Ir al contenido

Ir al índice

Testigos rech Jehová

Uchaʼik jun chʼabʼal quiché

 KʼUTUNEM 68

Elisabet xalax jun alaj uneʼ

Elisabet xalax jun alaj uneʼ

Jun ajkojol tabʼal toqʼobʼ ubʼiʼ Zacarías rukʼ ri rixoqil, Elisabet, e kʼo pa Jerusalén. Qʼaxinaq chi más che 400 junabʼ che jumul chik xbʼan ri tapya re Jerusalén. Zacarías xuqujeʼ Elisabet kʼi junabʼ chik e kʼulanik, are kʼu kʼo ta kalkʼwal. Jun qʼij, are chiʼ Zacarías tajin kuya ri incienso pa ri santuario re ri rachoch Dios, xukʼut ribʼ ri ángel Gabriel chuwach. Zacarías xuxibʼij ribʼ, are kʼu Gabriel xubʼij che: «Kaxibʼij ta awibʼ. Nukʼamom lo utz taq tzij rech Jehová. Ri awixoqil, Elisabet, kkʼojiʼ na jun ral ala, ri ubʼiʼ are Juan. Jehová xuchaʼ Juan rech kubʼan jun utzalaj chak». Zacarías xubʼij: «¿Jas kinbʼan che retaʼmaxik che ri kabʼij are qastzij? Ri wixoqil xuqujeʼ in oj rijabʼ chik rech kkʼojiʼ jun qalkʼwal». Gabriel xubʼij che: «Dios xinutaq loq rech kinbʼij ri e utzalaj taq tzij riʼ chawe. Are kʼu rumal che kinakoj taj, katkun ta chik katchʼawik kʼa kalax na ri akʼal».

Zacarías xkanaj kan más tiempo chuwach ri kubʼan amaqʼel. Are chiʼ xel loq, ri winaq keyem kkaj kketaʼmaj ri xkʼulmatajik. Are kʼu Zacarías kkun ta chik kchʼawik, xaq xiw chi kukʼutu. Tekʼuriʼ ri winaq xkichʼobʼo che jun utaqoʼn Dios xtzijon rukʼ.

Qʼaxinaq chi ri tiempo, Elisabet xkanaj yawabʼ ixoq tekʼuriʼ xalax ri ral, junam rukʼ ri xubʼij ri ángel. Ri e rachiʼl xuqujeʼ ri e ufamiliares Elisabet xepe che rilik ri alaj neʼ, sibʼalaj xekikot rukʼ. Elisabet xubʼij: «Juan ri ubʼiʼ». Ri e winaq xkibʼij che: «Kʼo ta jun jeʼ ubʼiʼ laʼ pa ri familia. Utz che kkoj Zacarías che ubʼiʼ, junam rukʼ ri utat». Are kʼu Zacarías xutzʼibʼaj: «Ri ubʼiʼ are Juan». Pa ri qʼij riʼ, Zacarías jumul chik xkunik xchʼawik. Ri utzijol ri alaj neʼ xjabʼun pa ronojel Judea, ri winaq kkichomaj: «¿Jas kukʼulmaj ri akʼal riʼ are chiʼ kkʼiyik?».

Tekʼuriʼ Zacarías xnoj che uxlabʼixel xubʼij: «¡Chqaya uqʼij Jehová! Areʼ xubʼij che Abrahán che kutaq lo jun kolonel, ri Mesías, rech kojukolo. Juan kux jun qʼaxal tzij che kusukʼumaj ri ubʼe ri Mesías».

 Xuqujeʼ xkʼulmataj jun jastaq nim ubʼanik rukʼ jun ufamiliar Elisabet che ubʼiʼ María. Kqil na pa ri jun chi kʼutunem.

«Ri winaq man kekuʼin ta waʼ che ubʼanik, are kʼu ri Dios kakuʼin che ubʼanik ronojel» (Mateo 19:26).