Ir al contenido

Ir al índice

TAPANMANTA | JESÚS KACHARICHIWANCHEJ ¿IMAMANTÁ?

¿Imaraykú kacharichisqas kayta necesitanchej?

¿Imaraykú kacharichisqas kayta necesitanchej?

“Warmimanta nacesqa runaqa pisillata kawsan, kawsaynintaj imaymana llakiykunawan juntʼa kashan. Ujllata tʼika jina phancharparin, chaymantataj wañuykapun, llanthu jinataj chinkapun.” (Job 14:1, 2.)

Unaymantapacha runaqa wiñaypaj jovenllapuni kausayta munarqa. Jinapis tukuy wañunchej. Qallariypi rikhurisqan palabrastaqa Job qhelqarqa kinsa waranqa watas ñaupajta, chay nisqantaj kikillanpuni kashan, jaqay tiempopi jina.

Tukuy runas wiñaypaj kausayta munanku. Bibliataj willawanchej, Diosqa sonqonchejman wiñay kausayta churasqanta, chayta entiendeyta atinanchejtapis (Eclesiastés 3:11). Munakuyniyoj Dios, imachus mana atikunanpaj jina kasqanta, ¿sonqonchejman churanmanchu? Mana, ¿icharí? Imajtinchus Diospa Palabranqa nin wañuy uj enemigo kasqanta, chaytaj atipasqa kananta (1 Corintios 15:26).

Wañoyqa tukuypa enemigonchejpuni. Ni mayqen runa wañuytaqa munanchejchu. Astawanqa imallapis rikhurinayashajtin ayqekunchejpacha. Onqoykuspataj doctorman jampichikoj rinchej. Arí, mana wañuyta munaspaqa tukuy imata ruwanchej.

¿Wañuy chinkanmanpunichu? Arí. Jehová Diosninchejqa mana pisi watasllata kausananchejpajchu ruwawarqanchej. Diosqa mana munarqachu wañunanchejta. Astawanpis munarqa, wiñaypaj Jallpʼapi kausakunanchejta. Nisqantataj juntʼanpuni (Isaías 55:11).

¿Imaynatá Dios wañuyta chinkachenqa? Runasqa unaymantapacha wañuyta chinkachiyta munarqanku, nitaj aterqankuchu. Kunankamapis chinkachinankupaj tukuy imata ruwashanku. Cientificosqa wakin onqoykunata sayachinankupaj, jampista ruwanku. Chantapis ADN nisqata estudiashanku. Ashkha lugarespi, runasqa aswan unayta kausanku kay pasaj pachaj watasmanta nisqaqa. Jinapis, wañuytaqa nipuni chinkachiyta atinchejchu. Biblia nin jinataj tukuy ‘jallpʼallaman tukunku’ (Eclesiastés 3:20).

Chaywanpis mana suyasunmanchu wañuyta runas chinkachinankuta. Jehová Diosqa, Jesucristonejta chaymanta kacharichiwanchejña.