¿Jasche ri ukamikal ri Jesús xutoj kimak kʼi winaq?

TAJIN KUJAQ PA

Ri kuya ubʼixik ri Biblia

Ri ukamikal ri Jesús are ri kukoj ri Jehová che kitoʼik ri winaq chuwach ri makaj y ri kamikal. Ri Biblia kubʼij che rukʼ ri ukikʼel ri Jesús xtoj ri qamak (Efesios 1:7; 1 Pedro 1:18, 19). Rumal laʼ ri Jesús xubʼij che «xpetik rech kuya ri ukʼaslemal che kitorik kʼiʼalaj winaq» (Mateo 20:28).

¿Jasche kajwatajik che ktoj ri qamak?

Ri nabʼe achi che xbʼan rumal ri Dios, are jun tzʼaqat winaq che kʼo ta umak, xuqujeʼ kkunik kkʼasiʼ amaqʼel. Are kʼu xkamik rumal che xniman ta che ri Dios (Génesis 3:17-19). Ri e ralkʼwal ri Adán xkechbʼej kan ri makaj (Romanos 5:12). Rumal laʼ, ri Biblia kubʼij che ri Adán xukʼayij ribʼ pa uqʼabʼ ri makaj xuqujeʼ xeʼukʼayij kan ri ralkʼwal (Romanos 7:14). Kʼo ta nijun kkunik kuriq ri tewchibʼal che xyaʼ che ri Adán nabʼe kanoq rumal che qonojel oj ajmakibʼ (Salmo 49:7, 8).

Ri Dios sibʼalaj xel ukʼuʼx chke ri ralkʼwal ri Adán che tajin kkiriq kʼax (Juan 3:16). Ri Dios are sukʼ, rumal laʼ xajwataj jun tojbʼal chqe rech ri areʼ kkunik kukuy ri qamak (Salmo 89:14; Romanos 3:23-26). Rumal che kojuloqʼoqʼej qonojel ri oj winaq, xuya ri tojbʼal rech kukuy ri qamak y rech kusachisaj uwach (Romanos 5:6-8).

¿Jas riʼ ri tojbʼal mak?

Pa ri Biblia, ri tzij tojbʼal kchʼaw chrij wariʼ:

Are ri tojbʼal che kyaʼik (Números 3:46, 47).
Are ri kyaʼik, rech ktzoqopix jun winaq o jun jastaq (Éxodo 21:30).
Ri rajil xaq junam rukʼ ri kloqʼik. a

¿Y jas ubʼanik wariʼ rukʼ ri ukamikal ri Jesús? Chqilampeʼ.

Ri tojbʼal che kyaʼik. Ri Biblia kubʼij: «Paqal kʼu loqʼobʼem iwech» (1 Corintios 6:20; 7:23). Ri tojbʼal che xyaʼik are ri ukikʼel ri Jesús, che rukʼ wariʼ xeʼuloqʼ «konojel kiwach winaq, chʼabʼal, amaqʼ, nimaʼq taq tinamit» (Apocalipsis 5:8, 9).
Tzoqopitajem. Ri ukamikal ri Jesús xojutzoqopij pa uqʼabʼ ri makaj (1 Corintios 1:30; Colosenses 1:14; Hebreos 9:15).
Junam rajil. Ri ukʼaslemal ri Jesús xa junam rajil rukʼ ri kʼaslemal che xutzaq ri Adán (1 Corintios 15:21, 22, 45, 46). Ri Biblia kubʼij: «Je kʼu riʼ chi rumal ri man unimanik taj jun winaq [Adán] ri e kʼi xeʼux ajmakibʼ, jeriʼ xuqujeʼ rumal ri unimanik jun winaq [Jesús], ri e kʼi winaq xeʼux sukʼ» (Romanos 5:19). Wariʼ kuqʼalajisaj jasche xajwataj ri ukʼaslemal jun winaq rech xutoj kimak e kʼi winaq. Rumal laʼ «xujach ribʼ ri Jesucristo pa uqʼabʼ ri kamikal che utojik ri rajil ri kolobʼal ibʼ chke konojel» (1 Timoteo 2:5, 6).

a Ri tzij che kukoj ri Biblia che «tojbʼal» are kchʼaw chrij ri rajil o ri pwaq che kyaʼik rech ktoj jun jastaq. Jun kʼutbʼal, ri tzij hebrea kafár kraj kubʼij uchʼuqik (Génesis 6:14). Wajun tzij riʼ kkojik are chiʼ ksach ri makaj (Salmo 65:3). Are kʼu ri tzij kófer kchʼaw chrij ri kyaʼik rech ktzalix jun jastaq (Éxodo 21:30). Xa junam rukʼ ri tzij griega lýtron, che kchʼaw chrij ri tojbʼal che kyaʼik rech ktzoqopix jun winaq (Mateo 20:28). Ri griegos xkikoj wajun tzij riʼ chiʼ xechʼaw chrij ri tojbʼal che kyaʼik rech ktzoqopix jun winaq che xchap bʼi pa jun chʼoj o jun winaq che bʼanom esclavo che.