Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 36: Jun chiköp rech q'an pwäq

B'antajik 36: Jun chiköp rech q'an pwäq

¡HUY! ¿Sula' tijan kkeb'an ri winaq? ¡Tijan kkeya uq'ij jun chiköp rech q'an pwäq! ¿Suche tijan kkeb'an wari'?

Chi' ri Moisés naj chi ub'anom pa ri juyub' (jïb'), are wa' xkeb'ij: ‹Qeta'm täj su xub'an ri Moisés. Chaqab'ana' jun qaDios rech kojresaj b'i waral›.

Ri Moisés tijan kuk’aq loq ri keb’ tz’alam uwach ab’aj

‹Utz la'›, xcha' ri Aarón, ri rachalal ri Moisés. ‹Chik'ama' lo chwe ronojel ri q'an pwäq k'o iwuk'.› Chi' xkeb'an wari' ri winaq, Aarón xuja'risaj tek'uri' xub'an jun chiköp che ri q'an pwäq. Tek'uri' are wa' xkeb'ij ri winaq: ‹¡Are wa' ri qaDios, che xojresaj lo Egipto!› Xecha', tek'uri' xe'ok che ub'anik jun nimq'ij, rech xkeya uq'ij ri jun chiköp rech q'an pwäq.

Chi' ri Jehová xril wari', sib'alaj xpe royowal. Are wari' xub'ij che Moisés: ‹Jat chanim. Ri tinamit xe'ok che ub'anik itzelal. Xkesach ri täq nutaqonik xuquje' tijan kkeya uq'ij jun chiköp rech q'an pwäq›.

Ri winaq kkiya uq’ij jun chikop rech q’an pwaq

Tek'uri' ri Moisés xqaj b'i chanim. Chi' k'o chi naqaj, are wa' xrilo. ¡Ri winaq tijan keb'ixonik xuquje' tijan kexojowik chirij ri jun chiköp! Sib'alaj xpe royowal ri Moisés, rumal wari' xuk'aq lo ri keb' tz'alam täq ab'aj che tz'ib'atal wi ri täq taqonik chuwäch, wari' xepaxik. Tek'uri' xuja'risaj ri jun chiköp. Wari' xub'an junam kka'y ulew.

Ri tinamit xkeb'an jun nimalaj itzelal. Rumal la' ri Moisés xub'ij chike ri achijab' che kketzukuj ri kich'ich'. ‹Ri itzel täq winaq che xkeya uq'ij ri jun chiköp rajawaxik kekamik›, xcha'. ¡Rumal la' ri täq achijab' xkekamsaj 3.000 täq winaq! Wari' kuk'utu che rajawaxik kqachajej qib', che xaq xiw Jehová kqaya uq'ij are ta ri dioses che e qastzij täj.

Éxodo 32:1-35.



Ri e tz’onoj

  • ¿Su tijan kkeb’an ri winaq e k’o pa ri wachb’äl, xuquje’ suche?
  • ¿Suche xpe riwal Jehová, xuquje’ su xub’an Moisés chi’ xeril ri tijan kkeb’an ri winaq?
  • ¿Su xub’ij Moisés chike nik’aj achijab’ che kkeb’ano?
  • ¿Su kuk’ut wajun b’antajik ri’ chaqe?

Nik’aj chik kta’ chawe

  • Ksik’ix uwäch Éxodo 32:1-35.

    Chi’ kqayuj ri qastzij kojonem ruk’ ri qastzij täj kojonem, ¿su kuk’ut wajun b’antajik ri’ su kub’ij Jehová chirij wari’? (Éxo. 32:4-6, 10; 1 Cor. 10:7, 11.)

    ¿Su rajawaxik kkeb’an ri täq cristianos chi’ kkecha’ ri kiq’ojom rech kketo xuquje’ chi’ kexojowik? (Éxo. 32:18, 19; Efe. 5:15, 16; 1 Juan 2:15-17.)

    ¿Su jun utzalaj k’utb’al xkeb’an ri tribu rech Leví chi’ xkeb’an suk’? (Éxo. 32:25-28; Sal. 18:25.)