CHIʼ kojonaq chik, ri Pablo xumaj ubʼixik ri utzalaj taq tzij chirij ri Rajawbʼal ri Dios rukʼ kikotemal. Tekʼuriʼ kimik are chi ri areʼ rajawaxik kuchʼij nimaʼq kʼax. Wajun apóstol riʼ che kkos taj xubʼan bʼi nimaʼq bʼe rech xubʼij chirij ri qʼatbʼal tzij che kubʼan na ri xraj ri Dios ojer chike ri winaq.

Chiʼ xbʼe nabʼe mul che kisolixik ri e tinamit, xusolij ri tinamit Listra xuqujeʼ xukunaj jun achi che ubʼanom kʼax ri raqan chiʼ xalaxik. Ri winaq che xkilo ri xubʼano xkimajij ubʼixik che ri apóstol xuqujeʼ ri rachiʼl, Bernabé, e dioses. Sibʼalaj kʼax xkiriq che kiqʼatexik ri winaq rech xkoj ta tabʼal toqʼobʼ chkiwach. Tekʼuriʼ, ri winaq xkoj kikʼuʼx kumal ri kikʼulel ri Pablo rumal laʼ xkichʼay che abʼaj. Pa neʼ e areʼ xkibʼij che xkikamisaj, ri Pablo xkam taj, xuqujeʼ xtzalij chi pa ri tinamit rech kukubʼsaj kikʼuʼx ri ajtijoxelabʼ.

Chiʼ e qʼaxinaq chi ri qʼij, jujun cristianos judíos xkaj che ri kojonelabʼ che e judíos taj kkinimaj jun chike ri taqanik che xyaʼ che ri Moisés. Rech kkisukʼumaj ri chʼoj, ri Pablo xuqʼaxej ubʼixik chike ri apóstoles xuqujeʼ ri ajkʼamal bʼe che e kʼo pa Jerusalén. Chiʼ kilom chi ri kubʼij ri Utzij ri Dios xuqujeʼ kitoʼm chi ri utobʼanik ri uxlabʼixel, ri apóstoles riʼ xkitzʼibʼaj bʼi wuj chike ri congregaciones xuqujeʼ xkibʼij chike che utz taj kkiqʼijilaj tyox, kkitij kikʼ, tiʼj che esam ta ukikʼel xuqujeʼ ubʼanik tzʼil taq mak. Ri e taqonik riʼ «e rajawaxik», tekʼuriʼ rajawaxik taj kkibʼan ronojel ri taqonik che xyaʼ che ri Moisés (Hechos 15:28, 29).

Chiʼ xbʼe che ri ukabʼ mul che xeʼusolij ri e tinamit, ri Pablo xusolij Berea, jun tinamit che xkʼojiʼ pa ukʼolbʼal Grecia kimik. Ri Judíos chiʼ e kʼo chilaʼ rukʼ ronojel kanimaʼ xkibʼan ri xbʼix chike, ronojel qʼij xkil ri kubʼij ri Utzij ri Dios rech kkilo we qastzij ri tajin kketaʼmaj. Chiʼ xeqʼax ri qʼij, ri Pablo rajawaxik xanimaj chi bʼi jumul chkiwach ri ukʼulel. Xbʼe Atenas, jelaʼ xopan chkiwach jupuq winaq che nim ketaʼmabʼal, xuya jun utzalaj chʼabʼal che xsach ta pa kijolom xuqujeʼ xeʼuyoqʼ ta ri winaq rukʼ ri chʼabʼal.

Chiʼ ubʼanom chi urox mul usolinik, ri Pablo xbʼe pa Jerusalén. Chiʼ xbʼe pa ri loqʼalaj ja, jupuq winaq xkaj xkikamisaj. Are kʼu ri ajchʼoj rech Roma xekiqʼatej xuqujeʼ xkikʼam bʼi ri Pablo rech kkikʼot uchiʼ. Rumal che areʼ aj Roma xyaʼ che xbʼe chuwach ri ajqʼatal tzij Félix. Ri judíos xekun ta che ukʼutik che qastzij ri kkibʼij chirij. Tekʼuriʼ, ri Festo —ri xok pa ukʼaxel ri Félix— kraj kuya pa kiqʼabʼ. Rech kyaʼ taj, ri Pablo xubʼij che kraj kbʼe chuwach ri César, ri ajqʼatal tzij xubʼij: «Chuwach kʼu ri César katbʼe wi na» (Hechos 25:11, 12).

Pa Roma xqʼat wi tzij puwiʼ ri Pablo. Rumal laʼ xbʼe pa jun jukubʼ puwiʼ ri plo pa bʼe che kbʼe Italia, are kʼu ri jukubʼ xok bʼi pa ri jaʼ, rumal laʼ xuqʼaxej ri qʼalaj pa ri tinamit Malta. Chiʼ xopan pa Roma, xkʼojiʼ pa jun qajom ja kebʼ junabʼ. Pa neʼ kʼo pa kiqʼabʼ ri qʼatbʼal tzij, ri areʼ rukʼ kikotemal xuya ubʼixik ri Ajawbʼal chike ri xekilaʼ.

(Esam chupam Hechos 11:22–28:31.)