Ir al contenido

Ir al índice

Testigos rech Jehová

Uchaʼik jun chʼabʼal quiché

 KʼUTUNEM 66

Esdras kukʼut ri Utaqanik ri Dios chuwach ri tinamit

Esdras kukʼut ri Utaqanik ri Dios chuwach ri tinamit

70 junabʼ chik kʼi chke ri israelitas e tzalijinaq pa Jerusalén, pa neʼ e kʼo na jujun pa jalajoj taq tinamit re ri Imperio persa. Jun chke are Esdras, jun ajkojol tabʼal toqʼobʼ che kukʼut ri utaqanik Jehová. Esdras xuta che ri winaq re Jerusalén tajin ta kkinimaj ri utaqanik Jehová, rumal laʼ kraj kbʼe che kitoʼik. Artajerjes, ri ajawinel re Persia, xubʼij che: «Dios uyaʼom ri anojibʼal rech kakʼut ri utaqanik chke. Rumal laʼ jat xuqujeʼ cheʼakʼamaʼ bʼi ri kkaj kebʼe awukʼ». Esdras xeʼumulij konojel ri kkaj ketzalij pa Jerusalén. Xkitaʼ che Jehová che keʼuchajij tekʼuriʼ xkimajij ri nimalaj bʼe.

Qʼaxinaq chi kajibʼ ikʼ, xeʼopan pa Jerusalén. Ri e ajkʼamal bʼe re ri tinamit xkibʼij che Esdras: «Ri e israelitas kinimam ta Jehová xekʼuliʼ kukʼ ixoqibʼ che kkiqʼijilaj ri e diosibʼ». ¿Jas xubʼan Esdras? Xxukiʼ chkiwach konojel xubʼan uchʼawem, xubʼij: «Jehová, at abʼanom kʼi utz taq jastaq chqe, are kʼu ojmakunaq chawach». Xkichʼobʼo che utz ta ri tajin kkibʼano, are kʼu xkiya ta kan ubʼanik. Rumal laʼ Esdras xuchaʼ ajkʼamal taq bʼe xuqujeʼ ajqʼatal taq tzij rech kkil ri tajin kkʼulmatajik. Pa oxibʼ ikʼ xekesaj bʼi konojel ri xkaj taj xkiqʼijilaj ri Jehová.

Xqʼax 12 junabʼ. Ri e tapya re Jerusalén xkʼis uyakik. Esdras xumulij ri tinamit pa ri kʼaybʼal rech xusikʼij ri utaqanik ri Dios chkiwach. Are chiʼ xujaq ri wuj ri tinamit xetakʼik. Esdras xuya uqʼij Jehová, xuqujeʼ ri e israelitas xkiwalajisaj ri kiqʼabʼ rech kkikʼutu che utz xkito. Tekʼuriʼ, Esdras xusikʼij uwach ri taqanik xuqujeʼ xubʼij ri kraj kubʼij. Ri tinamit xkitatabʼej. Xkichʼobʼo che kiyaʼom kan ri Jehová xkimaj oqʼej. Chukabʼ qʼij, Esdras xusikʼij chi uwach ri taqanik. Ri e israelitas xkilo che rajawaxik kkibʼan ri nimaqʼij re ri kabʼal. Chanim xkisukʼumaj ri jastaq rech ri nimaqʼij.

Ri e israelitas sibʼalaj xekikot pa ri wuqubʼ qʼij che  xuchʼij ri nimaqʼij. Xkimaltyoxij ri utzalaj uwach ri kitikoʼn che Jehová. Kibʼanom ta chi nimaqʼij junam rukʼ waʼ xaq xiw chiʼ kʼasal na Josué. Are chiʼ xkʼis ri nimaqʼij, xkimulij kibʼ xuqujeʼ xkibʼan kichʼawem: «Jehová, at xojawesaj pa ri kʼaxkʼolil. Xaya ri qawa pa ri chaqiʼj ulew xuqujeʼ wajun jeʼlikalaj ulew riʼ. Are kʼu ri oj kʼi mul qanimam ta ri atzij. Pa neʼ xeʼataq lo ri ajqʼaxal taq atzij che qapixbʼexik, are kʼu xqabʼan ta ri xkibʼij chqe. Pa neʼ jeʼ wariʼ, at sibʼalaj kʼo akochʼonik. Xsach ta chawe ri xatzujuj che Abrahán. Kimik, kqabʼij chawe che katqanimaj». Ri tinamit xkitzʼibʼaj ri xkitzujuj, ri príncipes, ri levitas xuqujeʼ ri ajkojol tabʼal toqʼobʼ xkijuchʼ rukʼ jun etal.

«¡Are kikotemal chke ri kakitatabʼej ri utzij ri Dios, kakinimaj kʼut!» (Lucas 11:28).