Ir al contenido

Ir al índice

Jesusqa sonqo juntʼasqa kausarqa

Jesusqa sonqo juntʼasqa kausarqa

¿CHEQAMANTAPUNICHU Jesús, sonqo juntʼasqa kausakorqa? Payqa wajcha familiapi wiñakorqa, kausayninpitaj pisi imasniyojlla karqa. Arí, “mana maypi samarikunallampajpis” kaporqachu (Lucas 9:57, 58). Chantapis enemigosnenqa, chejnerqanku, qhasimanta juchacharqanku, wañucherqankutaj.

Chaywanpis ichá ninki: “¿Chaychu kusiy kausay kanman?”, nispa. Jinapis Jesuspa kausaynenqa, mana chayllachu karqa. Chayrayku kausayninmanta tawa imasta ukhuncharina.

1. JESUSQA DIOSPA MUNAYNINTA RUWANANPAJ KAUSARQA.

“Mikhuyneyqa Kachamuwajniypa munayninta juntʼanay.” (Juan 4:34.)

Jesusqa parlasqanwan, ruwasqanwan ima, Tatan Jehovaj munayninta ruwarqa. * Juan 4:34 nin jina, Diospa munayninta ruwaspa miskʼichikoj. Arí, paypajqa mikhuna jina karqa. Imaraykuchus chayta nisqanta qhawarina.

Jesús chayta nishajtin, chaupi pʼunchay jina karqa (Juan 4:6). Tukuy paqarinta Samariaj orqosninta purisqanrayku, yarqhasqachá kasharqa. Ichá chayrayku yachachisqasnin nerqanku: “Yachachej Señor, imallatapis mikhurikuy ari”, nispa (Juan 4:31). Jesustaj imatachus kutichisqanwan, Diospa kamachisqanta juntʼay, mikhuna jina kallpachasqanta rikucherqa. ¿Manachu Jesús kusisqa, sonqo juntʼasqataj kausasqanta nisunman?

2. JESUSQA TATANTA TUKUY SONQO MUNAKORQA.

“Tatata munaku[ni].” (Juan 14:31.)

Jesusqa cielopi kausashaspa, Tatanman sumaj kʼaskasqa karqa. Mayta munakusqanraykutaj, Tatanpa sutinta, munayninta, kʼacha kaykunasnintapis tukuyman rejsicherqa. Chantapis parlasqanpi, ruwasqanpi, yuyasqanpi ima, Tatan jinapuni kasqanta rikucherqa. Arí, Tatanman rijchʼasqa karqa. Chayraykuchá Felipe, “Dios Tatata rikuchiwayku” nejtin, Jesús kuticherqa: “Noqata rikuwajqa Tataytapis rikun”, nispa (Juan 14:8, 9).

Jesusqa Tatanta tukuy sonqo munakusqanrayku, wañupunankama kamachisqanta kasukorqa (Filipenses 2:7, 8; 1 Juan 5:3). Tatanta ajinata munakusqanrayku, kusisqa, sonqo juntʼasqataj kausarqa.

3. JESUSQA RUNASTA MUNAKORQA.

“Mana pipis aswan sinchʼi munakuyniyoj kanchu, kawsaqesninrayku wañojmanta nisqaqa.” (Juan 15:13.)

Juchasapa runas jinaqa, mana aswan sumaj kausayta suyasunmanchu. Bibliaqa sutʼita nin: “Uj runanejta jucha kay pachaman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”, nispa (Romanos 5:12). Arí, sapallanchejmantaqa mana wañuymanta librakuyta atisunmanchu (Romanos 6:23).

Chayrayku Jehovaj jatun munakuyninta, mayta agradecekunchej. Imaraykuchus payqa juchamanta, wañuymanta ima kacharichinawanchejpaj, Wawan Jesús ñakʼarinanta, wañunanta ima saqerqa. Jesustaj Tatanta, runasta ima munakusqanrayku, Tatan kamachisqanta tukuy sonqo kasukorqa, juntʼa kausaynintataj noqanchejrayku qorqa (Romanos 5:6-8). Chay jina munakuyniyoj kasqanrayku kusisqa, sonqo juntʼasqataj kausakorqa. *

4. JESUSQA TATAN MUNAKUSQANTA, PAYWAN SONQO JUNTʼASQA KASQANTA IMA YACHARQA.

“Kaymin ancha munasqa Chureyqa. Paywan sonqo juntʼasqa kani.” (Mateo 3:17.)

Jehovaqa, Jesús bautizakushajtin cielomantapacha chayta nerqa. Ajinamantataj Jesusta munakusqanta, paywan sonqo juntʼasqa kasqanta ima rikucherqa. Chayraykuchá Jesús nerqa: “Dios Tataqa munakuwan”, nispa (Juan 10:17). Arí, Jesusqa Tatan munakusqanta, paywan sonqo juntʼasqa kasqanta ima yacharqa. Chayrayku qhatiykachajtinku, asipayajtinku, wañuchishajtinkupis mana manchachikorqachu (Juan 10:18). Chantapis Tatan munakusqanta, paywan kusisqa kasqanta yachasqanrayku, sonqo juntʼasqa kausakorqa.

Arí, Jesusqa imapajchus kausasqanta yacharqa. Paymantaqa mayta yachakusunman. Qhepan yachaqanapeqa, kusisqa, sonqo juntʼasqa ima kausanapaj imastachus yachachisqasninman yuyaychasqanta qhawarisun.

^ párrafo 6 Biblia nisqanman jina, Diospa sutenqa Jehová. Qheshwa Biblia nisqamanta, glosario nisqapi 320 paginanta qhawariy.

^ párrafo 15 Juchamanta kacharichinawanchejpaj, imatachus Jesús ruwasqanmanta astawan yachayta munaspaqa, ¿Imatapunitaq Biblia yachachin? libroj, 5 yachaqananta leey. Kaytaqa Jehovaj testigosnin orqhonku.