Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 68: Keb' ak'alab' xek'astaj loq

B'antajik 68: Keb' ak'alab' xek'astaj loq

CHI' kkam jun ak'al, ¿su kub'an runan chi' kk'astaj loq? ¡Ri unan sib'alaj kkikotik! Tek'uri' ¿la kk'astaj na jun winaq chi' kamnäq chik? ¿La xb'an wari' ojer?

Chawila' pa wachb'äl wajun achi ri', xuquje' jun ixoq ruk' alaj ak'al. Wajun achi ri' are ajq'axal utzij ri Ajawaxel ub'i' Elías. Ri ixoq are jun malka'n rech ri tinamit Sarepta, ri laj ak'al are ral wajun ixoq ri'. Tek'uri', xopan jun q'ij wa ak'al ri' xuriq yab'il. Xuquje' sib'alaj k'äx k'olik, tek'uri' xkamik. Rumal wa' Elías xub'ij che ri ixoq: ‹Chaya ri ak'al chwe›.

Elias ruk’ jun malkan ixoq xuquje’ ri ral che xk’astaj loq

Elías xuk'am b'i ri ak'al kamnäq xuya puwi' ri ch'at. Tek'uri' xub'an jun uch'awem: ‹Oh Jehová, chab'ana che ri ak'al che kk'astaj loq›, xcha'. ¡Ri ak'al xk'astajik! Ri Elías xuk'am b'i che ri ixoq: tek'uri' xub'ij ‹¡Chawilampe' ri awal k'aslik!› Xcha' che, wari' sib'alaj xub'ano che xkikotik ri ixoq.

Jun chik ajq'axal utzij Jehová are Eliseo. Are' kuto ri Elías. Tek'uri' q'axnäq chi keb' oxib' junab' Jehová xub'an che ri Eliseo xe'ukunaj winaq. Jun q'ij Eliseo xb'e pa tinamit Sunem, chila' k'o jun ixoq che xub'an sib'alaj utz ruk'. Tek'uri' xq'ax keb' oxib' q'ij wajun ixoq ri' xk'eje' jun ral.

Pa jun q'ij, chi' ri ak'al nim chik, xb'e ruk' ri utat pa chak. Tek'uri' ri ak'al xub'ij wari': ‹¡K'äx nujolom!› Xcha', chi' xk'am b'i pa rachoch xkamik. ¡Ri unan sib'alal xb'isonik! Rumal la' chanim xutzukuj ri Eliseo.

Chi' xopan ri Eliseo, xok b'ik pa rachoch ri ak'al che kamnäq chik. Xub'an uch'awem che Jehová, xuquje' xq'oyik, o xkatz'e', puwi' ri ak'al. Naj täj ri ak'al xmiq'ik, tek'uri' xub'an ut'ixnab' wuqub' mul. ¡Sib'alaj xkikot ri unan chi' xrilo che k'aslik!

Sib'alaj k'i winaq e kamnäq. Wari' sib'alaj kub'an chike täq kifamilias xuquje' kachi'l che sib'alaj keb'isonik. Öj kojkun täj che kqab'an chike ri e kamnäq che kewalij loq. Xaq xiw Jehová kkunik. Che jun chik b'antajik kqilo che Jehová kkunik kuwalsaj k'i täq kamnäq xuquje' kub'an na chike che kek'ase' chi na jumul chik konojel.

1 Reyes 17:8-24; 2 Reyes 4:8-37.


Ri e tz’onoj

  • ¿Jachin täq ri oxib’ winaq che kawil pa ri wachb’äl, xuquje’ su xub’an ri alaj ak’al pa jun q’ij?
  • ¿Su xuta ri Elías pa ch’awem puwi’ ri ak’al, xuquje’ su xub’ano?
  • ¿Su ub’i’ ri achi che xuto Elías?
  • ¿Suche xb’ix che Eliseo rajawaxik che kb’e pa rachoch jun ixoq rech Sunem?
  • ¿Su xub’an Eliseo, xuquje’ su xub’an ri ak’al kamnäq chik?
  • ¿Jumpa’ uchoq’ab’ Jehová k’olik, junam ruk’ xuk’ut chi’ Elías ruk’ Eliseo xkekunaj winaq?

Nik’aj chik kta’ chawe

  • Ksik’ix uwäch 1 Reyes 17:8-24.

    ¿Su ruk’ xil wi ri ukojonik Elías xuquje’ che kub’ano su kb’ix che? (1 Rey. 17:9; 19:1-4, 10.)

    ¿Suche sib’alaj nim ub’anik ri ukojonik ri ixoq malka’n rech Sarepta? (1 Rey. 17:12-16; Luc. 4:25, 26.)

    ¿Su xub’an che uk’utik ri xuriq ri malka’n ixoq rech Sarepta ri täq utzij Jesús k’o pa Mateo 10:41, 42? (1 Rey. 17:10-12, 17, 23, 24.)

  • Ksik’ix uwäch 2 Reyes 4:8-37.

    ¿Su kuk’ut ri ixoq rech Sunem che qawäch chirij utzilal che xub’an che ri Eliseo? (2 Rey. 4:8; Luc. 6:38; 1 Juan 3:17.)

    ¿Su rajawaxik kqab’an chike konojel ri täq ajpatanel rech ri Ajawaxel kimik? (Hech. 20:35; 28:1, 2; Gál. 6:9, 10; Heb. 6:10.)