Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 58: David ruk' Goliat

B'antajik 58: David ruk' Goliat

RI TÄQ filisteos xepe chi jumul chik che ub'anik ch'oj kuk' ri täq israelitas. Ri täq oxib' ratz ri David e k'o che kixo'l rajch'oj Saúl. Rumal la', xopan jun q'ij ri Jesé xub'ij wari' che David: ‹Chak'ama b'i kaxlanwa chike awatz. Jawila' la utz kiwäch›.

Goliat

Chi' ri David xopan che kinaqaj, xb'e chanim che kitzukuxik ri täq ratz jachi', o ni, kok wi ri ch'oj. Ri jun nim raqan filisteo ub'i' Goliat xok pa tze' chikij ri israelitas. Tijan kub'an wari' ronojel q'ij chi' ksaqarik xuquje' ronojel chaq'ab' pa 40 q'ij. Xub'ij wari': ‹Chicha' jun winaq rech kch'ojin wuk'. We kch'akanik xuquje' kinukamsaj, öj kqab'an ajpatinel chiwe. Tek'uri' we in kinch'akanik xuquje' kinkamsaj, ix kib'an ajpatinel qech. Chiwila' jachin kitzukuj rech kub'an wari'›.

David xuta wari' chike jujun täq ajch'oj: ‹¿Su kya' che ri winaq we kukamsaj wajun filisteo rech ke'uya ta pa k'ixb'al ri Israel?›

‹Saúl kuya q'inomal (b'eyom) che›, jun chike ri ajch'oj xub'ij wari'. ‹Xuquje' kuya ri umi'al che, rech kk'ule' ruk'.›

Tek'uri' konojel ri täq israelitas kkexib'ij kib' che Goliat rumal che are jun nimalaj raqan. Xa jub'iq' kraj che 3 metros raqan wajun achi xuquje' jun chik achi rek'am ri setesik ch'ich' rech to'b'al re.

Jujun chike ri ajch'oj xeb'e che ub'ixik che ri ajawinel Saúl che David kraj kch'ojin ruk' Goliat. Tek'uri' Saúl xub'ij che David: ‹Katkun täj. Rumal che at jun ak'al na, are k'u ri Goliat ojer chik ajch'oj›. David xub'ij wari': ‹In xinkamsaj jun oso xuquje' jun köj chi' xkek'am b'i ri täq chij rech nutat. Tek'uri' wajun filisteo xa junam kuk' wari'. Jehová kinuto'›. Rumal la', Saúl xub'ij wari': ‹Jat b'a', ri Jehová katuto' na›.

David xqaj b'i che uchi' jun nimalaj ja' che usik'ik job' ab'aj tek'uri' xe'uya b'i pa umoral. Tek'uri' xb'e ruk' ri uhonda rech kch'ojin ruk' ri nimalaj raqan achi. Goliat xa xutze'j uwäch wari'. Xub'ij che xa k'äx ta ukamsaxik ri David.

David tijan kuk’aq b’i jun ab’aj

‹Chatpetoq›, xcha' Goliat, ‹Kinya k'u ri ab'aqil chike ri chiköp›. Tek'uri' David xub'ij: ‹At katpe wuk' ruk' ri nim raqan ach'ich', tek'uri' in kinch'ojin awuk' pa ub'i' ri Jehová. Kimik Jehová katuya na pa nuq'ab' tek'uri' katinkamsaj na›.

Kimik David xb'e chanim ruk' Goliat. Xresaj lo jun ab'aj pa umoral, xukoj che ri uhonda, tek'uri' ko xuk'aqab'ej che ujolom Goliat. ¡Ri ab'aj xok pa ujolom ri Goliat, tek'uri' xkamik! Chi' ri filisteos xkilo che xkam ri Goliat, xe'anmajik. Ri täq israelitas xeb'e chikij rumal wari' xkech'ak ri ch'oj.

1 Samuel 17:1-54.



Ri e tz’onoj

  • ¿Su täq utzij xub’ij Goliat chike ri täq ajch’oj rech Israel?
  • ¿Jampa’ unimal raqan Goliat, xuquje’ su xutzujuj Saúl che ri achi kukamsaj Goliat?
  • ¿Su xub’ij David chi’ Saúl xub’ij che kkun täj kch’ojin ruk’ ri Goliat rumal che xa jun ak’al na?
  • ¿Su xub’an David che xuk’utu che ukub’san uk’u’x chirij Jehová chi’ xuch’ab’ej Goliat?
  • Chawila’ ri k’o pa wachb’äl, ¿su xukoj David che ukamsaxik Goliat, tek’uri’ su xkeb’an ri filisteos?

Nik’aj chik kta’ chawe

  • Ksik’ix uwäch 1 Samuel 17:1-54.

    ¿Suche xch’akan ri David, xuquje’ su rajawaxik kqab’ano rech kqaxib’ij ta qib’ öj junam che xub’an David? (1 Sam. 17:37, 45; Efe. 6:10, 11.)

    ¿Suche ri täq cristianos rajawaxik che kkeb’an täj che kkaj kech’akanik junam che xub’an Goliat, chi’ e k’o pa täq etz’anem o jun chik? (1 Sam. 17:8; Gál. 5:26; 1 Tim. 4:8.)

    ¿Su kub’ij ri täq utzij ri David che xukub’saj uk’u’x che ri Ajawaxel kuto’? (1 Sam. 17:45-47; 2 Cró. 20:15.)

    ¿Su ub’anik kuk’ut ri Loq’alaj Pixab’ che are xech’ojin ri dioses che qastzij täj ruk’ ri Jehová? (1 Sam. 17:43, 46, 47.)

    ¿Su kkeb’an ri täq e cha’om keb’e pa kaj che kkekub’saj kik’u’x che Jehová junam che xub’an David? (1 Sam. 17:37; Jer. 1:17-19; Apoc. 12:17.)