Ir al contenido

Ir al índice

Testigos rech Jehová

Uchaʼik jun chʼabʼal quiché

B'antajik 79: Daniel k'o che kixo'l täq köj

B'antajik 79: Daniel k'o che kixo'l täq köj

¡CHAWILAMPE'! Ri Daniel k'o pa jun k'äx. ¡Tek'uri' ri täq köj k'ot kkeb'an che! ¿La aweta'm suche? ¿Jachin la' xya'ow ri Daniel che kixo'l wa täq köj ri'? Chqilampe'.

Ri ajawinel rech Babilonia kimik ub'i' Darío. Darío sib'alaj utz kril ri Daniel rumal che jun utzalaj achi xuquje' nim reta'mb'äl, xuquje' xub'an ajq'atb'altzij che pa rajawb'äl. Rumal la', nik'aj achijab' itzel xkil ri Daniel, rumal la' xkeb'an wari':

Darío

Xeb'e ruk' Darío tek'uri' xkeb'ij wari' che: ‹Oh ajawinel, qonojel kqaj, che kakoj jun taqonik che kub'ij, che chupam 30 q'ij nijun kkunik kub'an uch'awem che jun udios xuquje' che jun chik achi, xaq xiw chawe kkeb'an ri kich'awem. We k'o jun kniman täj, rajawaxik kya' che kixo'l ri täq köj›, xecha'. Darío reta'm täj suche wa täq achijab' kkaj kekoj wajun taqonik ri'. Rumal la' Darío xub'ij che utz wari' ri xkeb'ij, rumal la' xutz'ib'aj wajun taqonik. Tek'uri' xkun ta chik kresaj wajun taqonik.

Chi' ri Daniel xuta wari', xb'e pa rachoch tek'uri' xub'an ri uch'awem junam che kub'an ronojel täq q'ij. Ri itzel täq achijab' keta'm che Daniel kuya ta kan ub'anik uch'awem ruk' Jehová. Xekikotik, rumal che xopan ri q'ij che kekunik kkekamsaj ri Daniel.

Chi' ri ajawinel Darío xrilo su tijan kb'antajik, sib'alaj xb'isonik. Tek'uri' kkun ta chik kresaj wajun taqonik, rumal la' rajawaxik xutaq uya'ik ri Daniel che kixo'l ri täq köj. Are wa' xub'ij ri ajawinel che Daniel: ‹Are b'a' ri Ajawaxel ri kaya uq'ij katuto'›.

Darío sib'alaj kb'isonik rumal la' xkun täj xwar pa jun chaq'ab' ri'. Chi' xsaqarik xb'e chanim che urilik ri Daniel. Chawilampe' pa ri wachb'äl. Darío xub'ij wari': ‹¡Daniel, ri upatanel ri k'aslik Ajawaxel! ¿La xatuto' ri Ajawaxel che kiwäch ri köj?›

Daniel pa ri kijul ri köj

‹Ri Ajawaxel xutaq lo jun ángel›, xcha' Daniel, ‹xutz'apej kichi' ri täq köj rech kkeb'an ta k'äx chwe›, xcha'.

Sib'alaj xkikotik ri ajawinel rumal wari'. Xutaq che uresaxik ri Daniel pa ri jul. Tek'uri' xe'uya b'i ri itzel täq achijab' che kixo'l ri täq köj che xkaj xkekamsaj ri Daniel. Chi' maja' na ke'opan wa itzel täq achijab' chupam ri jul, ri täq köj xe'ok che kitijowik.

Rumal la' ri ajawinel Darío xutz'ib'aj chike konojel ri winaq: ‹Chib'ana' nim che ri rajawaxel ri Daniel. Rumal che kub'an nim täq milagros. Xuto' ri Daniel rech ri täq köj xketij täj›, xcha'.

Daniel 6:1-28.



Ri e tz’onoj

  • ¿Jachin la’ ri Darío, xuquje’ su kuchomaj chirij ri Daniel?
  • ¿Su xekunik xkeb’an ri itzel täq achijab’ che xub’an ri Darío?
  • ¿Su xub’an Daniel chi’ xuta wajun k’ak’ taqonik?
  • ¿Suche sib’alaj xb’ison ri Darío che xkun täj xwarik, xuquje’ su xub’ano chi’ xsaqarik?
  • ¿Su xub’ij Daniel che ri Darío?
  • ¿Su xb’an chike ri itzel täq achijab’ che xkaj xkekamsaj ri Daniel, xuquje’ su xutz’ib’aj Darío chike konojel ri winaq pa rajawb’äl?

Nik’aj chik kta’ chawe

  • Ksik’ix uwäch Daniel 6:1-28.

    ¿Suche junam ri k’äx xb’an che Daniel ojer ruk’ ri k’äx kkeb’an kimik ri itzel täq winaq che uq’atixik ri kichak ri testigos rech Jehová? (Dan. 6:7; Sal. 94:20; Isa. 10:1; Rom. 8:31.)

    ¿Su ub’anik kkeb’an ri täq upatanel ri Ajawaxel junam che xub’an Daniel ruk’ xub’an ko che kiwäch ri «e q’atb’altzij ri e kojom» cho ruwäch Ulew? (Dan. 6:5, 10; Rom. 13:1; Hech. 5:29.)

    ¿Su ub’anik kqab’an che upatanexik ri Jehová ‹ronojel täq q’ij› junam ruk’ xub’an Daniel? (Dan. 6:16, 20; Fili. 3:16; Apoc. 7:15.)