¿LA KEKUN ri rajpatanel ri Dios kkibʼan sukʼ we kkiriq nimaʼq taq kʼax, pa neʼ qʼalaj taj che kʼo upatan che e sukʼ? Jun achi ubʼiʼ Job xqʼax pa wajun kʼax riʼ. Chqetaʼmaj ri xbʼantajik.

Ri Job are rachalal ri Abrahán che xkʼojiʼ pa ri kʼolbʼal che kimik are Arabia chiʼ e kʼo ri israelitas pa Egipto. Pa jun qʼij, qas xchomax chirij ri Job pa jun riqbʼal ibʼ che Jehová xubʼan kukʼ ri ángeles pa ri kaj. Chilaʼ kʼo wi ri Satanás. Chkiwach konojel, ri Jehová utz xchʼaw chirij ri usukʼilal ri Job che kʼot kjunamataj rukʼ, rukʼ wariʼ xukʼutu che ukubʼsam ukʼuʼx chirij. Tekʼuriʼ ri Satanás xubʼij che Job sukʼ che ri Dios rumal che kuya jastaq che, xuqujeʼ kutoʼ chuwach kʼax. Xubʼij we kesax ri jastaq che, kniman ta chi riʼ.

Ri Dios xuya che ri Satanás xresaj ri jastaq re ri Job, ri e ralkʼwal xuqujeʼ xuya jun yabʼil chirij. Rumal che ri Job retaʼm taj che are ri Satanás tajin kuya ri kʼax che, kkun taj kuchʼobʼo jasche ri Dios kutoʼ taj. Pa neʼ kuchʼobʼ taj, xuxutuj ta ri Jehová.

Tekʼuriʼ xeʼopan che rilik ri Job oxibʼ achijabʼ che kkibʼij che e rachiʼl xuqujeʼ xeʼok che upixbʼexik. Rukʼ ri xkibʼij che, che e kʼo pa ri wuj rech ri Utzij ri Dios ubʼiʼ Job, xkaj che ri Job kuchomaj che ri Dios tajin kukʼajisaj uwach rumal che xubʼan umak chelaqʼal. ¡Are ta ri qastzij! Xuqujeʼ xkibʼij che, che ri Dios kok ta il chike ri rajpatanel xuqujeʼ kukubʼsaj ta ukʼuʼx chikij. Tekʼuriʼ ri Job xraj taj xukoj ri xkibʼij che rumal laʼ xubʼij chike che sukʼ chuwach ri Dios kʼa pa ri ukamikal.

Tekʼuriʼ, ri Job utz ta ri xubʼano chiʼ are más xok il che utoʼik ribʼ. Ri Elihú, jun ala che xuta ronojel ri xbʼixik, xupixbʼej ri Job rumal che are más xok il chirij ri xbʼix che, are ta xok il chirij ri ubʼiʼ xuqujeʼ ri uqʼatbʼal tzij ri Jehová. Xuqujeʼ, xeʼuyaj ri achijabʼ.

Kʼisbʼal re, ri Jehová xuya pixabʼ che ri Job. Xukoj ri utzalaj taq jastaq che ubʼanom, rech xukʼut chuwach che ri winaq kʼot upatan chiʼ kjunamax rukʼ ri unimal ri Dios. Ri Job xubʼan ta nim che ribʼ xuqujeʼ xubʼan ri xbʼix che. Rumal che, ri Jehová «kutoqʼobʼisaj kiwach ri winaq, kel ukʼuʼx chike», xukunaj xuqujeʼ xutewchij rukʼ nim qʼinomal xuqujeʼ xuya chi lajul ralkʼwal (Santiago 5:11). Ri usukʼilal ri Job xtobʼan che ukʼutik chirij ri xubʼij ri Satanás xuqujeʼ xukʼutu che ri winaq kekunik kkibʼan sukʼ chuwach ri Dios pa neʼ kkiriq nimaʼq kʼax.

(Esam chupam ri wuj rech Job.)