Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 29: Moisés xel b'i pa Egipto

B'antajik 29: Moisés xel b'i pa Egipto

CHAWILAMPE' ri Moisés; tijan kanmajik. ¿La xawilo chin täq kketarb'en (ketarnem)? ¿La aweta'm suche kekaj kekamsaj ri Moisés? Chqilampe' suche.

Moisés xanmaj b’i che Egipto

Moisés xk'iy pa rachoch ri Faraón, wajun achi Faraón are ri ajq'atb'altzij puwi' Egipto. Moisés xub'an nim uq'ij xuquje' k'o nim reta'mb'äl. Moisés reta'm che egipcio täj, xuquje' reta'm che rutat unan xa e israelitas.

Jun q'ij, chi' ri Moisés k'o 40 ujunab', xb'e che rilik su kib'anom ruwinaq. Xrilo che tijan ub'anik k'äx chike. Xril jun aj egipto tijan kuch'ay jun israelita. Moisés xril apanoq we k'ot chin tijan krilo, chi' xrilo che k'ot nijun winaq tijan krilo, xuch'iyo tek'uri' rumal wari' ri egipcio xkamik. Moisés xumuq kan ri egipcio pa sanyib'.

Ri jun chik q'ij ri Moisés xtzalij chik rech ke'urila'. Are' kub'ij che kkunik ke'uto'o rech kb'an ta chi mos chike. Tek'uri' xeril e keb' israelitas tijan kkeb'an ch'oj, ri Moisés xub'ij che ri achi tijan kch'ayonik: ‹¿Suche tijan kach'ay rawachalal?›

Jewa' xub'ij ri achi che Moisés: ‹¿Jachin xub'ij chawe at che are at kab'an q'atb'altzij pa qawi'? ¿La are kawaj kinakamsaj junam che xab'an che ri achi egipcio?›

Ri Moisés xuxib'ij rib'. Xrilo che ri winaq xketa'maj su xub'an che ri egipcio. Xuquje' ri Faraón xreta'maj, rumal wa' xutaq ukamsaxik ri Moisés. Xa rumal wari' che Moisés rajawaxik xanmaj b'ik.

Chi' Moisés xel b'i pa Egipto, naj xb'e wi, xb'e pa jun tinamit ub'i' Madián. Chila' Madián xreta'maj uwäch jun achi ub'i' Jetró, xuquje' ri Moisés xk'uli' ruk' ri Ziporá, wajun ali are jun chike rumi'al ri Jetró. Ri Moisés xub'an ajyuq' pa kiwi' ronojel ruchij ri Jetró. 40 junab' xk'eje' ri Moisés pa ri tinamit Madián. Xq'ax ri junab' tek'uri' ri Moisés k'o chi 80 ujunab'. Jun q'ij chi' ri Moisés tijan ke'uyuq'uj täq chij, xril jun jasach (jun kos) che xujal uk'aslemal. ¿Sula' xrilo? Chupam ri jun chik b'antajik kqil na sula' xrilo.

Éxodo 2:11-25; Hechos 7:22-29.



Ri e tz’onoj

  • ¿Jachin täq kuk’ xk’iy wi ri Moisés, xuquje’ sula’ reta’m chikij utat unan?
  • ¿Su xub’an Moisés chi’ k’o 40 ujunab’?
  • ¿Su xub’ij Moisés che jun israelita che tijan kuch’ay jun chik achi, tek’uri’ su xutzalij ub’ixik ri israelita che ri Moisés?
  • ¿Suche ri Moisés xanmajik?
  • ¿Su tinamit xb’e wi ri Moisés chi’ xanmajik, xuquje’ chin xreta’maj uwäch?
  • ¿Chike chak xub’an ri Moisés 40 junab’ pa ri tinamit Madián?

Nik’aj chik kta’ chawe

  • Ksik’ix uwäch Éxodo 2:11-25.

    Ri Moisés xutijosaj rib’ pa nima’q täq tijob’al pa Egipto, ¿su ruk’ xuk’ut Moisés che suk’ chuwäch Jehová xuquje’ suk’ chuwäch rutinamit israel? (Éxo. 2:11, 12; Heb. 11:24.)

  • Ksik’ix uwäch Hechos 7:22-29.

    Ri Moisés xraj che utikel ruk’ ruchoq’ab’ xkunik xeresaj ri israelitas pa kiq’ab’ e aj Egipto, ¿su kuk’ut wari’ che qawäch? (Hech. 7:23-25; 1 Ped. 5:6, 10.)