Franzqa, 6 watitayojllaraj karqa. Uj pʼunchay, escuelanman rinanpaj mamanwan microta suyakusharqa. Jinallapi uj auto, aceraman wicharispa iskayninkuta sarurparqa. Mamanqa atispa mana atispa wawitanman qayllaykorqa. Chaywanpis wañusqallataña rikorqa.

Kay 2012, diciembre 14 pʼunchayta, Connecticut (Estados Unidos) llajtapi 26 runas wañuchisqas karqanku. Paykunamanta 20, 6 chayri 7 watitayojllaraj karqanku. Wakinpa sutisninku karqa: Carlota, Daniel, Olivia, Josefina ima. Pʼampakunanku kashajtin, presidente Barac Obamaqa, wawaspa sutisninkuta oqhariytawan nerqa: “Kay sajra ruwaykunaqa chinkanan tiyan”, nispa.

Bano nisqa sipasqa, 1996 watapi Irakmanta Noruegaman familianwan riporqa. Kay 2011 julio 22 pʼunchaypi, 18 watasniyojllaraj kashajtin, uj sajra runa, payta 76 jovenestawan wañuracherqa. Chay runaqa, ni uj chhikitanta sonqonta nanachikuspa, nerqaraj: “Perdonawankichej [...] mana aswan runasta wañuchisqaymanta”, nispa.

Kay jina llakiy willaykunaqa, tukuynejpi uyarikun. Accidentes, wañuchiykuna, guerras, mancharichej sajra ruwaykuna, Jallpʼa ikhakuykuna, pʼampaj yakus, waj laya jatun llakiykuna ima, may chhika runasta wañurachin chayri ñakʼarichin. ¡Ashkhastaj, mana ima sajrata ruwaspalla sonqo nanayta ñakʼarinku!

Wakin runasqa, Diosta juchachanku, nitaj runasmanta llakikusqanta ninku. Wakintaj ñakʼarisqanchejta rikuspapis, ni imata ruwasqanta ninku. Wakinkunatajrí, chay ñakʼariykuna kananpuni kasqanta yuyanku. Runaqa tukuy imata ninku. Chaywanpis, ¿pitaj imaraykuchus ñakʼariykuna kasqanta allinta sutʼinchawasunman? Qhepan yachaqanaspi, Diospa Palabranqa, imaraykuchus ñakʼariykuna kasqanta, maykʼajtajchus tukukunanta sutʼinchawasun.