Ir al contenido

Ir al índice

Testigos rech Jehová

Uchaʼik jun chʼabʼal quiché

 KʼUTUNEM 20

Ri e nikʼaj chik waqibʼ kʼax

Ri e nikʼaj chik waqibʼ kʼax

Moisés xuqujeʼ Aarón xebʼe che rilik ri faraón rech xekibʼij ri e tzij riʼ che: «We kaya taj che kebʼe ri nutinamit, kintaq lo tábanos pa ri tinamit». Ri e tábanos are e nimaʼq taq amolo che ketiʼonik. Ri e kʼiʼalaj amolo riʼ xeʼok pa kachoch ri egipcios, ri e qʼinomabʼ ri e mebʼayibʼ. Ronojel ri tinamit xnoj chke tábanos. Are kʼu pa ri Ulew re Gosén, ri e kʼo wi ri israelitas, kʼo ta nijun. Wajun ukaj kʼax riʼ xuqujeʼ ri nikʼaj chik xaq xiw xubʼan kʼax chke ri egipcios, are kʼu xubʼan ta kʼax chke ri israelitas. Ri faraón xutaʼ toqʼobʼ che Moisés: «Chabʼij che Jehová che keresaj ri e amolo riʼ, tekʼuriʼ kinya che ri tinamit kel bʼik». Are chiʼ Jehová xeresaj, ri faraón xukʼex ri uchomanik. ¿La kachomaj che kopan na jun qʼij che faraón kubʼan ri kbʼix che?

Tekʼuriʼ Jehová xubʼij: «We ri faraón kuya ta che ri tinamit kel bʼik, ri e chikop che e kʼo pa Egipto kkiriq yabʼil xuqujeʼ kekamik». Chukabʼ qʼij xbʼantaj ri ubʼim Jehová, are kʼu ri e chikop che e kech ri israelitas kʼo ta xkiriqo. Are kʼu ri faraón, xraj ta xeʼutzoqopij ri winaq, sibʼalaj kʼax uchʼabʼexik.

Tekʼuriʼ Jehová jumul chik xutaq Moisés rech ktzalij rukʼ ri faraón xuqujeʼ rech kujabʼuj chaj pa ri kaqiqʼ. Ri chaj xux jun ulew che xunojisaj ri kaqiqʼ xuqujeʼ xqaj pa kiwiʼ konojel ri egipcios. Ri chaj riʼ xubʼan chke ri winaq xuqujeʼ ri e chikop xesokotajik sibʼalaj xkiriq kʼax. Are kʼu jumul chik ri faraón xubʼij chke ri israelitas che kekun taj kebʼek.

 Jehová jumul chik xutaq bʼi Moisés rukʼ ri faraón rech kubʼij che: «¿Jasche kʼa majaʼ kaya chke ri nutinamit keʼel bʼik? Chweʼq kinbʼano che kqaj saqbʼach». Chukabʼ qʼij, Jehová xutaq lo saqbʼach, kaqulja xuqujeʼ qʼaqʼ. Are ri más nimalaj jabʼ che xkʼulmataj pa Egipto. Xusachisaj uwach ri e cheʼ xuqujeʼ ri e tikoʼn, are kʼu pa ri Ulew re Gosén kʼo ta xkʼulmatajik. Tekʼuriʼ ri faraón xubʼij: «Chataʼ che Jehová kresaj, tekʼuriʼ kixbʼek». Are kʼu chiʼ xqʼax ri saqbʼach xuqujeʼ ri jabʼ, ri faraón xukʼex ri uchomanik.

Rumal laʼ Moisés xubʼij: «Kimik are chi sakʼ xekitij ri uxaq taq cheʼ che xsach ta kiwach pa ri nimalaj jabʼ». Ri e sakʼ e junam kukʼ e nimaʼq taq saltamontes. Sibʼalaj e kʼi sakʼ che xekitij ri e cheʼ xuqujeʼ ri e tikoʼn. Ri faraón xubʼij che Moisés: «Chataʼ toqʼobʼ che Jehová rech keresaj ri e sakʼ waral». Are kʼu chiʼ Jehová xeresaj bʼi ri e sakʼ, jumul chik xukʼutu che abʼaj ri ranimaʼ.

Tekʼuriʼ Jehová xubʼij che Moisés: «Chawalajisaj ri aqʼabʼ chikaj». Chanim xux qʼequʼm sibʼalaj qʼequʼm. Ri egipcios oxibʼ qʼij xekun taj xkilo. Xaq xiw ri israelitas kʼo saqil pa kachoch.

Ri faraón xubʼij che Moisés: «At xuqujeʼ ri atinamit kixbʼek, are kʼu chiyaʼ kan ri e chikop waral». Moisés xubʼij: «Rajawaxik keqakʼam bʼi ri chikop rech kqaya sipanik che ri qaDios». Ri faraón sibʼalaj xpe royowal xubʼij: «¡Jat chatel bʼi waral! We jumul chik kwil awach, katinkamisaj».

«Ix kichʼobʼ chi na jumul ri jalbʼem ibʼ ri kʼo chuxoʼl ri utz xuqujeʼ ri lawaloyil, chuxoʼl ri kaqʼijilan che ri Dios xuqujeʼ ri man kaqʼijilan ta che» (Malaquías 3:18).