Ir al contenido

Ir al índice

 LEEJKUNA YACHAYTA MUNANKU

¿Cristianos Navidadta ruwanankuchu tiyan?

¿Cristianos Navidadta ruwanankuchu tiyan?

Navidadtaqa mundontinpi ruwanku. Ashkha runastaj ninku: “Navidadpeqa Jesús nacekusqanta yuyarinchej”, nispa. ¿Ñaupa cristianos Navidadta ruwajchu kanku? ¿Imatá Biblia nin diachakusta chayri cumpleañosta ruwaymanta? Chaykunata yachayqa yanapawasunchej Navidadta cristianos ruwananchejchus manachus kasqanta.

Bibliaqa mana ninchu ñaupa tiempopi cristianos Jesuspaj cumpleañosta ruwasqankuta. Nillataj ninchu Diospa mayqen kamachinpa cumpleañosnintapis ruwasqankuta. Bibliaqa iskay diachakusllamanta parlan. Chayta ruwaj runastaj Jehová Diosta mana yupaychajchu kanku. Chay iskaynin diachakuspitaj llakiylla karqa (Génesis 40:20; Marcos 6:21). Encyclopædia Britannica libro nisqanman jina ñaupa tiempomanta cristianosqa mana cumpleañosta ruwayta munajchu kanku.

¿Maykʼajtaj Jesús nacekorqa?

Bibliaqa mana ninchu ima fechapichus Jesús nacekusqanta. Cyclopedia de McClintock y Strong libro nin: ‘Mosoj Testamento, waj libros ima mana willankuchu maykʼajchus Jesús nacekusqanta’, nispa. Jesús yachachisqasnin cumpleañosninta yuyarinankuta munanman karqa chayqa, yachachisqasninman ima fechapichus nacekusqanta willanman karqa.

Bibliaqa mana ninchu Jesús Navidadta ruwasqanta. Nillataj ninchu yachachisqasnin Navidadta ruwasqankuta. New Catholic Encyclopedia libro nin: ‘Navidadmanta parlakuyta qallarerqa Cronógrafo de Filócalo nisqapi, nisunman calendario romanopi, chaytaj karqa 336 watapi’, nispa. Chayqa karqa Jesús kay jallpʼaman jamusqanmanta, Biblia qhelqakuyta tukukusqanmanta aswan qhepaman. Chayrayku Cyclopedia de McClintock y Strong nin: “Navidadta ruwaytaqa mana Dioschu kamachin, nitaj Mosoj Testamentopi Navidadmanta parlanchu”, nispa. *

¿Imata yuyarikunankutataj Jesús yachachisqasninman kamacherqa?

Sumaj Yachachej Jesusqa yachachisqasninman imatachus ruwanankuta nerqa, chaytaj Bibliapi qhelqasqa kashan. Jinapis ni jaykʼaj nerqachu Navidadta ruwanankuta. Imaynatachus uj profesor munan imatachus nisqallanta alumnosnin ruwanankuta, ajinallatataj Jesuspis munan imatachus nisqallanta yachachisqasnin ruwanankuta (1 Corintios 4:6).

Ñaupa tiempomanta cristianosqa Jesuspa wañupuyninta yuyarikojpuni kanku. Imaraykuchus Jesusllataj paykunaman chayta maykʼajchus, imaynatatajchus ruwanankuta nerqa. Yachachisqasninman kamachiykunata qosqan, ima pʼunchaychus wañupusqan fechapis Bibliapi sutʼi qhelqasqa kashan (Lucas 22:19; 1 Corintios 11:25).

Yachakunchej jina Navidadpi runasqa cumpleañosta ruwanku. Ñaupa tiempomanta cristianostaj mana chayta ruwajchu kanku. Chantapis Bibliaqa mana ninchu Jesús Navidadta ruwasqanta, nitaj ninchu Diosta kasukoj runaspis ruwasqankuta. Chayrayku jallpʼantinmanta ashkha cristianos Navidadta mana ruwankuchu.

^ párr. 6 Navidadmanta astawan yachakunaykipajqa 1 de diciembre de 2014 Torremanta Qhawaj revistapi “Leejkuna yachayta munanku: ¿Navidadta ruway allillanchu kanman? nisqa yachaqanata leeriy chayri Internetpi jw.org. nisqapi leellawajtaj.