Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 86: Jun ch'umil xuk'ut kib'e

B'antajik 86: Jun ch'umil xuk'ut kib'e
Ri achijab’ che kkitijoj kib’ chike ri täq ch’umil

¿LA KATKUNIK kawil ri jun nimalaj ch'umil, tijan kuk'ut jun chike ri achijab'? Naj kepe wi ri täq achijab' ri', xuquje' kketijoj kib' chike ri täq ch'umil. Kkeb'ij che wajun k'ak' ch'umil ke'uk'am b'i ruk' jun winaq nimalaj ub'antajik.

Chi' ri täq achijab' xe'opan Jerusalén, xketa wari': ‹¿Jachi' k'o wi ri ak'al che kub'an na ajawinel pa kiwi' ri judíos?› Ri b'i'aj «Judíos» are jun chik kb'ix chike ri israelitas. ‹Naj ojk'o wi chi' xqil lo ri uch'umil›, xecha' ri achijab'. ‹Xojpe che uya'ik uq'ij.›

Chi' Herodes, ri ajawinel rech Jerusalén, xuta wari', sib'alaj xuxib'ij rib'. Kraj täj che kok chi jun chik ajawinel. Rumal la' xuta chike ri täq ajkojol tab'al toq'ob': ‹¿Jachi' kk'eje' wi ri ajawinel che b'im ojer?› Are wa' xkeb'ij: ‹Ri Loq'alaj Pixab' kub'ij che kk'eje' pa Belén›, xecha'.

Rumal la' Herodes xub'ij chike ri achijab' che e petinäq naj: ‹Chitzukuj ri ak'al. Chi' kiriqo, chib'ij chwe. In kwaj kinb'e che uya'ik uq'ij›, xcha'. ¡Tek'uri' Herodes are kraj kukamsaj ri ak'al!

Chi' xe'opan Jerusalén, ri ch'umil xuk'ut rib' che kiwäch. Tek'uri' ri ch'umil xb'in che kiwäch ri täq achijab' xopan Belén, tek'uri' xtak'e' chila' jachi' k'o wi ri ak'al. Chi' ri achijab' xe'ok pa ri ja xkil ri María ruk' ri alaj ak'al Jesús. Xkeya täq sipanik che Jesús. Tek'uri' Jehová xuya ub'ixik chike pa jun achik' che ketzalij ta ruk' Herodes. Rumal la' chi' xeb'e pa kitinamit xeb'e pa jun chik b'e.

Chi' Herodes xuto che ri täq achijab' xeb'ek, sib'alaj xpe royowal. Xutaq ukamsaxik ri alaj täq ne' rech Belén maja' k'o keb' kijunab' xuquje' ri k'o chi keb' kijunab'. Rumal la' Jehová xub'ij che José pa jun achik', tek'uri' José xe'uk'am b'i ri ufamilia Egipto. Chi' xuto che kamnäq chi ri Herodes, xe'uk'am chi lo ri María ruk' ri Jesús Nazaret. Waral Nazaret xk'iy wi ri Jesús.

¿Jachin la' kab'ij at che xub'an che ri ch'umil xka'yik? Musach chawe, ri täq achijab' xeb'e nab'e Jerusalén chi' xkil wajun ch'umil. Ri itzel Satanás xraj xukamsaj ri Uk'ojol ri Ajawaxel, xuquje' reta'm che ri ajawinel Herodes rech Jerusalén kraj kukamsaj ri Jesús. Rumal la' are Satanás xub'an che ri ch'umil xka'yik.

Mateo 2:1-23; Miqueas 5:2.



Ri e tz’onoj

  • ¿Jachin täq ri achijab’ e k’o pa ri wachb’äl, xuquje’ suche k’o jun chike tijan kuk’ut wajun nimalaj ch’umil?
  • ¿Suche xpe royowal, o riwal, ri ajawinel Herodes, xuquje’ su xub’ano?
  • ¿Jachi’ xe’uk’am wi b’i täq achijab’ ri ch’umil, xuquje’ suche xetzalij pa kitinamit pa jun chik b’e?
  • ¿Su taqonik xuya Herodes, xuquje’ suche?
  • ¿Su xub’ij Jehová che José?
  • ¿Jachin la’ xub’ano che xka’y ri ch’umil, xuquje’ suche?

Jun chik kta’ chawe

  • Ksik’ix uwäch Mateo 2:1-23.

    ¿Jampa’ ujunab’ ri Jesús xuquje’ jachi’ k’o wi ri rachoch chi’ ri täq ajq’ij xeb’e che rilik? (Mat. 2:1, 11, 16.)