Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 6: Caín ruk' Abel

B'antajik 6: Caín ruk' Abel

WACHANIM chawilampe' ri Caín ruk' ri Abel. Ri e keb' xek'iyik. Ri Caín xub'an ajtiko'n. Ri uchak are kutik ri jalajoj uwäch täq su ktijowik.

Caín ruk’ Abel tijan kkiya tab’al toq’ob’ chuwach Ajawaxel

Ri Abel kuk'iyisaj ri täq chij. Are' utz krilo kuchajej ri alaj täq chij. Wari' kek'iyik tek'uri' ke'ub'an nima'q täq chij, tek'uri' k'o jun nimalaj jupuq chij ruk' ri Abel rech ke'uchajej.

Pa jun q'ij ri Caín xuquje' ri Abel xkek'am b'i jun sipanik che ri Ajawaxel. Ri Caín xuk'am b'i ronojel uwäch täq utiko'n. Tek'uri' ri Abel xuk'am b'i jun utzalaj chij. Ri Jehová utz xril ri Abel xuquje' ri usipanik. Tek'uri' utz ta xril ri Caín xuquje' ri usipanik. ¿Aweta'm suche?

Are ta rumal che ri usipanik ri Abel qas utz chuwäch ri usipanik ri Caín. Are rumal che ri Abel jun utzalaj winaq. Sib'alaj kraj ri Ajawaxel xuquje' ri rachalal. Jet k'ut ri Caín che itzel; kraj ta ri rachalal.

Rumal la' ri Ajawaxel xub'ij che ri Caín che rajawaxik kuk'ex ri uno'j (kujal uch'ob'nik). Ri Caín xunimaj ta k'ut ri Ajawaxel. Sib'alaj petinäq royowal rumal che ri Ajawaxel are utz xril ri usipanik ri Abel. Ri Caín xub'ij che ri Abel: ‹Jo' jela' pa ri juyub'›. Chi' e k'o chila' kitikel, ri Caín xuch'ay ri Abel. Sib'alaj ko xuch'ayo, xa rumal wa' che xukamsaj. ¿Su kab'ij at chirij wajun nim itzelal che xub'an ri Caín che ri Abel?

Caín tijan kanmajik chi’ ukamisam chi ri Abel

Xsach ta ri Abel pa ujolom ri Ajawaxel chi' ri Abel kamnäq chik. Rumal che ri Abel jun utzalaj winaq, xuquje' ri Jehová kusach ta pa ujolom ri winaq che e utz. Rumal wa' kopan jun q'ij che ri Jehová kuya ri uk'aslemal ri Abel. Xa jewa' ri' ri Abel kkäm ta chik. Kuriq na jun uk'aslemal che k'ot uk'isik cho ruwäch Ulew. ¿La utz kqeta'maj kiwäch winaq junam ruk' ri Abel?

Ri Ajawaxel utz täj kril ri winaq junam ruk' ri Caín. Rumal la', chi' ri Caín xukamsaj ri Abel, ri Ajawaxel xutaq b'i naj chike ri ufamilia. Chi' ri Caín xb'e naj xuk'am b'i jun ranab', rech xub'an rixoqil che.

Q'axnäq chi ri q'ij ri Caín xk'eje' ralk'wal ruk' rixoqil. Ri nik'aj chik kalk'wal ri Adán ruk' ri Eva xek'ule'ik xuquje' xek'oji' kalk'wal. Tek'uri' xkeb'an k'i ri winaq cho ruwäch Ulew. Chqeta'maj kiwäch nik'aj.

Génesis 4:2-26; 1 Juan 3:11, 12; Juan 11:25.



Ri e tz’onoj

  • ¿Su täq chak xkemaj ub’anik ri Caín xuquje’ ri Abel?
  • ¿Su täq sipanik xkek’am b’i ri Caín xuquje’ ri Abel chuwäch ri Jehová?
  • ¿Suche ri Jehová utz xril usipanik ri Abel, xuquje’ suche utz ta xril ri usipanik ri Caín?
  • ¿Su qas uno’j ri Caín, tek’uri’ su xub’an ri Jehová che upixb’exik?
  • ¿Su xub’an ri Caín chi’ kitikel e k’o ruk’ ri Abel pa ri juyub’ (jib’)?
  • Chab’ij su xub’an ri Caín chi’ xukamsaj kan ri Abel.

Nik’aj chik kta’ chawe

  • Ksik’ix uwäch Génesis 4:2-26.

    ¿Su xub’an ri Jehová che uk’utik, che Caín qajnäq pa k’äx? (Gén. 4:7.)

    ¿Su xub’an ri Caín che uk’utik su k’o pa ranima’? (Gén. 4:9.)

    ¿Su kub’ij ri Jehová chirij ri ukamisaxik jun winaq? (Gén. 4:10; Isa. 26:21.)

  • Ksik’ix uwäch 1 Juan 3:11, 12.

    ¿Suche xpe jun nimalaj riwal ri Caín, xuquje’ suche kajawtaj che etal chaqe pa we täq q’ij ri’? (Gén. 4:4, 5; Pro. 14:30; 28:22.)

    ¿Su uk’utik kub’an ri Loq’alaj Pixab’ we ri täq qafamilia kkaj täj kkenimaj ri Jehová, xuquje’ su kqab’an che uchajexik ri qasuk’ilal? (Sal. 27:10; Mat. 10:21, 22.)

  • Ksik’ix uwäch Juan 11:25.

    ¿Su qas kutzujuj ri Jehová chike konojel chin täq kekam rumal kkeb’an ri utz? (Juan 5:24.)