Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 87: Ri Jesús k'o pa ri loq'alaj ja

B'antajik 87: Ri Jesús k'o pa ri loq'alaj ja

CHAWILAMPE' ri ala tijan kch'aw kuk' ri achijab'. Wa täq achijab' ri' e ajk'amal b'e pa ri loq'alaj ja rech ri Ajawaxel pa ri Jerusalén. Ri ala are ri Jesús. Nim chik, k'o chi 12 ujunab'.

Ri täq ajk'amal b'e xkexib'ij kib' che ri Jesús rumal che nim reta'mb'äl chirij ri Ajawaxel xuquje' chirij ri tz'ib'atal pa ri Loq'alaj Pixab'. Tek'uri', ¿suche e k'o ta waral ri José xuquje' ri María? ¿Jachi' e k'o wi? Chqilampe'.

Ri ala Jesús tijan kch’aw ruk’ ri e ajk’amal b’e

Ronojel täq junab' José kuk'am lo ri ufamilia pa Jerusalén rech keb'e pa ri nimq'ij nim ub'antajik ub'i' Pascua. Naj ri b'e Nazaret rech ke'opan Jerusalén. Nijun k'o uch'ich'. Ojer k'o ta wari'. K'i chike ri winaq keb'in che kaqan, kkekoj oxib' q'ij rech ke'opan Jerusalén.

Kimik ri José k'o chi jun nim ufamilia. Rumal la' rajawaxik che José ke'uril ri täq uchaq' ri Jesús xuquje' ri täq ranab'. Tek'uri' che wajun junab' ri', ri José ruk' ri María xuquje' ri täq kalk'wal xetzalij Nazaret. Xkechomaj che ri Jesús k'o kuk' ri nik'aj chik winaq che keb'anom b'i ri b'e. Tek'uri' chi' xk'is ri q'ij xetek'e'ik, tek'uri' ri Jesús k'o täj. ¡Xketzukuj che kixo'l täq kifamilia xuquje' che kixo'l täq kachi'l, tek'uri' k'o täj! Rumal la' xetzalij Jerusalén che utzukuxik.

K'isb'al re xkeriq chila'. Tijan ke'uta ri täq ajk'amal b'e xuquje' tijan kuta täq tzij chike. Ronojel ri winaq xkexib'ij kib' che sib'alaj nim reta'mb'äl. Tek'uri' María xub'ij che: ‹Wal, ¿suche xab'an wari' chaqe? Sib'alaj xojok che atzukuxik›.

‹¿Suche xinitzukuj?› Xcha' Jesús. ‹¿La iweta'm täj che rajawaxik in k'o pa rachoch ri Nutat?›

Ri Jesús sib'alaj utz krilo k'o jachi' kreta'maj wi chirij ri Ajawaxel. Öj rajawaxik che jela' kqab'ano ¿la qastzij? Chila' Nazaret, Jesús kb'e pa täq riqb'al ib' che uya'ik uq'ij ri Ajawaxel ronojel täq semana. Rumal che ri Jesús kuta ronojel ri kb'ixik, xreta'maj k'i täq jastaq chirij ri Loq'alaj Pixab'. Chqab'ana' qe junam ruk' xub'an Jesús.

Lucas 2:41-52; Mateo 13:53-56.



Ri e tz’onoj

  • Chawila’ pa ri wachb’äl, ¿jumpa’ ujunab’ ri Jesús, xuquje’ jachi’ k’o wi?
  • ¿Su kub’an José ruk’ ri ufamilia ronojel täq junab’?
  • Chi’ kik’amom chi b’i jun q’ij b’e rech ketzalij pa kachoch, ¿suche xetzalij José ruk’ María Jerusalén?
  • ¿Jachi’ k’o wi ri Jesús chi’ ri José ruk’ ri María xe’opan Jerusalén, xuquje’ suche ri winaq xkexib’ij kib’?
  • ¿Su xub’ij Jesús che ri unan?
  • ¿Su kqab’ano junam che xub’an Jesús chi’ kqeta’maj chirij ri Ajawaxel?

Nik’aj chik kta’ chawe

  • Ksik’ix uwäch Lucas 2:41-52.

    Ri taqonik rech ojer kub’ij che rajawaxik che xaq xiw ri achijab’ keb’e pa ri nimq’ij kb’an ronojel täq junab’, tek’uri’ ¿su jun utzalaj k’utb’al xkeya José ruk’ María chike ri tat nan kimik? (Luc. 2:41; Deu. 16:16; 31:12; Pro. 22:6.)

    ¿Su jun utzalaj k’utb’al xuya kan Jesús chike ri alab’om xuquje’ alitomab’ kimik chi’ xe’unimaj ri utat unan? (Luc. 2:51; Deu. 5:16; Pro. 23:22; Col. 3:20.)

  • Ksik’ix uwäch Mateo 13:53-56.

    ¿Jachin täq ri kajib’ rachalal ri Jesús kub’ij ri Loq’alaj Pixab’, xuquje’ su xkeb’an e keb’ pa ri congregación cristiana chi’ q’axnäq chi keb’ oxib’ junab’? (Mat. 13:55; Hech. 12:17; 15:6, 13; 21:18; Gál. 1:19; Sant. 1:1; Jud. 1.)