Ri carta xtaq bʼi chke ri Filipenses 2:1-30
2 We ri ix kixkowinik kiya ichuqʼabʼ chbʼil taq iwibʼ rumal che ix cristianos, we kixkowinik kikubʼsaj kikʼuʼx nikʼaj chik rukʼ loqʼoqʼebʼal, we kixkowinik xa jun kubʼan ri ichomanik, we kikʼut loqʼoqʼebʼal y we kel ikʼuʼx chke nikʼaj chik,
2 sibʼalaj kinkikot riʼ iwumal, rumal laʼ makʼojiʼ jachoj ibʼ chixoʼl, xaneʼ chiloqʼoqʼej iwibʼ y xa jun chubʼanaʼ ri ichomanik.
3 Mibʼan wariʼ xa rumal titikil o xa rumal che kibʼan nim che iwibʼ, xaneʼ chimachʼachʼej iwibʼ y chichomaj che ri e nikʼaj chik más nim kibʼanik chiwach ix.
4 Xaq xiw ta kixchoman chrij ri utz chiwe ix, xaneʼ xuqujeʼ ri utz chke ri nikʼaj chik.
5 Rajawaxik junam ri ichomanik rukʼ ri Cristo Jesús,
6 rumal che ri areʼ paneʼ kjunamataj rukʼ ri Dios pero kʼo ta wi jumul xukoj ribʼ che Dios.
7 Xaneʼ xuya kan juntir, xraj xok che esclavo y xux winaq.
8 Y are chiʼ winaq chik, xumachʼ ribʼ, xniman pa ronojel ri ukʼaslemal kʼa xkamisax cho ri cheʼ re kʼaxkʼolil.*
9 Rumal laʼ ri Dios xunimarisaj uqʼij chkiwach konojel y xuya taqanik pa uqʼabʼ.
10 Rech konojel kkiya kibʼ pa taqik che ri Jesús, ri e kʼo pa ri kaj, ri e kʼo cho ri uwach ulew y ri e kʼo chuxeʼ ri ulew.
11 Rech ri winaq re ronojel taq idiomas kketaʼmaj che ri Jesucristo are ri Qajaw, jeriʼ kyaʼ uqʼij ri Dios, ri Tataxel.
12 Rumal laʼ loqʼalaj taq wachalal amaqʼel chixnimanoq, xaq xiw taj are chiʼ in kʼo iwukʼ xaneʼ xuqujeʼ are chiʼ in kʼo taj. Chikojoʼ ichuqʼabʼ rech kiriq ri i salvación y nim chiwilaʼ wi ri Dios y chixiʼj iwibʼ chuwach.
13 Ri Dios kuya qachuqʼabʼ rech kqabʼan ri utz krilo, y xaq xiw ta laʼ xaneʼ xuqujeʼ kojutoʼ rech kqaj kqabʼano y kojkowin che ubʼanik.
14 Mixchʼachʼatik y mixchʼojin pa ronojel ri kibʼano,
15 rech kqʼalajinik che ix ralkʼwal ri Dios, chʼajchʼoj ri iwanimaʼ y kʼo ta jun mak kriqitaj chiwij. Rumal che kʼo ta jun mak kriqitaj chiwij, kixjunamataj rukʼ jun luz ri kchupchut* chkixoʼl ri itzel taq winaq ri e kʼo kamik
16 we ri ix kiya ta kan ri utzij ri Dios ri kuya kʼaslemal. Rumal laʼ are chiʼ kpe ri Cristo kinkikot riʼ rumal che kʼo upatan ri chak xinbʼano y xaq ta loqʼ xinbʼano.
17 Pero kinjunamataj rukʼ ri vino ri ktix puwiʼ ri sacrificio ri kiya ix che ri Dios xuqujeʼ tajin kixintoʼ rech ri ix kipatanij ri Dios, rumal laʼ sibʼalaj kinkikot iwukʼ.
18 Y rumal che kinkikot iwukʼ, ri ix xuqujeʼ chixkikot wukʼ.
19 Wetaʼm che ri Qajaw Jesús kraj che pa kebʼ oxibʼ qʼij kintaq na bʼi ri Timoteo iwukʼ, rech kinkikotik are chiʼ kinta ri utz taq jastaq che tajin kibʼano.
20 Kʼo ta chi jun kjunamataj rukʼ ri areʼ rumal che qas kok il chiwe.
21 Rumal che ri e nikʼaj chik xaq xiw kechoman chkij ri areʼ y are ta kkibʼan ri kraj ri Jesucristo.
22 Pero ri ix qas iwetaʼm jas ubʼanik ri Timoteo, rumal che ri areʼ junam rukʼ jun kʼojolaxel ri teren chrij ri utat, ri areʼ sibʼalaj xchakun wukʼ che utzijoxik ri utz taq noticias.
23 Are chiʼ wetaʼm chik jas kbʼantaj na wukʼ, kintaq bʼi ri Timoteo iwukʼ.
24 Wetaʼm che ri Qajaw kraj kinopan iwukʼ pa kebʼ oxibʼ qʼij.
25 Pero chanim riʼ kintaq na bʼi ri wachiʼl Epafrodito, ri wachalal ri sibʼalaj chakunaq wukʼ junam rukʼ jun soldado, ri xitaq lo che nutoʼik.
26 Ri areʼ sibʼalaj kraj kerilaʼ iwach pero xbʼisonik are chiʼ xuto che ri ix iwetaʼm chik che xuriq jun yabʼil.
27 Ri areʼ sibʼalaj xyawajik y xa jubʼiqʼ ma xkamik. Pero ri Dios xutoqʼobʼisaj uwach, xuqujeʼ xutoqʼobʼisaj nuwach in rech más ta kuriq ribʼ ri bʼis chwij.
28 Rumal laʼ aninaq kwaj kintaq bʼi iwukʼ, rech kixkikotik are chiʼ kiwil chi jumul uwach y rech kinbʼison ta chi in.
29 Rumal laʼ rukʼ kikotemal chikʼulaj junam rukʼ ri kibʼan kukʼ ri qachalal. Y nim chiwilaʼ wi ri achijabʼ ri junam kibʼanik rukʼ areʼ,
30 rumal che xa jubʼiqʼ xraj ma xkamik are chiʼ xubʼan ri uchak ri Cristo y xuya ri ukʼaslemal pa kʼax rumal wech in, rumal che ri ix ix kʼo ta wukʼ che nutoʼik.
Notas
^ Chawilaʼ ri diccionario.
^ Pa nikʼaj chi lugar jewaʼ kbʼix che: «klaqʼpun», «kaniklaj», «krepan», «ktzʼuntzʼut».
