Ir al contenido

Ir al índice

Testigos rech Jehová

Uchaʼik jun chʼabʼal quiché

 KʼUTUNEM 59

Kajibʼ alabʼom che kkinimaj ri Jehová

Kajibʼ alabʼom che kkinimaj ri Jehová

Nabucodonosor xeʼukʼam bʼi ri e príncipes re Judá pa Babilonia xuqujeʼ xukoj jun winaq nim ubʼanik pa ri qʼatbʼal tzij ubʼiʼ Aspenaz che kichajixik. Xuqujeʼ, xutaq wajun achi che keʼutzukuj ri e alabʼom che e yawabʼ taj xuqujeʼ che kʼo kinojibʼal chkixoʼl ri e príncipes. Ri e alabʼom riʼ kyaʼ jun nimalaj tijonik chke pa oxibʼ junabʼ rech keʼux nim kibʼanik pa Babilonia. Rajawaxik kketaʼmaj kkisikʼij uwach wuj, kkitzʼibʼaj xuqujeʼ kechʼaw pa ri chʼabʼal acadio re Babilonia. Xuqujeʼ rajawaxik kkitij ri rikil che kyaʼ pa ri uqʼatbʼal tzij ri ajawinel. Kajibʼ chke ri alabʼom riʼ kibʼiʼ are Daniel, Hananías, Misael xuqujeʼ Azarías. Are kʼu Aspenaz xukoj bʼiʼaj re Babilonia chke: Beltsasar, Sadrac, Mesac xuqujeʼ Abednego. ¿La kachomaj che ri tijonik xyaʼ chke kubʼano che kekʼojiʼ ta chi naqaj che ri Jehová?

 Ri e kajibʼ alabʼom riʼ kkaj kkinimaj ri Jehová. Ketaʼm che kkikʼam ta ri rikil kuya ri ajawinel chke rumal che ri utaqanik ri Jehová kubʼij che utz taj ktijow jujun chke ri e rikil riʼ. Rumal laʼ xkibʼij che Aspenaz: «Chabʼanaʼ toqʼobʼ, kojataqchiʼj ta che kqatij ri rikil che kutij ri ajawinel». Are kʼu Aspenaz xubʼij chke: «We qas ta kitij iwa, xuqujeʼ we ri ajawinel krilo che ri ipalaj che ix yawabʼ, kinukamisaj riʼ».

Daniel kʼo unoʼj. Xubʼij che ri ajchajinel kech: «Chabʼanaʼ toqʼobʼ, xaq xiw ichaj xuqujeʼ joron kaya chqe pa 10 qʼij. Tekʼuriʼ chojajunamaj kukʼ ri alabʼom che kkitij ri rikil kutij ri ajawinel». Utz xuta ri ajchajinel.

Are chiʼ xqʼax ri 10 qʼij, Daniel xuqujeʼ ri e oxibʼ rachiʼl kekaʼyik che más utz kiwach cho ri nikʼaj chik alabʼom. Jehová sibʼalaj kkikot kukʼ rumal che xenimanik. Xuqujeʼ xuya unojibʼal ri Daniel rech kkunik kuchʼobʼ ri visiones xuqujeʼ ri e achikʼ.

Are chiʼ xkʼis ri oxibʼ junabʼ re tijonik, Aspenaz xeʼukʼam bʼi ri e alabʼom chuwach ri Nabucodonosor. Ri ajawinel xchʼaw kukʼ xuqujeʼ xrilo che Daniel, Hananías, Misael xuqujeʼ Azarías más kʼo kinojibʼal chkiwach ri nikʼaj chik alabʼom. Rumal laʼ xeʼuchaʼ rech kechakun rukʼ pa ri qʼatbʼal tzij. Chiʼ ubʼanom chi wariʼ, ri ajawinel kʼi mul xutaʼ pixabʼ chke chrij jastaq che nim kibʼanik. Jehová xuya más kinojibʼal chkiwach ri rajnojabʼ xuqujeʼ rajqʼijabʼ ri ajawinel.

Daniel, Hananías, Misael xuqujeʼ Azarías e kʼo ta pa kitinamit, are kʼu amaqʼel xnaʼtaj chke che e jujun chke ri kkipatanij ri Jehová. ¿E ri at? Are chiʼ ri anan atat e kʼo ta awukʼ, ¿la xuqujeʼ amaqʼel kanimaj ri Jehová?

«Mayaʼ chke ri winaq chi kaketzelaj awach xaʼ rumal rech chi at akʼal achi na. Xaneʼ chatux jun kʼutbʼal pa ronojel chkiwach ri kojonelabʼ, rech ri e are katkilo, kakibʼan ke jas ri kabʼan at. Jeriʼ kakitaʼ ri utzalaj atzij, kakilo chi utz katbʼin pa ri akʼaslemal, chi kebʼaloqʼoqʼej nikʼaj chik, chi kʼo akojonik, chi chʼajchʼoj ri akʼaslemal, kakibʼan kʼu ke jas ri kabʼan at» (1 Timoteo 4:12).