KʼUTUNEM 17
Jesús xuya ubʼixik ri rajawbʼal ri Dios
Ri Jesús xukʼut kʼi jastaq chkiwach ri rajtijoxelabʼ, tekʼuriʼ are ri Rajawbʼal ri Dios ri qas xuya ukʼutik
¿JASCHE xpe ri Jesús cho ri uwach Ulew? Areʼ xubʼij jasche: «Kintzijoj ri utzalaj taq tzij re ri rajawibʼal ri Dios chke ri winaq chilaʼ, che kʼu waʼ in taqom wi uloq» (Lucas 4:43). Chqilaʼ kajibʼ qastzij che Jesús xukʼut chirij ri Ajawbʼal, ri qas xuya ubʼixik.
1. Ri Jesús kubʼan Ajawinel riʼ. Areʼ xubʼij che are ri Mesías (Juan 4:25, 26). Xuqujeʼ, xubʼij che areʼ are ri Ajawinel che xkʼut chuwach ri ajqʼaxal tzij Daniel. Xubʼij chike ri apóstoles (ri rajtijoxelabʼ ri e kʼo rukʼ) che kopan na jun qʼij che areʼ kkubʼe pa ri «utem, che sibʼalaj nim uqʼij» xuqujeʼ ri rajtijoxelabʼ kekʼojiʼ chkixoʼl jupuq winaq che xa e ajilam rech kkitoʼ che uqʼatik tzij (Mateo 19:28). Chike wajun jupuq riʼ xubʼij «chʼutinalaj jumulaj nuchij» chike. Xuqujeʼ xubʼij «e kʼo chi kʼu nikʼiʼaj nuchij» che keʼok ta riʼ chkixoʼl ri alaj chʼutinalaj jupuq (Lucas 12:32; Juan 10:16).
2. Ri Rajawbʼal ri Dios kukʼam lo qas sukʼilal. Ri Jesús xukʼutu che ri Ajawbʼal kusukʼumaj ronojel ri itzelal: ri xubʼan ri Satanás che ri ubʼiʼ ri Dios. ¿Jas kubʼan che usukʼumaxik? Kresaj ri itzelal che xbʼan chirij che xumaj lo pa ri Edén (Mateo 6:9, 10). Ri Cristo xukʼutu che chiʼ kuqʼat tzij xaq ta keʼuchaʼ ri winaq, rumal che xubʼij chirij ri Dios chike achijabʼ, ixoqibʼ, qʼinomabʼ xuqujeʼ mebʼaʼibʼ, areʼ xeʼuchaʼ taj. Pa neʼ xtaq loq rech xubʼij ri utzij ri Dios chike ri israelitas, qas xukoj uchuqʼabʼ rech xeʼutoʼ ri aj Samaria xuqujeʼ winaq rech nikʼaj chik tinamit. Areʼ junam ta kukʼ ri ajkʼamal bʼe kech ri israelitas, che xa kekichaʼ ri winaq.
3. Ri Rajawbʼal ri Dios kuyuj ta ribʼ kukʼ ri winaq che kʼo pa uqʼabʼ ri Satanás. Chiʼ xkʼojiʼ ri Jesús cho ri uwach Ulew kʼo kʼax pa kiwiʼ ri judíos, rumal che ri kitinamit kʼo pa uqʼabʼ jun chik tinamit. Tekʼuriʼ, ri Jesús xraj taj che ri winaq xkikoj pa ri política (Juan 6:14, 15). Chiʼ tajin kchʼaw rukʼ jun ajqʼatal tzij, xubʼij: «Ri wajawibʼal man ajuwach ulew taj» (Juan 18:36). Chike ri rajtijoxelabʼ xubʼij: «Man ix ta kʼu aj uwach ulew» (Juan 15:19). Xuqujeʼ, xraj taj che xkikoj ri kamisanibʼal, pa neʼ che utoʼik (Mateo 26:51, 52).
«Kebʼusolij [...] ri alaj taq tinimit. Kutzijoj xuqujeʼ kuqʼalajisaj ri utzalaj tzij re ri rajawibal ri Dios.» (Lucas 8:1)
4. Ri Cristo kuqʼat tzij rukʼ loqʼoqʼenik. Ri Jesús xubʼij che keʼutoʼ ri rajtijoxelabʼ (Mateo 11:28-30). Je waʼ xubʼano. Xuya pixabʼ chike rech más ta keʼok il che ri jastaq, rech are ta kkichomaj uchʼakik ri jastaq, ri kkibʼano rech e utz kukʼ ri nikʼaj chik xuqujeʼ rech kkiriq kikotemal (Mateo, capítulos 5 kopan 7). Areʼ kloqʼoqʼenik xuqujeʼ kʼax ta uchʼabʼexik. Konojel ri e winaq, pa neʼ e mebʼaʼ, kkikochʼo kekilaʼ rumal che kkichʼobʼo che areʼ nim kerilo xuqujeʼ keʼuyoqʼ taj. ¿La kʼo jun kraj taj che are ri Jesús ajawinel?
Ri Jesús xuqujeʼ xubʼan kʼi milagros, are jun kʼutbʼal re ri kubʼan na chiʼ kubʼan Ajawinel rech ri Rajawbʼal ri Ajawaxel. ¿Jas xuriq rukʼ wariʼ? Chqilaʼ.
