Pa 1 Corintios 6:1-8, ri apóstol Pablo xchʼaw chirij ri chʼoj chkixoʼl ri e cristianos. Ri nabʼe, xubʼij rukʼ royowal rumal che e kʼo jujun cristianos rech ri tinamit Corinto xkikochʼo xebʼe «chkiwach ri man e kojonelabʼ täj che utaʼik qʼatbʼal tzij» (versículo 1). Xuqujeʼ, xubʼij che ri chʼoj kilik, o ksukʼumax pa ri congregación chkiwach ta ri e ajqʼatal tzij. Chqilaʼ jujun rumal, pa ri wuj che xutzʼibʼaj ri Pablo tekʼuriʼ kqil na jampaʼ weneʼ rajawaxik täj kbʼan ri xubʼij. 

Chiʼ kʼo chʼoj chkixoʼl ri cristianos rumal chak o pwaq, ri Jehová kraj che kqasukʼumaj je jas ri kraj areʼ, are ta jas ri kqaj öj (Proverbios 14:12). Ri Jesús xubʼij, che utz aninaq kqasukʼumaj ri qachʼoj, are ta kqaya che, che knimarik (Mateo 5:23-26). Sibʼalaj bʼisobʼal, che e kʼo cristianos kkaj kkibʼan chʼoj rukʼ wariʼ kebʼe chkiwach ri e ajqʼatal tzij. Ri Pablo xubʼij: «Qastzij kinbʼij chiwe chi are jun nimalaj tzaqik waʼ chi kʼo uchʼoj ri jun rukʼ ri jun chik». ¿Jasche xubʼij wariʼ? Rumal che, rukʼ ri kkibʼano kyoqʼ ri ubʼiʼ ri Ajawaxel o ri congregación. Rumal laʼ are utz kqabʼan ri xubʼij: «¿A mat are utz na we xaq kikuyu ri kʼäx ri kabʼan chiwe?» (versículo 7, El Nuevo Testamento en Quiché Centro-Occidental, ortografía actualizada).

Ri Pablo xubʼij che ri Ajawaxel uyaʼom jun jastaq che kojuto chiʼ kʼo chʼoj chqaxoʼl. Xubʼij che pa ri congregaciones e kʼo achijabʼ che nim ketaʼmabʼal rumal che kitijom kibʼ chirij ri Loqʼalaj Pixabʼ. Qastzij wi, ri e ajkʼamal bʼe kekun che «uqʼatik tzij chkixoʼl ri qachalal» puwiʼ ronojel «ri jastaq re we kʼaslemal riʼ» (versículos 3-5). Xuqujeʼ, ri Jesús xubʼij rech ksukʼumax ri chʼoj che weneʼ rumal —molom täq tzij o elaqʼ— utz kbʼan oxibʼ jastaq. Ri nabʼe are utz kojchʼaw rukʼ pa utukel ri qachalal che öj chʼojinaq rukʼ; tekʼuriʼ we kujutzir täj, ri ukabʼ rajawaxik kqabʼano are kojchʼaw rukʼ chuwach jun o kebʼ qachalal chik; tekʼuriʼ we kuta ta ri kqabʼij che, ri urox  are utz kqabʼij chike ri e ajkʼamal bʼe rech ri congregación (Mateo 18:15-17).

Qastzij wi, ri kichak ri e ajkʼamal bʼe are ta uyaʼik pixabʼ kech ri ajqʼatal tzij chirij chak o puwiʼ pwaq. Rumal laʼ utz täj we e areʼ kkibʼij chike ri tajin kkibʼan chʼoj ri kkibʼano o ri kkibʼan täj. Ri utz kkibʼano, are kekitoʼ ri e qachalal rech kkibʼan pa ri kikʼaslemal ri kubʼij ri Loqʼalaj Pixabʼ xuqujeʼ rech kechʼojin ta chik. We ri chʼoj sibʼalaj nim xuqujeʼ kkichʼobʼ täj jas kkibʼan che usukʼumaxik, utz we kkaj kkibʼij che ri ajsolinel o che ri sucursal kech ri testigos rech Jehová. Tekʼuriʼ, ri xqetaʼmaj chirij ri xubʼij ri Pablo kʼo jujun mul rajawaxik täj kbʼanik. Chqilaʼ jujun chike.

Chiʼ kojbʼe chuwach ri qʼatbʼal tzij rukʼ jun qachalal ronojel mul täj kubʼij che kqaj kqabʼan chʼoj. Weneʼ xa rumal che kqaj kqabʼan ri jastaq rukʼ utzil o kqaj kqabʼan chuwach ri qʼatbʼal tzij. Jujun kʼutbʼal, chiʼ jun winaq kraj kuchup ri ukʼulanem, rech kekanaj kan ri akʼalabʼ rukʼ, rech kkilo jampaʼ pwaq kajwataj che ri kiwa ri akʼalabʼ, kqatoqʼij (o kqataʼ) ri pwaq che bʼim che kyaʼ chaqe, kqabʼij chuwach ri qʼatbʼal tzij ri rumal che jun chik kkun täj kutoj ri ukʼas rech kuya jun chik jastaq che ukʼaxel o chiʼ kqabʼan jun wuj rech jun echabʼal. Chiʼ jun winaq kojutzujuj chuwach ri qʼatbʼal tzij chirij jun jastaq öj kojkunik kqasikʼij ri winaq chuwach ri qʼatbʼal tzij rech kojtoʼik. *

Ri cristiano che kbʼe chuwach ri qʼatbʼal tzij rumal ri jastaq che xqil kanoq tajin ta kuxutuj ri upixabʼ ri Ajawaxel che xuya ri Pablo, tekʼuriʼ rajawaxik che kubʼan ta rumal che xa kraj kchʼojinik. * Masach chaqe ri qas rajawaxik kqabʼano: are ubʼanik nim che ri ubʼiʼ ri Ajawaxel xuqujeʼ ri utzukuxik ri jororibʼal pa ri congregación xuqujeʼ rech kojtukin täj. Rumal che ri kchʼobʼ wi che öj terneʼl re ri Cristo are, ri loqʼoqʼenik, ri loqʼoqʼenik che «man kutzukuj ta ri utz che chbʼil ribʼ» (1 Corintios 13:4, 5; Juan 13:34, 35).