Ima cangancunaman yaycunapaj

Ir al índice

 30 CAJ YACHACUY

Cushicushun Jehovapa familian rurincho caycashganchipita

Cushicushun Jehovapa familian rurincho caycashganchipita

“Runataga anjilcunapita mas mënus [...] rurarayqui. Chaypis camacächishcanqui munayniyoj rispitasha cananpämi” (SAL. 8:5).

123 CAJ CANCIÓN Ali shongulanchiwan casucushun

IMAPITA YACHACUNAPAJ *

1. ¿Imataraj nishwan Jehová lapan camashgancunaman yarpar?

CIELUTA ricachacur Jehová lapan camashgancunata ricarga, ichanga Davidnopis cayno nishwan: “Syëluta, goyllarta, quillata camashayquita ricashpä yarpachacö: ‘¿Imaraj runaga? Runataga ¿imanir-raj cuyapanqui?’ nir” (Sal. 8:3, 4). Noganchipis Davidnochi ichicla cashganchita ricacunchi y yarpachacunchi imanir Jehová ali nawilanwan ricämashganchita. Adanwan Evata Diosninchi ali nawilanwan ricaycarpis familian rurincho caycashgantami nergan.

2. Adantawan Evata camaycurga, ¿imatataj paycunapaj Jehová munargan?

2 Adanwan Evaga Jehová cuyashgan churincunami cargan, cuyacoj Tayta cashpanmi Pachacho cushi cushila arupäcunanpaj paycunata nergan. Cayno nergan: “Gamcuna miray aypallaman cay pachaman juntanayquicama” (Gén. 1:28). Cay Pachata shumajyächir wamrayoj canantami Jehovaga munargan. Paycunaga casucärirganchu; chaymi juchancunaraycur churincunapis y shamoj castancunapis Jehovapa familianpita raquicärirgan.

3. ¿Imanirtaj nishwan Adantawan Evata Jehová camargan ali ricashga cananpaj?

3 Ali ricashga cananpämi Adantawan Evataga Jehová camargan. Runacunata camashganpitami, Jehovata cayno David nergan: “Runataga anjilcunapita mas mënus rurarayqui. Chaypis camacächishcanqui munayniyoj rispitasha cananpämi” (Sal. 8:5). Noganchipitaga más yachaj y más puedejmi angelcuna capäcun (Sal. 103:20). Pero Bibliaga nin,  angelcunapita más menusla cashganchitami. ¡Alapa alimi chayga caycan! Adantawan Evata camarga imayca bendiciuncuna paycunata shuyaraycargan.

4. ¿Imatataj Adanwan Eva rurargan y imacunapitataj canan yachacurishun?

 4 Imaman yarpar-raj Adanwan Evaga Jehovapa familianpita raquicärirgan. Culpancunaraycur miraynincunapis nacapacurna cawapäcurgan. Chaywanga manami niycanchichu Jehovapa familian rurinchu manana canapaj. Diosninchi bendicingami casucojcunataga. Naupataga ricärishun imatataj noganchiraycur Jehová rurashga ali ricashga cananchipaj. Nircurpis yachacushun noganchipis imatataj rurashwan familian rurincho caycänapaj. Ushanapäna yachacushun ima bendiciuncunatataj taripäcunga cay Pachacho cawaj Jehovapa wamrancuna.

JEHOVÁ MUNAN RUNACUNA ALI RICASHGA CANANTA, ¿IMANO?

¿Imata rurartaj Jehovaga ali ricashga caycänapaj yanapaycalämashcanchi? (5-11 parrafucunata ricay). *

5. Paytano camamashcanchi captenga, ¿imacunata rurartaj Diosninchitaga ‘gracias’ nishwan?

5 Jehová paytano camamashpanchimi ali ricashga cayculanchi (Gén. 1:26, 27). Chayno camashga carmi Diosninchinopis cuyapäcoj, laquipäcoj y ali cajta ruraj canchi (Sal. 86:15; 145:17). Chayno runa canapaj calpachacurga Jehovatami respetaycanchi y agradecicuycanchi (1 Ped. 1:14-16). Jehová mañamashganchita cushi cushila rurarga, jauca jaucalami goyäcunchi. Y Paytano camamashcanchi captinmi, pay munashganno runaman ticrar familiancho caycäshun.

6. Cay Pachata camaycurga, ¿imatataj Jehová rurargan runacuna cushishgala cawapäcunanpaj?

6 Cawanapaj ali Pachata Jehovaga goycalämashcanchi. Adanta manaraj camar Jehovaga mayna cay Pachata shumajyächishgana cargan (Job 38:4-6; Jer. 10:12). Cuyacoj cashpanmi imaycacunata camargan runacuna cushi cushila cawapäcunanpaj (Sal. 104:14, 15, 24). Camashgancunata ricapacaramurga ‘lapanpis alilash cargan’ (Gén. 1:10, 12, 31). Runacuna cushishga cananpächi lapan camashgancunatapis maquinman churaycurgan (Sal. 8:6). Runacuna juchaynajna caycarpis Jehovaga munashgannomi cay Pachataga shumajyaycachenga imaycamapis. Chayno ruranapaj aunimashganchipitaga agradecicuycashwanmi.

7. ¿Ima nintaj Josué 24:15 quiquinchicuna imatapis acracunapaj cajpita?

7 Jehovaga camamashcanchi quiquinchicuna imatapis acracunapaj. Chaymi imano cawacunapäpis quiquinchipita caycan (leiriy Josué 24:15). Mayraj Taytalanchi Dios cushicun munashganno waran waran cawacuptinchi (Sal. 84:11; Prov. 27:11). Jesuspita canan parlarcushun, paynopis noganchicunaga ali cajcunata acrarmi cawacushwan.

8. ¿Imano cawacushganchotaj ricacämurgan ali cajta Jesús acrashganta?

8 Jesusga waquincunata yanapänanpaj yarpachacuycarla cawaj, paynola noganchipis rurashwan. Juc cutichomi Jesusga gatejnincunawan uticashga caycar chunyaj cajpa aywacärirgan jamapayta munar. Jamacärinanpaj caycaptinshi maychicaj runacuna shapäcamurgan, ‘imata gaticaman’ ninanpa trucanga cuyapashpanmi Jesusga paycunata cushi cushila yachachergan (Mar. 6:30-34). Jesusnopis jucninchi jucninchi yachachicunapaj  calpachacuycaptinchega Diosninchitami alabaycanchi (Mat. 5:14-16). Jina chaycho ricacämunga Diospa familiancho cayta munashganchicuna.

9. ¿Imamantaj taytacuna yarpachacärinman?

9 Jehovaga runacunata camashga wamrayoj cananpämi y wamracunapis yachachishga canman Dioslata cuyananpaj y adurananpaj. Wamrayoj carga Diospitami regalo japuyta chasquishcanqui. Angelcuna poderniyoj captinpis Jehovaga manami camashgachu wamrayoj cananpaj. Tayta cajcunaga cushicurcunmanmi wamrancuna cashganpita, paycunapita canga wamrancuna Jehovalata casucur cawapäcunanpaj (Efes. 6:4; Deut. 6:5-7; Sal. 127:3). Wamracunata yanapanapäga Bibliapita jorgacämushga imayca yachachicuycuna caycan, videocunapis, canciuncunapis y internetcho publicaciuncunapis. Cay lapancunaga ruracämun, Jehovawan Jesús wamranchicunata cuyashpanmi (Luc. 18:15-17). Wamrancunata cuyapaylapa ashmaj yaracoj taytacunataga Jehová alapami cuyan. Taytacuna calpachacuptenga wamrancunapis Jehovapa familian rurinchomi caycanga.

10, 11. ¿Imatataj Jehová rurashga cuyashgan wamran wanushganraycur?

10 Jesús wanushganraycurmi Jehovaga wamrantano yapay ricaycalämanchi.  Chuscu caj parrafucho ricashganchinopis Adanwan Evaga Diospitami raquicärergan y culpancunaraycur churincunapis raquicar galaycärirgan (Rom. 5:12). Jatun juchata rurapäcushganpitami Jehovaga familianpita paycunata gargurirgan. ¿Miraynincunaga? Cuyacoj cashpanmi Jehovaga Churinta mandamurgan noganchiraycur wanunanpaj (Juan 3:16; Rom. 5:19). Chaynopa casucojcunataga familiantano chasquinanpaj y 144.000 acrashga runacunatapis wamrantano chasquinanpaj (Rom. 8:15-17; Apoc. 14:1).

11 Cananpis y shamoj wichanchopis Dioslata mana yamacaypa sirvirga 1.000 watacuna ushaycho, ‘prueba final’ nishganta pasarcur, Diospa familian rurincho caycarmi imaycamapis cawacushun (Sal. 25:14; Rom. 8:20, 21). Chayman yarparmi, cananlapitana Camacoj Taytalanchi Jehovataga ‘Papä’ nishpa gayacunchi (Mat. 6:9). Shamoj tiempucho cawarimojcunapis Jehova Diosta reguiycurga calpachacäringachi Diospa familian rurincho caycänanpaj.

12. ¿Ima tapucuypitataj yachacushun?

12 Yachacushganchino Jehovaga imaycatami rurashga runacunaraycur. Cielupaj acrashgacunataga maynami wamrantano chasquiycan, y cay Pachacho cawapäcunanpaj aypala runacunataga shamoj tiempuchomi legítimo wamrantano chasquenga (Apoc. 7:9). ¿Imano cawacurtaj musyacanga Jehovapa familian rurincho imaycamapis cawayta munashganchi?

JEHOVÁ RICAYCUCHUN FAMILIAN RURINCHO CAWAYTA MUNASHGANCHI

13. ¿Imata ruraptinchitaj Jehovaga chasquimäshun familiancho caycänapaj? (Marcos 12:30).

13 Lapan shongunchiwan Jehovalata cuyar payta sirvishun (leiriy Marcos 12:30). Imaycayojtami Jehovaga camamashcanchi, pero jucnin caj cushicuypaj caycan paylata aduranapaj puedishganchimi. Casucoj cashganchichomi ricacämunga paylata cuyashganchi (1 Juan 5:3). Casucunapäga caycan runacunata yachachir bautizanapaj Jesús mandamashganchimi  (Mat. 28:19). Jucninchi jucninchi cuyanacunapäpis juc mandato caycan (Juan 13:35). Lapancho casucoj carga familianchomi Jehovaga chasquimäshun (Sal. 15:1, 2).

14. ¿Imata rurartaj ricächishwan waquincunata cuyashganchita? (Mateo 9:36-38; Romanos 12:10).

14 Runa masinchita cuyashun. Imapitapis masga Jehová alapa cuyacoj cashgantami nishwan (1 Juan 4:8). Manaraj yuriptinchipis Payga maynash cuyaycämashcanchina (1 Juan 4:9, 10). Waquincunata cuyarga Pay cashganno canapämi calpachacuycanchi (Efes. 5:1). Runacunata cuyashganchitaga ricächishwan tiempo cashgancama Diospita parlaparmi (leiriy Mateo 9:36-38). Chayta rurarmi paycunapis Jehovapa familianta raquipäcunga. Pipis bautizacuptenga cuyaycushganchega manami ushacäcunmanchu (1 Juan 4:20, 21). Respetarmi paycunapitaga yarpachacushwanchu ima mana alicunatapis adrede rurarishganta. Chaypa trucanga valurarmi noganchipitapis más ali cristiano cashganta yarpashwan (leiriy Romanos 12:10; Filip. 2:3).

15. ¿Picunawantaj ali shongu y cuyapäcoj cashwan?

15 Ali shongu y cuyapäcoj waquincunawanpis cashun. Jehovapa familian rurincho imaycamapis cawayta munarga, Biblia yachachicushgantami casucunanchi. Jesusga pï maytapis cuyanapaj nergan, chiquicamajninchicunatapis cuyanapaj nergan (Luc. 6:32-36). Öraga ‘¡pitaj chiquicojcunataga cuyaycanga!’ nishwan; chayno mana ninapaj Jesús yarpashganman y rurashganman yarpachacushwan. Jehovata casucunapaj y Jesusnola canapaj calpachacurga, Taytanchega chasquicamäshunmi familian rurincho caycänapaj.

16. ¿Imatataj jucninchi jucninchi rurashwan Jehovapa familian ali ricashga cananpaj?

16 Jucninchi jucninchipita canga Jehovapa familian ali ricashga cananpaj. Juc familiacho wamra cajcuna mayornincuna rurashganta ricarmi, paycunapis chaynola rurapäcun. Ali cajta ricarga ali cajtami rurapäcun, Biblia nishganno mayorcuna mana cawaptenga öraga shulca cajcunapis casucuyta munanmanchu. Öraga Jehovapa familianchopis chaynolami pasarcunman. Pipis Diosta jaguiycurpis mana alicunata rurar galaycuptenga, waquincunapis chayta ricar mana alicunacho ishquirinman. Rasun caj caminupita witicurga imataraj waquincuna parlapäcunman Jehovapa familianpita (1 Tes. 4:3-8). Waquincuna mana alicunata ruracuptinpis yarpaylapis yarpashunchu Diosninchipita witicunapaj.

17. ¿Imataj cawayninchichoga cushichimäshun y imanir?

17 Jehovalaman yaracushun, ima aycata tarinapaj cajcunalamanga ama. Mandamashganchita casucurga y Gobiernunlaman yarparäcur cawacurga Diosga aunimanchi micuytapis, ropatapis y wasitapis goycalämänanchipaj (Sal. 55:22; Mat. 6:33). Aumi, imaycata tarinapaj cajcunalaman yarparäcurga manami cawayninchicho cushichimäshunchu. Cushishgalaga imaypis cawacushun Jehovapa munayninta rurarlami (Filip. 4:6, 7). Ichanga pipis ninman ‘guellaynë caycaptenga imaycäcunata rantipacamushaj’ nir; pero nircurga ¿tiempo cangachuraj chaycunata cuidaycänapaj? Chaymi tapucunanchi ‘¿charashgäcunalamanchu yarparäcuycä?’ nir. Pajta imapis aruycashganchicho pantarachimashwan. Jehovaga munan paypa cajta rurar ganas  ganasla rurananchitami. Juc cuticho Jesús juc mosuwan tarinacurgan, payga charashgancunalanman yarparäcur Diosninchita sirviyta mana munarganchu, ¿piraj payno cayta munanman au? Payga ichanga Diospa churinman ticrarinman cargan pero charashgancunalatami masga cuyargan (Mar. 10:17-22).

JEHOVAPA WAMRANCUNA CUSHISHGALA IMAYPIS CAWAPÄCUNANPAJ

18. ¿Ima bendiciuncunatataj taripäcunga shamoj tiempucho Diosta casucojcuna?

18 Lapancho casucoj runacunaga Jehovalata cuyar y paylata adurarmi imaypis carcaycanga. Cay Pachataga shumaj camaycurmi Jehová goycalämashcanchi, y mana atipaypaj chaychica runacuna chaycho cawapäcunga. Diospa gobiernun wichanga, galanancho cashgannola cuchun cuchun cay Pacha shumaj huertaman ticraycunga. Adantawan Evapa culpanraycur imayca mana alicuna yurimushgantapis Jesús ilacächengami. Chay wichanga wanushgacunapis sharcapäcamungami y mana gueshyaypana cawar galaycärenga cay mushoj Pachacho (Luc. 23:42, 43). Jina chay wichan juchanchicuna ilacaptenga Jehová munashgannona ali ricashga car imaycamapis cawacushun (Sal. 8:5).

19. ¿Imamantaj shumaj yarpachacunanchi?

19 Cay Pachacho cawanayquipaj shuyaraycarga, imayca bendiciuncunata tarirmi Jehovapa familian rurincho caycanquipaj. Chaymi calpachacuy imalachopis Tayta Diosninchita mana laquichinayquipaj. Waran waranmi calpachacunayqui Dios aunicushgancunata mana gongarinayquipaj. Yarpachacuy Taytalanchi Jehovalata aduranayquipaj y paylata imaycamapis alabanayquipaj.

107 CAJ CANCIÓN ¡Piraj gamno cuyacoj canman!

^ par. 5 Juc familia ali cananpäga pipis pushashganpita y jucnin jucnincuna yanapacushganpitami canga. Tayta cajcunaga cuyapänacurmi lapanta ruran, wamrancunapis casucärinmi. Chay japuyla Jehovapa familianwanpis caycan. Diosninchi lapan mandamasganchita casucurga familian rurinchomi imaypis caycäshun.

^ par. 55 FOTUPITA WILACUY: Diosnola cuyacoj carmi juc matrimonio cuyanacushpan wamrancunatapis cuyapan. Cay casaracushgacunaga Jehovatami alapa cuyan y wamrancunatapis Jehová goshgan regalutanomi rican. Y paycunatapis yachachin Jehovata sirvipäcunanpaj. Juc videuwanmi wamrancunata tantiachin imanir Jesús noganchiraycur wanushganta. Jina parlapan mushoj Pachacho imata ruranapaj.