Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 108: Pa b'e rech Damasco

B'antajik 108: Pa b'e rech Damasco

¿LA AWETA'M jachin la' ri achi k'o pulew? Are ri Saulo. Are xuchajej ri täq katz'yaq ri achijab' xkekamsaj ri Esteban. ¡Chawilampe' pa ri wachb'äl ri jun nimalaj saqil! ¿Su tijan kb'anik?

Chi' kamnäq chi ri Esteban, Saulo tijan ke'utzukuj ri täq rajtijoxel ri Jesús rech kub'an k'äx chike. Xok pa täq kachoch tek'uri' xe'uresaj loq xe'uya pa täq tz'apib'al. K'i chike ri täq ajtijoxel xe'anmaj b'i pa nik'aj chik tinamit chila' xkeya ub'ixik ri «utzij ri Dios». Xuquje' Saulo xb'e pa nik'aj chik tinamit che kitzukuxik ri täq rajtijoxel ri Jesús. Kimik xb'e Damasco. Tek'uri' chi' b'enäq pa b'e, k'o jun nimalaj xb'antajik:

Xaq k'ate', xpe jun saq pa ri kaj xqaj lo chirij Saulo, tek'uri' ri Saulo xtzaq pa ulew, junam che kqil pa ri wachb'äl. Tek'uri' jun ch'ab'al xub'ij wari': ‹¡Saulo, Saulo! ¿Suche kab'an k'äx chwe?› Ri täq achijab' e k'o ruk' Saulo xkil ri saq xuquje' xketa ri jun ch'ab'al tek'uri' xkech'ob' täj su tijan kub'ij.

Saulo xub’an moy rumal ri saqil

‹¿At jachin la'?› Xcha' Saulo. ‹In Jesús, che tijan kab'an k'äx chwe›, xcha' ri ch'ab'al. Jesús xub'ij wari' rumal che chi' ri Saulo kub'an k'äx chike ri rajtijoxel ri Jesús, Jesús kuna'o che are' tijan kb'an wi k'äx.

Saulo xuta chi wari' che: ‹¿Jesús, su rajawaxik kinb'an kimik?›

‹Chatwaljoq jat Damasco›, xcha' Jesús. ‹Chila' kb'ix chawe su kab'ano.› Chi' Saulo xwalajik xuquje' xutor ri ub'aq'wach, kkun täj krilo. ¡Kka'y ta chik! Rumal la', ri täq achijab' e k'o ruk' xkek'am b'i che uq'ab' pa Damasco.

Kimik ri Jesús xuch'ab'ej jun rajtijoxel k'o Damasco, xub'ij wari' che: ‹Chatwaljoq, Ananías. Jat pa ri b'e ub'i' Recta. Pa rachoch Judas chatzukuj jun achi ub'i' Saulo. Xincha'o rech kub'an jun ajpatanel we, nim ub'antajik›, xcha'.

Ananías xub'an wari'. Chi' xril uwäch Saulo, xuya ri uq'ab' puwi' tek'uri' xub'ij: ‹Ri Jesús xinutaq loq rech katka'y chi na xuquje' katnoj che rixlab'ixel ri Ajawaxel›. Tek'uri' pacha' kka'y solo't xtzaq lo che ri ub'aq'wach ri Saulo, ruk' wari' xkun chik xka'yik.

Saulo xub'an sib'alaj nim upatan rech kuya ub'ixik ri utzij ri Ajawaxel chike k'i täq winaq pa jalajoj täq tinamit. Tek'uri' xb'ix apóstol Pablo che, kqeta'maj na k'i täq jastaq chirij. Nab'e chqila' su xub'an ri Ajawaxel rech kub'an Pedro.

Hechos 8:1-4; 9:1-20; 22:6-16; 26:8-20.



Ri e tz’onoj

  • ¿Su xub’an Saulo chi’ kamnäq chi ri Esteban?
  • ¿Su xb’an pa ri b’e chi’ Saulo b’enäq pa Damasco?
  • ¿Su xtaq che ub’anik ri Saulo rumal ri Jesús?
  • ¿Su xub’ij Jesús che ri Ananías che kub’ano, xuquje’ suche ri Saulo xkun chi na xka’yik?
  • ¿Su jun chik ub’i’ ri Saulo, xuquje’ suche Saulo xub’an nim upatan?

Nik’aj chik kta’ chawe

  • Ksik’ix uwäch Hechos 8:1-4.

    ¿Su xuto’ wi ri ujachik ri kojonik cristiana ri k’i täq k’äx xpe chirij ri k’ak’ congregación cristiana, xuquje’ su b’anom kimik junam ruk’ wari’? (Hech. 8:4; Isa. 54:17.)

  • Ksik’ix uwäch Hechos 9:1-20.

    ¿Su oxib’ chak xuya Jesús che ri Saulo? (Hech. 9:15; 13:5; 26:1; 27:24; Rom. 11:13.)

  • Ksik’ix uwäch Hechos 22:6-16.

    ¿Su kqab’ano junam che xub’an Ananías, xuquje’ suche jun nimalaj ub’antajik? (Hech. 22:12; 1 Tim. 3:7; 1 Ped. 1:14-16; 2:12.)

  • Ksik’ix uwäch Hechos 26:8-20.

    ¿Suche kukub’saj kik’u’x ri täq k’o kik’ulaj che testigos täj ri xub’an Saulo chi’ xuk’ex uk’aslemal tek’uri’ xub’an cristiano? (Hech. 26:11; 1 Tim. 1:14-16; 2 Tim. 4:2; 1 Ped. 3:1-3.)