Ir al contenido

Ir al índice

 LEEJKUNA YACHAYTA MUNANKU

¿Imaraykutaj Bibliapi wakin runaspa sutisninku mana willakunchu?

¿Imaraykutaj Bibliapi wakin runaspa sutisninku mana willakunchu?

Rut libropi, uj runata “Yú” nispa wajyanku, pichus Leymanta uj kamachiyta mana juntʼayta munarqachu (Rut 4:1-12). Bibliapi wakinkunaj sutisninku mana oqharikusqan, ¿niytachu munan chay runas sajras chayri pisipaj qhawasqa kasqankuta?

Mana. Sutʼinchanapaj, Jesusqa, wañunan qayllata Pascua mikhuypaj uj wasita wakichinankupaj yachachisqasninta kachashajtin, paykunaman nerqa: “Riychej llajtaman, uj runaj wasinman”, nispa (Mateo 26:18). Chay runaj sutin mana rikhurisqanrayku, ¿sajra chayri may pisipaj qhawasqa kasqantachu nisunman? Mana. Imajtinchus cheqamantachá Jesuspa discipulon karqa. Chaywanpis mana sutinta oqharikunanpunichu karqa.

Bibliaqa ashkha sajra runaspa sutisninkuta oqharin. Chaywanpis mana tukuy kʼacha runaspa sutisninkutachu oqharin. Sutʼinchanapaj, tukuypis ñaupaj warmej sutin Eva kasqanta yachanchej. Chaywanpis munapayayninrayku, mana kasukusqanrayku ima, Adanta juchallikunapaj tanqarqa, chaynejtataj tukuy runas ñakʼarinchej (Romanos 5:12). Noej warminmantañataj parlarina. Sutenqa mana Bibliapi rikhurinchu, chaywanpis payqa wajkunaj allinninta maskʼaj, kasukoj, qosantapis ruwanasninta juntʼananpaj yanaparqa. Chayrayku sutin mana oqharikusqanqa, mana niyta munanchu pisipaj qhawasqa kasqanta, chayri Dios payta mana bendecisqanta.

Bibliaqa, waj runasmanta parlallawanchejtaj. Mana sutisninkuta willakojtinpis, Diospa munaynin juntʼakunanpaj mayta yanaparqanku. Sutʼinchanapaj, Israelmanta uj sipasitapi tʼukurina, pichus Siriamanta soldadosta kamachej Naamanpa warminpa kamachin karqa. Payqa, patronanman Jehovaj profetanmanta mana manchachikuspa willarqa. Chaynejtataj, patronnin lepra onqoyninmanta sanoyaporqa (2 Reyes 5:1-14). Israelpi juez Jeftej ususinmantañataj parlarina. Payqa may creeyniyoj karqa, chayrayku tatan imatachus Diosman nisqanta juntʼananpaj, mana casarakorqachu, nitaj wawatapis rejserqachu (Jueces 11:30-40). Chantapis tawa chunka jina salmosta qhelqajkunapata, wakin cheqa sonqo profetaspa sutisninku ima, mana yachakunchu (1 Reyes 20:37-43).

Angelesmanta parlarillasunmantaj. May chhika ángeles kajtinpis, Bibliaqa iskayllamanta parlan: Gabriel, Miguel ima (Daniel 7:10; Lucas 1:19; Judas 9). Ujkunaj sutisninkoqa, mana yachakunchu. Uj kutipi Sansonpa tatan Manoa, uj angelman nerqa: “Sutillaykitapis willawayku ari, kay niwasqasniyku juntʼakojtin, qanmanta yuyarikunaykupaj”, nispa. Angeltajrí kuticherqa: “Imapajtaj sutiyta yachayta munankiri?”, nispa. Kay angelqa llampʼu sonqo karqa, Jehovallata jatunchana kasqanta yachasqanraykutaj, mana jatunchachikuyta munarqachu (Jueces 13:17, 18).

Bibliaqa, imaraykuchus wakinkunaj sutisnillanku rikhurisqanta mana sutʼinchanchu. Chaywanpis Diospa tukuynin kamachisninmanta, sutinku Bibliapi rikhurejtinpis manapis, mayta yachakusunman, imaraykuchus mana rejsisqa kaytachu maskʼarqanku.