Ir al contenido

Ir al índice

 TAPANMANTA | ¿PIKUNATAJ JEHOVAJ TESTIGOSNIN KANKU?

¿Ima qolqewantaj willanku?

¿Ima qolqewantaj willanku?

Sapa wata ashkha Bibliasta chantá Bibliamanta orqhosqa publicacionesta orqhoyku, runasmantaj saqeyku. Jallpʼantinpitaj sucursalesta ruwayku, imprentastaj kapuwayku. Chantá may chhika qotuchakuykunapi tʼaqasqa kashayku, kʼacha wasispitaj tantakuyku, chaykunaqa Salones del Reino nisqa sutikun. ¿Ima qolqewantaj chaykunata ruwakun?

Tukuy ima, runa qolqeta munasqanman jina qosqanwan ruwakun (2 Corintios 9:7). Kay 1879 watapi Torremanta Qhawaj revistata orqhoyta qallarikushajtin, ujnin revistapi jinata nerqa: “[Kay revista] orqhokunanpaj JEHOVÁ yanapasqanta yuyayku, pay yanapajtintaj ni jaykʼaj runasmanta mañakitus jina yanapata mañakusunchu”, nispa. Kunankamapis ajinallapuni.

Qolqetaqa sucursalman apachikun chayri maypichus tantakuyku chaypi cajitas tiyan chayman churakun. Mana diezmota, nitaj ofrendasta mañaykuchu, imata ruwasqaykumanta chayri publicacionesniykumanta nillataj cobraykuchu. Willasqaykumanta, tantakuypi yachachisqaykumanta, tantakuna wasista ruwaysikusqaykumantapis, ni pi pagawaykuchu. Imajtinchus Jesús nerqa: “Qankunaqa kayta mana pagaspalla japʼerqankichej, amallataj pagachikuychejchu”, nispa (Mateo 10:8). Sucursalesniykupi, centralniykupi llankʼajkuna chantá Jallpʼantinpi Jehovaj testigosninta ñaupajman apajkunamanta kajkunapis ni pi sueldoyojchu.

“Jehovaj testigosnenqa munasqankuman jina qolqeta qosqankuwan ashkha imasta ruwanku, sapa ujtaj mashkhatachus, mashkha kutitatajchus munasqanman jina churan.” (Tribunal Europeo de Derechos Humanos, 2011)

Jatun ñakʼariy kajtinpis, runa qolqeta munasqanman jina qosqan qolqellawantaj yanapakun. Ñaupa tiempo cristianosqa, llakiypi kajkunata tukuy sonqo yanaparqanku (Romanos 15:26). Kay tiempopipis jatun ñakʼariy kasqanrayku mana wasiyoj qhepakojkunata yanapallaykutaj. Wasisninkuta allinchapuyku, mikhunawan, pʼachawan, jampiswan ima yanapayku. Chay lugarpi kaj Tantakuna Wasistapis allinchaysiyku.