Kʼutunem 13

Su kabʼano rech kariq ri qastzijaläj kojonem

¿La utz kril ri Ajawaxel ronojel ri täq kojonem, o xiw jun? (1)

¿Suche e kʼo kʼi täq kojonem kkebʼij che e cristianos? (2)

¿Su kabʼano rech kawetamaj chin e qastzij täq cristianos? (3-7)

1. Ri Jesús xa jun qastzij kojonem cristiano xutik kanoq. Rumal laʼ kimik xiw kʼo jupuq (jun mulaj) winaq che qastzij kkeyaʼ uqʼij ri Ajawaxel Jehová (Juan 4:23, 24; Efesios 4:4, 5). Ri Loqʼalaj Pixabʼ kukʼutu che xa e jujun täq kebʼin chupam ri latzʼ uwäch bʼe che kukʼam bʼi pa kʼaslemal (Mateo 7:13, 14).

2. Ri Loqʼalaj Pixabʼ ubʼim kanoq che chiʼ kekäm ri utaqonelabʼ (apóstoles) nojim keʼok kʼutunem che qastzij täj pa ri congregación cristiana xuqujeʼ jaljoj täq bʼantajik che e cristianos täj. E kʼo winaq che xeʼok che ukʼutik täq kʼutunem che e qastzij täj, rukʼ waʼ xekunik xkesaj jujun täq ajkojonel che upatanexik ri Cristo (Mateo 7:15, 21-23; Hechos 20:29, 30). Rumal waʼ che kqilo che e kʼo jaljoj täq kojonem che kkebʼij che e cristianos. ¿Su kqabʼano rech kqetamaj chin e qastzij täq cristianos?

3. Chin täq kkeloqʼoqʼej (kekloʼoj) kibʼ e are ri qastzij täq cristianos (Juan 13:34, 35). Kʼutum che kiwäch che utz täj che kkebʼan nim che kibʼ che kiwäch nikʼaj chik. Xuqujeʼ kʼutum che kiwäch che utz täj kketzlaj kiwäch aj nikʼaj chik täq tinamit (Hechos 10:34, 35). Rumal waʼ ketobʼon ta pa täq chʼoj. Ri qastzij täq cristianos kekaj kibʼ junam che e achalal ronojel (1 Juan 4:20, 21).

4. Jun chik etal (uwäch) che kukʼutu chin chike ri qastzij kojonem: are che chin täq e kʼo chupam, nim kekil ri Loqʼalaj Pixabʼ. Kkekʼamo che are Utzij ri Ajawaxel xuqujeʼ kkekojo su täq kubʼij chike (Juan 17:17; 2 Timoteo 3:16, 17). Chekiwäch, Rutzij ri Ajawaxel are sibʼalaj nim uqʼij chuwäch kikojonik o kikʼutunik ri winaq (Mateo 15:1-3, 7-9). Kkekoj kichoqʼabʼ che ubʼanik wariʼ pa  kikʼaslemal. Are täj che jun kkekʼutu, tekʼuriʼ jun chik kkebʼano (Tito 1:15, 16).

5. Chin täq e kʼo pa ri qastzij kojonem, nim kekil rubʼiʼ ri Ajawaxel (Mateo 6:9). Ri Jesús xuya ubʼixik rubʼiʼ ri Ajawaxel, Jehová, xuqujeʼ ri qastzij täq cristianos jewaʼ kkebʼan kimik (Juan 17:6, 26; Romanos 10:13, 14). ¿Chin täq kkeya ubʼixik ubʼi ri Ajawaxel chi täq ja pa atkʼo wi?

6. Ri qastzij täq cristianos rajawaxik kkeya ubʼixik Rajawbʼäl ri Ajawaxel. Jelaʼ xubʼan ri Jesús. Ronojel täq qʼij ri Jesús xuya ubʼixik ri Ajawbʼäl (Lucas 8:1). Xuqujeʼ xeʼutaq rutijoxelabʼ che ubʼixik we tzij riʼ cho ronojel uwäch Ulew (Mateo 24:14; 28:19, 20). Ri qastzij täq cristianos kkekojo che xiw Rajawbʼäl rech ri Ajawaxel kukʼam lo ri qastzij jororibʼäl xuqujeʼ kresaj ri kʼäx cho ruwäch Ulew (Salmo 146:3-5).

7. Rutijoxelabʼ ri Jesús kkebʼan ta ri itzelal kʼo cho ruwäch Ulew (Juan 17:16). Kkekoj ta kibʼ pa täq política xuqujeʼ kkekoj ta kibʼ pa täq chʼoj kech winaq. Kkebʼan ta junam che kibʼ kukʼ ri winaq ajbʼanol täq itzelal (Santiago 1:27; 4:4). ¿La awetaʼm kiwäch jupuq winaq ajkojonel che are täq etal riʼ kawil chike, che e qastzij täq cristianos?

[Täq wachbʼäl pa ri 26 xuqujeʼ 27 uxaq wuj]

Ri qastzij täq cristianos kekaj kibʼ, kkenimaj ri Loqʼalaj Pixabʼ xuqujeʼ kkeya ubʼixik Rajawbʼäl ri Ajawaxel