¿Rikusqallanchikpichu creenanchik tiyan?

“Cristianos, wak religiones ima, Diospi, aswan qhipapi kawsay kananpi ima, creenku, chaykunamanta chiqata yachayqa mana atikunmanchu. Yachanapaqjina kaptinpis, kunanqa mana yachakunmanchu.” (BERTRAND RUSSELL, FILÓSOFO [1953])

KIKILLANTATAQ zoólogo Thomas Huxley nirqa. Payqa 1825 watapi paqarikurqa, chantapis Charles Darwinpa tiemponpi kawsarqa, kawsay qhasillamanta rikhurisqan yachachiymantataq mayta japʼikuq. Kay 1863 watapi qillqarqa: “Mana juk munakuyniyuq Dios kawsanchu cristianos kawsasqantapuni niptinkupis”, nispa.

Kay tiempopi runasqa, chay iskay runasjina yuyanku, ninkutaq rikusqallankupi creesqankuta. Ichapis paykunapaq pillamantapis chayri imallamantapis mana sutʼita yachaspa iñiyta churayqa, imapipis creellay kasqanta ninku.

Bibliaqa, ¿Diosmanta mana yachaspallachu creenanchikta nin? !Mana! Astawanpis imallapipis creeyqa, mana allin yuyayniyuqmanta —chayri wampusmanta— jamusqanta nin. Biblia jinata nin: “Uj wampu runaqa pejpa nisqantapis japʼikullan; yuyayniyoj runari allintaraj qhawakun maynintachus rinanta” (Proverbios 14:15).

¿Imatá nisunman, Diospi creeymanta? ¿Chiqamantachu, Dios kawsasqanta yachanchik, kawsaptinqa munakuwanchikchu?

Diospa kʼacha kaykunasnin rikukun

Pablo Atenasmanta yachayniyuq runasman, Diosmanta sutʼinchachkaspa nirqa: “Paymin kay pachata, tukuy imasnintawan ruwaj Diosqa”, nispa. Chantá nillarqataq: Diosqa tukuy runamanta llakikun, paytaq “mana karupichu kashan sapa ujninchejmanta”, nispa (Hechos 17:24-27).

¿Imarayku Pablo mana iskaychakurqachu, Dios kawsasqanmanta, ruwasqan runasmantataq llakikusqanmanta? Payllataq Romamanta cristianosman imaraykuchus Diospi  creena kasqanta rikuchinanpaq jinata qillqarqa: “Diospa mana rikukoj imasnenqa sutʼita rikuchikunku paypa ruwasqasninnejta, kay pacha ruwakusqanmantapacha”, nispa (Romanos 1:20).

Qhipan paginaspi, Diospa iskay kʼacha kaykunasninta ruwasqanpi rikukusqanta yachakusunchik. Chayta ukhunchachkaspataq tapurikuy: “¿Imatataq Diosmanta kay kʼacha kaykunasnin yachachiwan?”, nispa.

[3 paginapi sutʼinchaynin]

Bibliaqa, ¿Diosmanta mana yachaspallachu creenanchikta nin?