʼu. Kʼo ta jun dios kkun che ichajixik pa qaqʼabʼ».

Ezequías xutaʼ che Jehová ri rajawaxik kubʼano, Jehová xubʼij che: «Kaxibʼij ta awibʼ che ri kubʼij ri rabsaqué. Senaquerib kkun taj kuchʼak Jerusalén». Tekʼuriʼ, xkʼam lo jujun wuj che Ezequías che xutaq lo Senaquerib, che kubʼij: «Chiya iwibʼ pa qaqʼabʼ Jehová kkun taj kixukolo». Tekʼuriʼ Ezequías xubʼan uchʼawem xubʼij: «Jehová, chabʼanaʼ toqʼobʼ, chojakoloʼ, rech konojel kketaʼmaj che xaq xiw at ri qastzij Dios». Jehová xubʼij che: «Ri ajawinel re Asiria kok ta pa Jerusalén. In kinchajij ri nutinamit».

Senaquerib qas kul ukʼuʼx che kkun che uchʼakik Jerusalén. Are kʼu pa jun chaqʼabʼ, Jehová xutaq lo jun ángel jachiʼ e kʼo wi ri asirios, che e kʼo chrij ri tinamit. ¡Ri ángel xeʼukamisaj 185.000 soldados! Ri ajawinel Senaquerib e kʼo ta chi ri  achijabʼ rukʼ che más kʼo kichuqʼabʼ, rumal laʼ xtzalij bʼik xkun taj xchʼakanik. Jeʼ waʼ xubʼan Jehová che uchajixik Ezequías xuqujeʼ ri tinamit re Jerusalén, junam rukʼ ri ubʼim. Wet xatkʼojiʼ at pa Jerusalén, ¿la xakubʼsaj ta akʼuʼx riʼ chrij Jehová?

«Ri utaqoʼn ri Ajawaxel kebʼuchʼuqu xuqujeʼ kebʼutoʼtajisaj ri nim kakil wi ri Ajawaxel» (Salmo 34:7).