Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 62: K'axk'olil pa rachoch David

B'antajik 62: K'axk'olil pa rachoch David

CHI' David xok che ub'anik q'atb'altzij pa Jerusalén, Jehová xuya chike ri rajch'oj xkech'ak k'i täq ch'oj. Ri Ajawaxel Jehová ub'im chik chike ri täq israelitas che kuya ri ulew Canaán pa kiq'ab'. Kimik ruk' ri utoq'ob' Jehová, ronojel ri ulew xub'an kech.

David sib'alaj kraj ri Jehová, rumal la' xub'an jun utzalaj ajawinel. Rumal la', ri nab'e xub'ano chi' uch'akom chi ri Jerusalén, xuk'am b'i ri koxon rech pacto chila'. Xuquje' kraj kub'an jun loq'alaj ja rech kuya chupam.

Q'axnäq chi keb' oxib' junab', David xub'an jun nimalaj mak. David reta'm che utz täj che kk'am jun jasach, o kos, rech jun winaq chik. Tek'uri' che jun aq'ab', chi' k'o puwi' ri rachoch, xril lo ikim che k'o jun je'likalaj, o tz'o'ylaj, ixoq. Bat-seba ub'i', ri rachajil ub'i' Urías, ajch'oj rech David.

David sib'alaj xurayij, o xurij, ri Bat-seba, rumal la' xub'ij che kk'am lo pa rachoch. Ri rachajil Bat-seba b'enäq naj pa ch'oj. Tek'uri', David xqaj pa mak ruk' Bat-seba, tek'uri' xuto che kk'eje' jun ralk'wal ruk'. David sib'alaj xuxib'ij rib', rumal la' xub'ij che ri ajk'amal b'e chike ri ajch'oj ub'i' Joab che kuya ri Urías chuwäch ri ch'oj rech kkamik. Chi' xkam Urías, David xk'ule' ruk' Bat-seba.

Jehová sib'alaj xpe royowal, o riwal, che David. Rumal la' xutaq b'ik ri ajpatanel Natán rech kub'ij che ri David ri täq umak xub'ano. Chawilampe' pa ri wachb'äl che ri Natán k'o ruk' David. David sib'alaj k'äx xuna' rumal ri umak xub'ano, Jehová xukamsaj täj, tek'uri' xub'ij wari' che: ‹Rumal che ab'anom k'i täq amak, kpe na sib'alaj k'i täq k'äx pa awachoch›. ¿Su täq k'axk'olil xpe ruk' David?

Natán tijan kupixbej ri David

Nab'e, xkam ri ral Bat-seba. Tek'uri' ri nab'e uk'ojol David, ub'i' Amnón, xok ruk' choq'ab' ruk' ri ranab' ub'i' Tamar. Ri jun chik uk'ojol David ub'i' Absalón sib'alaj xpe royowal, o riwal, rumal la' xukamsaj Amnón. Tek'uri' ri winaq utz xkil ri Absalón, rumal la' xkaj xkeb'an ajawinel che. K'isb'al re David xuch'ak ri ch'oj ruk' Absalón xuquje' xkam ri Absalón. David xq'ax pa k'i täq k'äx.

Chi' xb'an ronojel wari', Bat-seba xk'eje' jun ral ub'i' Salomón Chi' David k'o chi yab'il che xuquje' ri'j winaq chik, ri uk'ojol ub'i' Adonías xraj xub'an ajawinel. David xub'ij che jun ajkojol tab'al toq'ob ub'i' Sadoc che kuya aceite pa ujolom ri Salomón rech kub'an ajawinel. Tek'uri' xkam ri David chi' k'o 70 ujunab', xub'an ajawinel 40 junab'. Kimik ri ajawinel are Salomón.

2 Samuel 11:1-27; 12:1-18; 1 Reyes 1:1-48.



Ri e tz’onoj

  • Ruk’ ri utoq’ob’ ri Jehová, ¿su xb’antaj pa ri ulew Canaán?
  • ¿Su xb’an pa jun chaq’ab’ chi’ David k’o puwi’ rachoch?
  • ¿Suche sib’alaj xpe royowal, o riwal, Jehová che David?
  • ¿Jachin la’ ri achi k’o pa ri wachb’äl che Jehová xutaq b’i che ub’ixik che David che xaq mub’an chi umak, xuquje’ su xub’ij wari’ che kuriq David?
  • ¿Su k’axk’olil xuriq ri David?
  • ¿Jachin xub’an ajawinel pa Israel chi’ kamnäq chi David?

Nik’aj chik kta’ chawe

  • Ksik’ix uwäch 2 Samuel 11:1-27.

    ¿Su kqariq täj we kqakoj qaq’ij che upatanexik ri Jehová?

    ¿Suche xqaj ri David pa mak, xuquje’ su kuk’ut wari’ che qawäch ojpatanel rech Jehová kimik? (2 Sam. 11:2; Mat. 5:27-29; 1 Cor. 10:12; Sant. 1:14, 15.)

  • Ksik’ix uwäch 2 Samuel 12:1-18.

    ¿Su kketa’maj ri täq ancianos xuquje’ ri täq tat nan chirij ri xub’an ri Natán chi’ xupixb’ej ri David? (2 Sam. 12:1-4; Pro. 12:18; Mat. 13:34.)

    ¿Suche Jehová xusach umak ri David? (2 Sam. 12:13; Sal. 32:5; 2 Cor. 7:9, 10.)