Ri kuya ubʼixik ri Biblia

 Ri Armagedón are jun nimalaj chʼoj che kubʼan na ri Dios kuk’ ri qʼatal taq tzij che e kʼo cho ri uwach Ulew. Ri qʼatal taq tzij ri’ y ri ketobʼan kuk’ kkaj taj kkinimaj ri Dios (Salmo 2:2). Ri nimalaj chʼoj rech Armagedón kusachisaj na uwach ri kiqʼatbʼal tzij ri winaq (Daniel 2:44).

 Ri tzij Armagedón, che xuqujeʼ ktzʼibʼax Har–Magedón, xa jumul kriqitaj pa ri Biblia. Wajun profecía ri’, che k’o pa ri wuj Apocalipsis kubʼij che «ri ajawinelabʼ re ronojel ri uwach ulew» kemulix na pa «ri chʼoj re ri nimalaj uqʼij ri Dios ri k’o ronojel ukunem». Wajun chʼoj ri’ kbʼan «pa ri kʼolbʼal Armagedón, are’ ri ub’i’ pa ri chʼabʼal hebreo» (Apocalipsis 16:14, 16).

 ¿E jachin taq kechʼojin pa ri Armagedón? Kechʼojin ri ángeles y ri e chaʼom che kebʼe pa ri kaj che kʼamom kibʼe rumal ri Jesucristo, y kekichʼak na ri e ukʼulel ri Dios (Apocalipsis 19:11-​16, 19-​21). Chkixoʼl ri ukʼulel ri Dios e k’o ri winaq che itzel kkil ri Dios y ri uqʼatbʼal tzij (Ezequiel 39:7).

 ¿La pa jun lugar cho ri uwach Ulew kbʼan wi wajun chʼoj ri’? No. Wajun chʼoj ri’ kbʼan cho ronojel ri uwach Ulew man xa ta pa jun lugar (Jeremías 25:32-​34; Ezequiel 39:17-​20).

 Ri tzij Armagedón (pa hebreo, Har Meghiddóhn) kraj kubʼij «Juyub’ re Meguidó». Meguidó are jun tinamit che xkʼojiʼ chunaqaj ri tinamit Israel. Kbʼixik che chunaqaj wajun lugar ri’ xbʼan nimaʼq ta chʼoj. Ri Biblia kchʼaw chrij jujun (Jueces 5:​19, 20; 2 Reyes 9:​27; 23:29). Are k’u Armagedón kraj ta kubʼij jun lugar che k’o chunaqaj ri ojer Meguidó, rumal che k’o ta jun nimalaj juyubʼ chilaʼ. Xuqujeʼ ri valle re Jezreel, jawchiʼ k’o wi Meguidó, kubʼanaʼ ta riʼ chke konojel ri winaq che kechʼojin rukʼ ri Dios. Rumal laʼ ri Armagedón kraj kubʼij jun nimalaj chʼoj che kubʼan na ri Dios kuk’ konojel ri nimaʼq taq qʼatbʼal tzij che e k’o cho ri uwach Ulew.

 ¿Jas kkʼulmataj pa ri chʼoj rech Armagedón? Qetaʼm taj jas kukoj na ri Dios pa wajun chʼoj ri’, weneʼ kukoj ri e jastaq che xukoj ojer kanoq: junam rukʼ saqbʼach, kabʼraqan, nimaʼq taq jabʼ, q’aq’ y azufre che ktzaq lo pa ri kaj, nimaʼq taq kʼaqulja y nimaʼq taq yabʼil (Job 38:22, 23; Ezequiel 38:19, 22; Habacuc 3:​10, 11; Zacarías 14:12). Rumal che ri ukʼulel ri Dios ksach kikʼuʼx jujun chke kakikamisa laʼ taq kibʼ, are kʼu kkil na che are ri Dios ri tajin kchʼojin kukʼ (Ezequiel 38:21, 23; Zacarías 14:13).

 ¿La ksachisax uwach ri uwach Ulew pa ri chʼoj Armagedón? Ksachisax taj. Ri uwach Ulew xbʼanik rech ri winaq kekʼojiʼ chuwach chbʼe qʼij saq (Salmo 37:29; 96:10; Eclesiastés 1:4). Rumal laʼ ri Armagedón kusachisaj ta uwach ronojel, xaneʼ kubʼano che e «kʼiʼalaj winaq» kekolotaj kanoq (Apocalipsis 7:​9, 14; Salmo 37:34).

 ¿Jas k’u che ri Biblia kubʼij che ri Armagedón kusach uwach ri «uwach ulew»? Qastzij che pa jujun taq versículos kkoj ri tzij uwach ulew are chiʼ kchʼaw chrij ri qas uwach Ulew che oj k’o wi’. Are k’u ri Biblia xuqujeʼ kukoj wajun tzij ri’ chiʼ kchʼaw chkij ri winaq che keniman ta che ri Dios (1 Juan 2:​15-​17). Rumal laʼ pa Armagedón are ksachisax kiwach ri itzel taq winaq are ta ksachisax ri uwach Ulew che oj kʼo wi (Mateo 24:3).

 ¿Jampaʼ kmajtaj ri chʼoj re Armagedón? Are chiʼ kchʼaw chrij ri «nimalaj kʼaxkʼolil» che kubʼano che kmajtaj ri chʼoj rech Armagedón, ri Jesús xubʼij: «Are kʼu we qʼij riʼ xuqujeʼ we joqʼotaj riʼ, man kʼo ta jun retaʼm, mawi ri taqoʼnibʼ ri e kʼo chikaj, mawi ri Kʼojolaxel; xaq xuwi ri Tataxel retaʼm» (Mateo 24:21, 36). Rumal laʼ ri Biblia kubʼij che ri Armagedón kmajtaj pa ri tiempo re ri upetbʼal ri Jesús che xmajtaj lo pa 1914 (Mateo 24:37-​39).